（༈ ན་མོ་གུ་རུ། མི་ལས་འདས་པའི་སྐྱེས་ཆེན་སྐྱེ་འཆི་ལ་རང་དབང་ཐོབ་ཅིང་མངོན་པར་ཤེས་པའི་རྫུ་འཕྲུལ་རྒྱ་ཆེན་པོ་མངའ་བ། ཉོན་མོངས་པ་དང་ཉེ་བའི་ཉོན་མོངས་པའི་གནས་ངན་ལེན་གྱི་དྲི་མ་བྲལ་བ། དེ་བཞིན་གཤེགས་པའི་གསུང་རབ་མཐའ་དག་གི་དགོངས་པ་འགྲེལ་པ་ལ་མི་འཇིགས་པའི་སྤོབས་པ་ཐོབ་པ། སྙིགས་མའི་དུས་སུ་མཁྱེན་རབ་དང་ཐུགས་རྗེ་ཐོགས་པ་མེད་པ༑ སེང་གེ་སྲབ་མེད་ནམ་མཁར་འཕྱོ་བ་ལྟ་བུ་རང་སྣང་རྣམ་པར་དག་ནས་གཞན་སྣང་བསྒྱུར་བར་ནུས་པའི་རྗེ་བཙུན་དམ་པ་ཀརྨ་པ་མི་བསྐྱོད་རྡོ་རྗེའི་ཞལ་སྔ་ནས་ཀྱིས་དཔལ་ལྡན་བླ་མ་དཀོན་མཆོག་གསུམ་གྱི་ངོ་བོ་བདེ་བ་ནས་བདེ་བར་བྱོན་པ་རྣམས་ཀྱིས་སེམས་ཅན་སྡུག་བསྔལ་ནས་སྡུག་བསྔལ་དུ་འགྲོ་བ་རྣམས་ལ་ཐུགས་རྗེའི་དགོངས་པ་བསྐུལ་བའི་ཕྱིར་ཞལ་གདམས་གསོལ་བ་འདེབས་པ་མང་དག་ཅིག་གསུངས་པ་ལས། ཁ་འཐོར་བ་ཅི་རིགས་པ་ཞིག་ཟིན་བྲིས་སུ་བྱས་པ་ནི་འདི་ལྟ་སྟེ། དེ་ཡང་རང་ལོ་སོ་གཉིས་པ་ཧོར་ཟླ་བདུན་པའི་གནམ་གང་གི་ནུབ་མོ་རྨི་ལམ་དུ་ས་གཞི་ནམ་མཁའ་དང་བཅས་པ་བུན་ལོང་དུ་བྱེད་པ་ལ། དམར་ཆེན་དང་། ལྗང་ཆེན་དང་། སྔོ་དྭངས་དང་། དཀར་ཆེན་དུ་ལམ་ལམ་བྱེད་པའི་འཕྲོ་ཞིག་ནས་ནམ་མཁའ་རྣམ་པར་དག་པ་སྔོ་མཐིང་གི་དབུས་ན་རྟེན་མེད་པར་རྗེ་དུས་གསུམ་མཁྱེན་པ་དེ་ཆོས་གོས་རྣམ་གསུམ་ཞྭ་ནག་དང་བཅས་པ་ཕྱག་མཉམ་བཞག་ཕྱེད་ལོག་གེ་བ་ཞིག་དང་། ཕྱེད་མ་སྐྱིལ་ཀྲུང་གིས་ལམ་བྱུང་བས་ཧ་ཐལ་ཆེས་པའི་མི་བཟོད་པའི་ཉམས་ཞིག་བྱུང་བས་རྟོག་མེད་ལ་དར་ཅིག་སོང་བས། རྗེས་ནས་རྟོག་པ་ཞིག་སྐྱེས་ཙ་ན་རྗེ་དུས་གསུམ་མཁྱེན་པ་དེ་སྐུ་ཁྲ་ཚུབ་བེར་སོང་ནས་ནམ་མཁའ་ཐམས་ཅད་འཇའ་ཚོན་བརྗོད་མི་ཤེས་པའི་འོད་ཟེར་དུ་སོང་བའི་བར་ནས་བདུད་རྩི་དང་མེ་ཏོག་གི་ཆར་ཁྲ་ཆོལ་ལེ་འབབ་ཀྱིན་འདུག་པས། གུ་རུ་རཏྣ་མའི་གསོལ་འདེབས་ལ་ངེས་ཤེས་རྙེད། དེ་ནས་ཕྱི་ཉིན་གཉིད་སད་ནས་ཀྱང་ཉི་མ་ཕྱེད་ཙམ་གྱི་བར་དུ་སྣང་བ་ཟི་བུན་ནེ་བ་ལ་སོང་བ་ཞིག་བྱུང་བ་གཞན་ལ་མི་བསྒྲགས་སྙམ་ཡང་དེ་ལྟ་བུ་ལ་དགའ་ཚོར་བློས་མི་བཟོད་པ་བྱུང་ནས་ལོ་རྒྱུས་ཡེ་གེར་བྲིས་ཏེ་གསོལ་བ་བཏབ་པ་ནི།）
༈ ཕ་དྲན་ནོ་དེ་དུས་གསུམ་གྱིས་སངས་རྒྱས་དྲན། །
ཕ་དྲན་ནོ་དེ་དུས་གསུམ་གྱི་མཁྱེན་པ་དྲན༑ །
ཕ་དྲན་ནོ་དེ་ཀརྨའི་བཀའ་བརྒྱུད་དྲན། །
ཕ་དྲན་ནོ་དེ་སྒྲུབ་བརྒྱུད་ཀྱི་ངོ་མཚར་དྲན། །
བདག་འཁོར་བ་རུ་དོན་མེད་དེ་ཙམ་འཁྱམས། །
རྗེ་ཁྱེད་ཀྱི་ཐུགས་རྗེས་དེ་ཙམ་དུ་བཟུང་༑ །
དེ་བཟུང་ཡང་གཏི་མུག་གིས་བསླད་ཆེས་པས། །
རྗེ་ཁྱེད་ཀྱི་མཚན་ཙམ་ག་ལ་ཐོས། །
བདག་ད་ལན་མི་ལུས་ཙམ་པོ་ཐོབ། །
རྗེ་ཁྱེད་ཀྱི་བསྟན་པའི་སྒོ་རུ་ཞུགས། །
རྗེ་ཁྱེད་ཀྱི་བསྟན་པ་རྣམ་དག་ལ། །
ཞུགས་ནས་བསྟན་པ་འཁྲུལ་མེད་ཀྱི། །
སྒྲུབ་པའི་མཆོད་པ་མེད་པའི་རྗེས། །
བསྟན་པ་བཤིག་པའི་ལས་ངན་ཅན། །
ཟང་ཟིང་གཡོ་བའི་མི་སྲུན་ལ། །
སྐུ་རྫུ་འཕྲུལ་མིག་ལ་བསྟན་མཛད་ནས། །
སླར་ད་རུང་རྗེས་སུ་འཛིན་པ་ཡི། །
ཐུགས་རྗེ་མཐའ་མེད་མཐོང་བའི་དུས། །
བདག་བ་ལང་ལས་ཀྱང་བླུན་པ་ལ། །
མི་བཟོད་མོས་པ་གཏིང་ནས་སྐྱེས༑ །
ཨ་མ་ལ་སྐྱེས་ནས་ད་ལྟའི་བར། །
ལས་བྱས་པ་དོན་ལྡན་འདི་ལས་མེད། །
འདི་བསྒྲུབས་ནས་བྱུང་བ་མ་ཡིན་ཏེ། །
སངས་རྒྱས་ཀྱི་ཕྲིན་ལས་ཟབ་མོ་དེ། །
བདག་ཚུར་མཐོང་གི་སྤྱོད་ཡུལ་མ་ཡིན་པས། །
བློ་འདས་ཀྱི་རྫུ་འཕྲུལ་ཡིན་པར་གོ །
ངེས་ཤེས་ཞིག་དེ་རུ་སྐྱེས་འདུག་གོ །
གསོལ་བ་ཞིག་བཏབ་ན་དེ་གས་ཆོག །
ཐེབས་རྒྱུ་ཡོད་ངེས་ཀྱི་རྗེ་བཙུན་རེད། །
རྗེ་ཁྱེད་ཀྱི་བསྟན་པ་རྣམ་དག་གི །
ཁུར་ཐེག་པའི་ནུས་པ་ཡོད་མིན་ཡང་། །
རྗེ་ཁྱེད་ལ་ཕྱོགས་མོས་ཙམ་བྱས་ནས། །
མགོ་གཏད་ས་མ་ལོག་ཙམ་བྱུང་བ་ནས། །
བྱས་པ་དོན་ལྡན་ལ་ངོ་སྤྲད་ཐོབ༑ །
ངོ་སྤྲོད་དེ་རྗེ་བཙུན་བླ་མ་ལ་འབུལ། །
བཀའ་དྲིན་ལ་ནམ་མཁའི་མཐའ་དང་མཉམ། །
ཞེས་གསོལ་བ་བཏབ་པའོ། །
བཀའ་བརྒྱུད་མགུར་མཚོའི་གོ་དོན་ཁོག་དབུབས་སྤྱི་ཆིངས་རྣམ་པར་བཤད་པ་སྐལ་བཟང་ཡིད་ཀྱི་ངལ་གསོ་ཞེས་བྱ་བ་བཞུགས་སོ།
ཀརྨ་ལེགས་བཤད་གླིང་བཤད་གྲྭ།
པར་དབང་ཁོངས་གཏོགས་ས་ནི་རྩོམ་པ་པོ་དྲ་བ།བརྒྱུད་སྤེལ་བྱེད་དུས་ངེས་པར་དུ་དྲ་ཐག་སོར་བཞག་བྱ་དགོས།
རྩོམ་ཡིག་གི་སྦྲེལ་ཐགhttps://www.tbwriters.com/?p=4473
དཔྱད་མཆན་སྤེལ།