༈ ན་མོ་གུ་རུ། རྩོལ་མེད་ཀྱི་བྱིན་རླབས་སྣོད་བཅུད་ཐམས་ཅད་ལ་འཇུག་པར་ནུས་པས་གཞན་སེམས་བྱིན་གྱིས་རློབས་པའི་མཐུ་ཅན། མངོན་པར་ཤེས་པ་ཐོགས་པ་མེད་པས་བསམ་པ་ཇི་ལྟ་བ་བཞིན་དུ་རིས་དང་ཕྱོགས་ལྷུང་མེད་པར་རྗེས་སུ་འཛིན་པའི་སྙིང་རྗེའི་གཞན་དབང་དུ་་སོང་བ། སྐུའི་རྣམ་པ་མཐོང་བ་ཙམ་གྱིས་ཀྱང་གཞན་སྣང་བསྒྱུར་ཏེ། དད་པ་དང་ཉམས་རྟོགས་ཤུགས་ཀྱིས་བསྐྱེད་ཅིང་། ལས་དང་སྐལ་བར་མི་ལྡན་པ་ཐ་ཤལ་དག་ཀྱང་ཐ་མལ་གྱི་རྣམ་རྟོག་རེ་ཞིག་ཏུ་རྒྱུན་གཅོད་པར་ནུས་པ། མཁས་བཙུན་བཟང་གྲུབ་གྱི་གྲགས་པ་དོན་གཉེར་གྱི་བླ་མ་རྣམས་ཀྱི་རྣམ་ཐར་ལ་ངན་སྐྱུགས་ལྟར་གཟིགས་ནས། མཐོ་དམན་བར་པ་ཀུན་ལ་རྗེས་དང་བཀུར་སྟི་དང་ཁེངས་པ་བསྐྱུངས་པའི་ཚུལ་གྱིས་ང་རྒྱལ་ཅན་མ་བརཏལ་བར་ཤུགས་ཀྱིས་ཐུལ་བ། ཡོན་ཏན་གྱི་ཆ་ཤས་སངས་རྒྱས་ཀུན་གྱིས་ཀྱང་བརྗོད་པར་དཀའ་བའི་དྲིན་ཅན་ཆོས་ཀྱི་རྗེ་ཀརྨ་པ་དབང་ཕྱུག་རྡོ་རྗེའི་ཞལ་སྔ་ནས་ཀྱིས་མི་རྟག་པར་བསྐུལ་བ་དང་། བརྩོན་འགྲུས་སུ་བསྐུལ་བ་དང་། གནས་ལ་བསྟོད་པ་དང་། ཆོས་ཀྱི་དབྱིངས་སུ་ལྟ་བའི་རྡོ་རྗེའི་མགུར་མང་དག་ཅིག་གསུང་བ་རྣམས་ཀྱི་ནང་ནས་ཁ་འཐོར་བ་ཅི་རིགས་པ་ཞིག་ཟིན་བྲིས་སུ་བྱས་པ་ནི་འདི་ལྟ་སྟེ། དེ་ཡང་རང་ལོ་ཉེར་བདུན་པ་ལ་གདན་ས་ཆེན་པོ་མཚུར་ཕུའི་ཡང་དབེན་དུ་བསྡད་པའི་ཚེ། མཆེད་གྲོགས་འགའ་ཞིག་གིས་མགུར་མ་ཞིག་གྱིས་ཟེར་བར་བརྟེན་བཀའ་བརྒྱུད་གོང་མ་ཚོས་བྱིན་གྱིས་རླབས་ཤིང་ཞབས་ཀྱིས་བཅགས་ཐུགས་དམ་རྟོགས་པ་ཕུལ་ཕྱིན་ཐུགས་ལ་འཁྲུངས་པའི་གནས་འདིར་དགེ་སྦྱོར་ཞིག་བྱས་ན་ཉམས་རྟོགས་སྐྱེ་ངེས་སྙམ་པའི་ངེས་ཤེས་ཤིག་ཀྱང་སྐྱེས། སྔོན་གྱི་བཀའ་བརྒྱུད་གོང་མའི་རྣམ་ཐར་ཀྱང་དྲན། ད་ལྟའི་ཆོས་པར་རློམ་པ་བདག་ལ་སོགས་པ་རྣམས་ཀྱི་བྱ་སྤྱོད་ལའང་ཡིད་མ་བདེ། ད་བཀའ་བརྒྱུད་གོང་མའི་རྣམ་ཐར་དེ་འདྲ་བ་ལ་རང་གི་སྐལ་བས་མ་གྲུབ་པས་དངོས་སུ་ད་ལྟ་སྙེགས་མ་ནུས་ནའང་མ་འོངས་པ་ན་སློབ་ནུས་པར་གྱུར་ཅིག་པར་སྨོན་ལམ་བཏབ་སྟེ་དེའི་དུས་སུ་བླ་མ་དང་གནས་ཀྱི་ཡོན་ཏན་དྲན་ཞིང་རང་གཞན་དགེ་བ་ལ་བསྐུལ་་བའི་གསོལ་འདེབས་གདུང་དབྱངས་འདི་ལྟར་དུ་བཏོན་པ་ལགས་སོ། །
༈ དཔལ་འཇིག་རྟེན་དབང་ཕྱུག་ཀརྨ་པ། །
རྗེ་དེ་ཡི་སྐུ་གསུང་ཐུགས་རྡོ་རྗེ། །
གསང་མི་ཟད་འཁོར་ལོའི་མཛོད་འཛིན་པ། །
ཕ་དྲིན་ཅན་ཆོས་རྗེའི་ཞབས་ལ་འདུད༑ །
གནས་ཡིད་འོང་བཀྲ་ཤིས་ལྷུན་ཆགས་འདིར། །
རི་སྤོ་མཐོན་རིན་ཆེན་བྲག་རི་ལ། །
ལྷ་ཡི་དམ་ཞི་ཁྲོ་རབ་འབྱམས་བཞུགས། །
སེམས་རྩེ་གཅིག་སྒྲུབ་པའི་གནས་སུ་བཟང་། །
ལྷོ་ནགས་མའི་རི་ངོགས་བརྗིད་ཆགས་པར༑ །
ཤིང་སྣ་ཚོགས་སྤོས་དྲི་ལྡན་པའི་ངོས། །
ཡུམ་བཅོམ་ལྡན་སྒྲོལ་མ་དངོས་སུ་བཞུགས། །
མཆོག་ཐུན་མོང་དངོས་གྲུབ་བདེ་བླག་སྩོལ། །
ནུབ་གངས་དཀར་ཤེལ་གྱི་མཆོད་རྟེན་མདུན། །
རིགས་རྣམ་ལྔ་རྒྱལ་བའི་དཀྱིལ་འཁོར་བཞུགས། །
དེ་མཐོང་བ་ཙམ་གྱིས་ཐོགས་མེད་ཀྱི། །
ལས་ཉོན་མོངས་སྐྱེ་བའི་སྒྲིབ་པ་སེལ། །
བྱང་པདྨ་རཱ་གའི་བྲག་ངོས་ལ། །
དཔལ་རྟ་མགྲིན་དབང་གི་རྒྱལ་པོ་ནི། །
ལྷ་དཔའ་བོ་རྒྱ་མཚོས་བསྐོར་བ་ཡང་༑ །
དོན་འཁོར་འདས་ཀུན་ལ་རང་དབང་སྒྱུར། །
ཤར་ལྷ་གདན་ཇོ་ཤཱཀ་མཆེད་ལས་སྤྲུལ། །
རྡོ་སྲ་མཁྲེག་རིན་ཆེན་ཕ་ཝང་ལ། །
དཔལ་ཤཱཀྱའི་རྒྱལ་པོ་རང་བྱོན་ནི། །
བསྟན་རྣམ་དག་ཡུན་དུ་གནས་པར་མཛད། །
དབུས་འོག་མིན་གནས་མཆོག་རྡོ་རྗེ་གདན། །
རྗེ་དུས་གསུམ་མཁྱེན་པ་ལ་སོགས་པ། །
དུས་གསུམ་གྱི་སངས་རྒྱས་བཞུགས་པའི་གནས། །
མཚུར་མདོ་བོ་སྤྲུལ་པའི་གཙུག་ལག་ཁང་། །
ལར་འཛམ་གླིང་ཙམ་ན་འགྲན་ཟླ་བྲལ༑ །
འདི་གང་གི་མཐོང་དང་བགྲོད་པ་དང་། །
ལན་གཅིག་ཙམ་ཡིད་ལ་དྲན་པས་ཀྱང་། །
ཚེ་བསྐལ་པའི་སྡིག་སྒྲིབ་འདག་ངེས་ཤིང་། །
བདག་ཟང་ཟིང་གཡེང་བས་ཡིད་འཁྲུགས་པས། །
གནས་ཇོ་མོ་གངས་དང་མཚུར་ཕུ་སོགས། །
ཕ་བཀའ་བརྒྱུད་རྣམས་ཀྱི་བཞུགས་གནས་སུ། །
རྩེ་གཅིག་ཏུ་སྒྲུབ་པ་སྙིང་ལ་བརྣགས། །
དེ་བརྣགས་ཀྱང་གཉེན་པོའི་སྟོབས་ཞན་ཅིང་། །
ཚེ་འདི་ལ་འཁྲི་བ་མ་ཆོད་པས། །
འཕྲལ་གཞན་དོན་མིང་དུ་བཅོས་པ་ནས༑ །
ཉིན་མཚན་མེད་གྲོགས་སྦུར་ལྟ་བུར་གཡེངས། །
ད་རང་ལ་བསམ་བཞིན་སྙིང་རྩ་ཁོལ། །
ཆོས་བྱ་བློའི་ངང་དུ་ལང་ཚོ་ཡོལ། །
ལར་ཁ་ཞེ་མི་མཐུན་རང་སྤྱོད་འདི། །
ཕ་བླ་མས་མཁྱེན་ཏེ་རང་ལ་གནོད། །
ད་ཀརྨའི་རྗེས་འཇུག་སྒྲུབ་འདོད་རྣམས། །
འཆི་མི་རྟག་དྲག་པོས་རྒྱུད་བསྐུལ་ཏེ། །
ཚེ་འདི་ཡི་བྱ་བ་ཅོག་ཞོག་ལ། །
ཆོས་སྒྲུབ་པ་སྙིང་པོར་མཛོད་ཅིག་དང་། །
ཚེ་གཏན་གྱི་འདུན་མ་འགྲུབ་པར་ངེས། །
སྤྱིར་མང་པོའི་བསམས་པས་སེམས་རྩ་འཁྲུགས། །
བློ་ཐེ་ཚོམ་གྱི་འདུན་མས་གར་མི་ཕྱིན། །
རྟེན་བསོད་སྙོམས་ཕྱག་དར་ཁྲོད་ཀྱི་གོས། །
སྣོད་ལྷུང་བཟེད་ཡོ་བྱད་ཉི་ཚེ་དང་། །
ཟས་སྡིག་མེད་དཀའ་ཐུབ་བཅུད་ལེན་བརྟེན། །
འཕྲལ་སྦྱོང་དེ་བྱུང་ཡང་བོགས་སུ་ཆེ༑ །
སྤྱིར་བསམ་པའི་གཙོ་བོ་བྱང་སེམས་སྦྱོངས། །
རང་གཅིག་པུའི་འདུན་མ་དམ་པས་ཁྲེལ། །
མ་འགྲོ་དྲུག་ཆེད་དུ་སྙིང་རྗེ་ཡིས། །
ལམ་ཟབ་མོ་སྟོང་ཉིད་སྙིང་རྗེ་སྒོམས། །
ཆོས་གདམས་ངག་ཤློ་ཀ་གཅིག་ནས། །
བཀའ་བརྒྱད་ཁྲི་བཞི་སྟོང་ཆོས་ཕུང་རྣམས། །
དོན་རང་རྒྱུད་ཉམས་སུ་མ་བླངས་ན། །
སྨྲ་མཁས་ཀྱང་ནེ་ཙོའི་ཟློས་གར་ཙམ༑ །
རྗེ་བླ་མས་སྩལ་བའི་གདམས་ངག་རྣམས། །
དུས་དང་པོར་ཐོས་པས་སྒྲོ་འདོགས་བཅད། །
དུས་གཉིས་པར་བསམ་པས་གཏན་ལ་ཕབ། །
མཐར་རྩེ་གཅིག་སེམས་ལ་མཉམ་པར་བཞག །
ཡིད་ཉོན་མོངས་རྟོག་པ་རབ་ཞི་སྟེ༑ །
སེམས་མི་གཡོ་བརྟན་པར་གྱུར་པ་ནས། །
ཆོས་ཀུན་ལ་བདག་མེད་ཤེས་རབ་མཆོག །
དོན་ཡིན་ལུགས་ཞི་ལྷག་ཟུང་འཇུག་སྒོམས། །
ཕ་བླ་མ་ཡིད་བཞིན་ནོར་བུ་ལ། །
ཉིན་མཚན་མེད་གསོལ་བ་དྲག་བཏབ་སྟེ། །
བློ་གཉིས་འཛིན་འཁྲུལ་བའི་སྣང་བ་འདི། །
བུན་ལོང་དེར་གཏད་མེད་སྲུལ་གྱིས་ཐོང་། །
དུས་སྔ་ཕྱི་མེད་པའི་ཤེས་པ་ལ༑ །
ལར་བཟོ་བཅོས་ཀྱི་ལྷན་པ་དོན་མེད་པས། །
གང་ཤར་བ་རིག་པའི་ངོ་བོ་ལ། །
དུས་རྒྱུན་དུ་མ་བཅོས་ལྷུག་པར་ཞོག །
སེམས་ཡེ་ནས་སངས་རྒྱས་ཡིན་པ་ལ། །
འདི་ཡིན་ལ་ཡིན་བཞིན་མཛུབ་བཙུགས་ནས། །
དཔལ་དྭགས་པོའི་ཞལ་ལུང་གནད་ཀྱི་མཆོག །
དོན་མངོན་སུམ་ངོ་སྤྲོད་སློབ་དཔོན་ལགས། །
ཚིག་འདི་ལ་དགེ་བ་ཅི་མཆིས་པ། །
ཁྱོད་གསོལ་འདེབས་ཀྱི་སློབ་བུས་གཙོ་བྱས་པའི། །
མི་ཁོ་བོའི་རྗེས་འཇུག་གདུལ་བྱ་རྣམས། །
དཔལ་རྡོ་རྗེ་འཆང་དབང་མྱུར་འགྲུབ་ཤོག །
ཅེས་པ་འདི་ཀརྨ་ཅོ་ལེ་སོགས་ཀྱིས་བསྐུལ་བ་ལ་བརྟེན་མཚུར་ཕུའི་དབེན་གནས་བསམ་གཏན་ཡིད་འོང་གླིང་གི་དབང་ཕྱུག་ཕུག་ཏུ་བྲིས་པ་བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག།
པར་དབང་ཁོངས་གཏོགས་ས་ནི་རྩོམ་པ་པོ་དྲ་བ།བརྒྱུད་སྤེལ་བྱེད་དུས་ངེས་པར་དུ་དྲ་ཐག་སོར་བཞག་བྱ་དགོས།
རྩོམ་ཡིག་གི་སྦྲེལ་ཐགhttps://www.tbwriters.com/?p=4514
དཔྱད་མཆན་སྤེལ།