《གེ་སར།》
གཞས་ཚིག བཀྲ་ཤིས་སེང་གེ
དབྱངས་རྟ། བེ་རི་རང་གྲོལ།
ལེན་མཁན། བེ་རི་རང་གྲོལ།
༡
གེ་སར་ལགས་མི་ཡི་ཉི་མ།
ཡབ་མེས་ཀྱི་ཆོས་སྐྱོང་།
སྟག་ཤར་གྱི་དགྲ་ལྷ།
མི་རིགས་ཀྱི་དཔའ་རྒོད་ཁྱེད་ཡིན།
གེ་སར་རྒྱལ་པོ། མགོ་ནག་མི་ཡི་མཛེས་རྒྱན།
བཙན་པོ་གཉའ་ནས་གནོན་པའི་གནོན་རོགས།
དཔའ་མཛངས་རྟུལ་ཕོད།
བདེན་པའི་རྒྱབ་ལངས་སེང་ཆེན་ཁྱེད་ཡིན།
ཀི་བསྭོ་བསྭོ། ཕོ་ལྷ་བསྭོ། དགྲ་ལྷ་བསྭོ།
ལམ་འགྲོ་ཡི་ལམ་ལྷ།
གཞིས་འདུག་གི་རྒྱབ་རྟེན་མཛད་རོགས།
༢
“ཀི་བསྭོ་བསྭོ་བསྭོ།
ཤར་གྱི་རྨ་རྒྱལ་སྤོམ་ར་བསྭོ།
ལྷོ་ཡི་ཁ་བ་དཀར་པོ་བསྭོ།
ནུབ་ཀྱི་གངས་དཀར་ཏི་སེ་བསྭོ།
བྱང་གི་གཉན་ཆེན་ཐང་ལྷ་བསྭོ།
འཛམ་གླིང་གེ་སར་རྒྱལ་པོ་བསྭོ།
གླིང་གི་དཔའ་བརྟུལ་སུམ་ཅུ་བསྭོ།
ཡང་ཐུལ་དམ་པ་མི་བདུན་བསྭོ།
ཞེ་ཐུལ་ཁྲ་གླག་སྤྱང་གསུམ་བསྭོ།
བསྭོ་བསྭོ་བསྭོ། ཕོ་ལྷ་བསྭོ། དགྲ་ལྷ་བསྭོ།
ལས་ལྷ་བསྭོ། ལུས་ལྷ་བསྭོ།
བུ་ལ་དཔའ་རྩལ་བྱིན། རྟ་ལ་བང་ཁ་སྩོལ།
ས་གར་སོང་ལ་བཀྲ་ཤིས།
ཡུལ་གར་བསྡད་ལ་དོན་འགྲུབ།
ཅི་བསམ་གྱི་བསམ་དོན་འགྲུབ་པར་ཤོག”
༣
སེང་ཆེན་ལགས་ལྷ་ཡི་སྲས་པོ།
འགྲོ་དྲུག་གི་དེད་དཔོན།
སྟག་ཤར་གྱི་ཕོ་ལྷ།
གདོང་དམར་བའི་གཙུག་ནོར་ཁྱེད་ཡིན།
གེ་སར་རྒྱལ་པོ། འགྲོ་བ་མི་ཡི་མི་གཡང་།
ཉམ་ཆུང་མཐའ་ནས་སྐྱོར་བའི་སྐྱོར་རོགས།
སེམས་ཀྱི་ལྷ་མཆོག
ཡིད་ཀྱི་སྐྱབས་གནས་སེང་ཆེན་ཁྱེད་ཡིན།
ཀི་བསྭོ་བསྭོ། ཕོ་ལྷ་བསྭོ། དགྲ་ལྷ་བསྭོ།
ལམ་འགྲོ་ཡི་ལམ་ལྷ།
གཞིས་འདུག་གི་རྒྱབ་རྟེན་མཛད་རོགས།
《དྲིན་ཆེན་མ།》
གཞས་ཚིག བཀྲ་ཤིས་སེང་གེ
གཞས་གདངས། གཉོས་སྐར་བསྟན།
ལེན་མཁན། ཧོར་གཙང་ལྷ་ལུང་མཚོ།
རོལ་མོ། གྲི་བ་ཚེ་རིང་། ལོ་ཙྭ། རྡོ་གྲགས།
༡
རྩི་མེ་ཏོག་བཀྲམ་པའི་སྤང་ཁུགས་ནས།།
ནང་བུ་རྒྱུད་ནུ་ཞོའི་བཅུད་ཀྱིས་གསོས།།
སྐུ་བཀའ་དྲིན་རྒྱ་མཚོའི་ཟབ་ཚད་ཅན།།
དྲིན་ཨ་མ་ཁ་གཙང་ཁོག་གཙང་མ།།
ང་ཆུང་དུས་རེ་ས་སྐྱབས་ས་ཡིན།།
༢
འབྲོག་སྦྲ་ནག་ཚང་གི་གཞིས་ཀ་ནས།།
ཁྱིམ་མི་ནོར་བྱམས་བརྩེའི་དྲོད་ཀྱིས་བསྐྱངས།།
རྒྱུད་ལྷག་བསམ་ནམ་མཁའི་ཁ་ཞེང་ཅན།།
དྲིན་ཨ་མ་ཁ་འཇམ་གཤིས་འཇམ་མ།།
ང་གཞོན་དུས་འཁྲི་ས་རྟེན་ས་ཡིན།།
༣
རོང་ཞིང་ཚིགས་གྲུ་བཞིའི་གཡས་ཟུར་ནས།།
གཞིས་ཕ་ཁྱིམ་འབྲུ་རིགས་ནོར་གྱིས་བཀང་།།
ངག་ཚིག་གསུམ་ཚངས་པའི་གསུང་སྙན་ཅན།།
དྲིན་ཨ་མ་ཁ་བཟང་ཚིག་བཟང་མ།།
ང་ཆེ་དུས་གཅེས་ས་བྱམས་ས་ཡིན།།
༤
བཟའ་གོ་འདུས་བྱུང་བའི་གྲལ་དཀྱིལ་ན།།
གདོང་མ་བཅོས་འཛུམ་དཀར་ལྷོད་ཀྱིས་གྲོལ།།
སེམས་བསམ་པ་འོ་མའི་ཁ་མདོག་ཅན།།
དྲིན་ཨ་མ་ཁ་དཀར་སེམས་དཀར་མ།།
ང་ནམ་ཡང་བརྩེ་ས་དུངས་ས་ཡིན།།
《ཨ་རུང་ཇོ་རུའི་རིག་གནས་གླིང་།》
གཞས་ཚིག བཀྲ་ཤིས་སེང་གེ
དབྱངས་རྟ། རྫོགས་ཆེན་བསྟན་འཛིན།
ལེན་མཁན། རྫོགས་ཆེན་བསྟན་འཛིན།
༡
གྲགས་སྙན་གྱིས་ས་ཆེན་སྒུལ་བའི་ཕོ་རྒོད།
གླིང་དཀར་གྱི་ལྷ་སྲས་ཇོ་རུ།
གང་གི་ཟླ་མེད་དཔའ་བོའི་མཛད་རྗེས།
རང་རིགས་ཀྱི་རྒྱན་དུ་བཞུགས་ཚུལ་བསམ་ནས།
ཡི་རང་སེམས་ལ་འཁྲུངས་ན།
ཨ་རུང་ཇོ་རུའི་རིག་གནས་གླིང་འདིར་ཕེབས་རོགས།
གནའ་རབས་ཀྱི་ལོ་རྒྱུས་ཡོད། ཡབ་མེས་ཀྱི་རྗེས་ཤུལ་ཡོད།
འདི་ནི་མི་རིགས་ཀྱི་གཟི་བརྗིད་ལོས་ཡིན།
གཅེས་ཤིང་སྐྱོང་དགོས། དར་ཞིང་རྒྱས་དགོས།
༢
སེང་ཆེན་གྱི་བདེན་སྐྱོང་དམག་གི་དཔུང་ཚོགས།
གླིང་དཀར་གྱི་དཔའ་རྟུལ་སུམ་ཅུ།
གང་གི་རླབས་ཆེན་ཕན་བདེའི་མཛད་བཟང་།
སྐྱེ་དགུ་ཡི་གསོས་སུ་སྨིན་ཚུལ་བསམ་ནས།
དད་འདུན་ཡིད་ལ་འཁོར་ན།
ཨ་རུང་ཇོ་རུའི་རིག་གནས་གླིང་འདིར་ཕེབས་རོགས།
གནའ་རབས་ཀྱི་ལོ་རྒྱུས་ཡོད། ཡབ་མེས་ཀྱི་རྗེས་ཤུལ་ཡོད།
འདི་ནི་མི་རིགས་ཀྱི་གཟི་བརྗིད་ལོས་ཡིན།
གཅེས་ཤིང་སྐྱོང་དགོས། དར་ཞིང་རྒྱས་དགོས།
《མི་ལ་རས་པ།》
གཞས་ཚིག བཀྲ་ཤིས་སེང་གེ
དབྱངས་རྟ། གེ་རྒྱལ་པདྨ།
ལེན་མཁན། གངས་ཆེན་མཚོ།
༡
གསུང་རྡོ་རྗེའི་མགུར་མ་གླུ་རུ་ལེན་པའི།
གུང་ཐང་གི་མགུར་པ། མི་ལ་རས་པ།
འགྲོ་དྲུག་ཐུགས་ལ་བཅངས་བའི་སེམས་དཔའ།
འདི་ཕྱི་བདེ་ལ་འདྲེན་པའི་དེད་དཔོན།
ཞལ་ཙམ་མཐོང་བའི་མི་ལ།
ཐར་ལམ་གྱི་བར་ཆད་སེལ་ཡོད།
གསུང་ཙམ་ཐོས་པའི་མི་ལ།
འཁོར་བ་ཡི་ཞེན་ཐག་བཅད་ཡོད།
མཁྱེན་ནོ།། མཁྱེན་ནོ།།
མཐོང་གྲོལ་དང་ཐོས་གྲོལ།
རྗེ་མི་ལ་བཞད་པ་རྡོ་རྗེ་མཁྱེན་ནོ།།
༢
ཐུགས་ཞི་བའི་ཏིང་འཛིན་ཟས་སུ་རོལ་བའི།
རྣལ་འབྱོར་གྱི་དབང་ཕྱུག མི་ལ་རས་པ།
ཆོས་དྲུག་བདུད་རྩིས་གསོས་པའི་བླ་མ།
རིམ་གཉིས་རྟོགས་པ་རྫོགས་པའི་སྒོམ་ཆེན།
ཡུད་ཙམ་དྲན་པའི་མི་ལ།
བྱིན་རླབས་ཀྱི་ཚན་ཁ་བབས་ཡོད།
སྐད་ཅིག་འཕྲད་པའི་མི་ལ།
དངོས་གྲུབ་ཀྱི་གྲུ་ཆར་བསྙིལ་ཡོད།
མཁྱེན་ནོ།། མཁྱེན་ནོ།།
དྲན་གྲོལ་དང་རིག་གྲོལ།
རྗེ་མི་ལ་བཞད་པ་རྡོ་རྗེ་མཁྱེན་ནོ།།
《འཁྲུངས་སྐར་བསུ་གླུ།》
གཞས་ཚིག བཀྲ་ཤིས་སེང་གེ
དཀྲོལ་ལེན་པ། དཔལ་ལྡན་ཚུལ་ཁྲིམས།
༡
རྒྱལ་ཀུན་སྙིང་རྗེའི་རང་གཟུགས་སྤྱན་རས་གཟིགས།།
མཚན་ལྡན་དགེ་བའི་བཤེས་ཀྱི་ཚུལ་འཆང་བ།།
བཀའ་བརྒྱུད་བསྟན་པའི་མངའ་བདག་ཀརྨ་པ།།
ཨོ་རྒྱན་འཕྲིན་ལས་རྡོ་རྗེའི་འཁྲུངས་སྐར་བསུ།།
༢
གངས་ཅན་ལྗོངས་སུ་སྐུ་ཡི་མཚན་དཔེ་བཞད།།
འཕགས་པའི་ཡུལ་དུ་ཐུགས་ཀྱི་མཁྱེན་རབ་རྒྱས།།
མཛད་འཕྲིན་ས་སྟེང་མ་ལུས་ཁྱབ་པའི་མགོན།།
དུས་ཀྱི་སྟོན་པ་གཉིས་པའི་འཁྲུངས་སྐར་བསུ།།
༣
མཁས་པའི་བྱ་བ་བསྟན་འགྲོའི་གསོས་སུ་སྨིན།།
བཙུན་པའི་སྡོམ་གསུམ་ཁྲིམས་ཀྱི་རྩ་བ་བརྟན།།
བཟང་པོའི་ཡོན་ཏན་མཛོད་འཛིན་ཀརྨ་པའི།།
སྐུ་ཡི་འཁྲུངས་སྐར་སྙན་མོ་གླུ་ཡིས་བསུ།།
༤
ལྷག་བསམ་གཙང་མས་ཁོར་ཡུག་སྲུང་སྐྱོབ་དང་།།
བརྩེ་ཆེན་དཀར་སྐྱོང་གོ་ལའི་ཁྱོན་སྤེལ་བའི།།
བྱམས་དང་བརྩེ་བའི་བདག་ཉིད་ཀརྨ་པ།།
ཨོ་རྒྱན་འཕྲིན་ལས་རྡོ་རྗེ་ཞབས་བརྟན་གསོལ།།
《མི་རྗེ་སྲོང་བཙན།》
གཞས་ཚིག བཀྲ་ཤིས་སེང་གེ
དབྱངས་རྟ། བེ་རི་རང་གྲོལ།
ལེན་མཁན། ཐར་པ་རྒྱལ།
༡
མི་རྗེ་ཡ། མི་རྗེ། སྲོང་བཙན་སྒམ་པོ།
སུམ་གཉིས་འཁོར་ལོས་བསྒྱུར་བའི་རྒྱལ་པོ།
མཐའ་བཞིའི་སྡང་དགྲ་འདུལ་བའི་དཔའ་རྒོད།
སྐུ་ཉིད་ཀྱི་དཔའ་རྩལ་བོད་ལ་དབང་དུས།
བུ་དཔའ་བོའི་ཀི་སྒྲ་བྲག་ལས་མཆེད་མྱོང་།
སྐུ་ཉིད་ཀྱི་ཚེ་བསོད་ལྗོངས་འདིར་གནས་དུས།
རྟ་འདོ་བའི་བང་རྩལ་རླུང་ལ་འདྲེས་མྱོང་།
ཨོ་་་་ཧོ་ཧོ་ཧོ། ཡབ་མེས་སྲོང་བཙན།
ཁྱེད་ནི་བཙན་པོ་མི་རྒོད་ཀྱི་གཉའ་གནོན།
ཉམ་ཆུང་ནུས་མེད་ཀྱི་མགོན་སྐྱབས།
དཔའ་མཛངས་བཟང་གསུམ་གྱི་བདག་པོ་དེ་ཡིན།
༢
བོད་རྒྱལ་ཡ། བོད་རྒྱལ། སྲོང་བཙན་སྒམ་པོ།
གངས་རིའི་བླ་སྲོག་སྐྱོང་བའི་དེད་དཔོན།
ལུགས་གཉིས་དགའ་སྟོན་བསུ་བའི་ཕོ་ཉ།
སྐུ་ཉིད་ཀྱི་ཐུགས་སྟོབས་བོད་ལ་དབང་དུས།
བོད་ཁ་བའི་དབུ་འཕང་དགུང་དང་མཉམ་མྱོང་།
སྐུ་ཉིད་ཀྱི་འཕྲིན་ལས་ལྗོངས་འདིར་གནས་དུས།
ཡུལ་གངས་ལྗོངས་སྡེ་བཞི་གཡང་གིས་ཕྱུག་མྱོང་།
ཨོ་་་་ཧོ་ཧོ་ཧོ། ཡབ་མེས་སྲོང་བཙན།
ཁྱེད་ནི་སྤུ་རྒྱལ་གདུང་རབས་ཀྱི་ཡང་རྩེ།
ཆེན་པོ་གདོང་དམར་བའི་གཙུག་རྒྱན།
སྲིད་འབྱོར་རིག་གསུམ་གྱི་བདག་པོ་དེ་ཡིན།
《དགེ་སློབ་ཀྱི་སྙིང་གཏམ།》
གཞས་ཚིག བཀྲ་ཤིས་སེང་གེ
དབྱངས་རྟ། རོང་མོ་ཕུར་བུ་ཚེ་རིང་།
གཞས་པ། གཅོད་པ། རོང་མོ་ཕུར་བུ་ཚེ་རིང་།
༡
འཇིག་རྟེན་མི་ཡུལ་རིག་པའི་ཞིང་རེད།།
རིག་གནས་ཡོན་ཏན་མི་ཚེའི་རྒྱན་ཡིན།།
མི་ལུས་རིན་ཆེན་ལན་གཅིག་ལོན་པ།།
དོན་གོ་ཡོད་དགོས། རིན་ཐང་ལྡན་དགོས།
མི་ཚེ་དོན་མེད་འཕྲོ་བརླག་མ་གནང་།།
བུ་ལ་སྙིང་སྟོབས་ཡོད་ན།།
མི་འགྲུབ་བྱ་བ་མི་འདུག།
རིག་པའི་གཤོག་རྩལ་ངོམ་བཞིན།།
ཤེས་བྱའི་ནམ་འཕང་གཅོད་དགོས།།
༢
དྲིན་ཆེན་དགེ་རྒན་མི་ཡི་མགོན་རེད།།
སློབ་གསོའི་གདམས་ངག་སྙིང་གི་གཏམ་ཡིན།།
བརྩེ་བའི་བསླབ་བྱ་གླུ་རུ་བླངས་པ།།
སེམས་ལ་བཟུང་ཡོད། ཡིད་ལ་འཆང་ཡོད།
ནམ་ཡང་སེམས་ནས་བརྗེད་པ་མི་སྲིད།།
གསོན་པའི་རེ་བ་བཅང་ནས།།
ལང་བའི་སྙིང་སྟོབས་བསྐྱེད་ཡོད།།
མ་འོངས་མི་ཚེའི་ཁ་ཕྱོགས།།
ལམ་སྟོན་ཁྱེད་ཀྱིས་གནང་རོགས།།
༣
སྐད་དང་ཡི་གེ་རིགས་ཀྱི་སྲོག་རེད།།
ཡ་རབས་གོམས་གཤིས་རུས་ཀྱི་རྐང་ཡིན།།
རང་ཅག་གདོང་དམར་བོད་ཀྱི་རྒྱུད་པ།།
ངང་རྒྱུད་བཟང་དགོས། ཕྱི་ཐག་རིང་དགོས།
མེས་པོ་གོང་མའི་ཤུལ་ལམ་མ་སྣོགས།།
གནའ་དེང་རིག་པའི་སྙིང་བཅུད།།
སྦྱང་དང་བརྩོན་པས་ལོངས་དང་།།
ཉེར་གཅིག་དུས་རབས་གསར་པའི།།
མདུན་ལམ་འཚོལ་སྟངས་དེ་ཡིན།།
《འབོད་གླུ།》
གཞས་ཚིག བཀྲ་ཤིས་སེང་གེ
དབྱངས་རྟ། གླིང་རྒྱལ་འཚི་མེད་ཚེ་རིང་།
ལེན་མཁན། ངག་དབང་བསྟན་འཛིན།
༡
རི་བོ་མཐོན་པོ་ཞིག་ལ་གཡས་སྐོར་རྒྱག་ཞོར།
གནམ་སའི་འདྲེས་མཚམས་བར་གྱི་རི་སྒང་ཞིག་ནས།
བཀྲ་ཤིས་དང་ཁ་གཡང་འབོད་བཞིན།
ཤིང་ལྷ་ཤིང་ཤུག་པའི་བསང་དཀར་དགུང་ལ་གཏོང་ཡོད།
ཀི་རྒྱལ་ལོ་རྒྱལ་ལོ་ལྷ་རྒྱལ་ལོ།
སེང་ཆེན་ནོར་བུ་དགྲ་འདུལ་རྒྱལ།
ཀི་གསོལ་ལོ་གསོལ་ལོ་ལྷ་གསོལ་ལོ།
ཕོ་ལྷ་བསྭོ། དགྲ་ལྷ་བསྭོ།
ལྷ་ཆོས་སྐྱོང་སྲུང་མས་དཔུང་གྲོགས་བྱོས།
ཚེ་བསོད་ནམས་རྒྱས་པའི་འཕྲིན་ལས་མཛོད།
༢
དར་དཀར་རླུང་གིས་སྐྱོད་འདྲའི་གངས་རིའི་རྒྱུད་ཀྱི།
ས་ཆེན་མཁའ་རུ་འཕགས་པའི་རི་སྒང་ཞིག་ནས།
ཀི་ཀི་དང་བསྭོ་བསྭོ་སྒྲོག་བཞིན།
ལས་དབང་ཐང་དར་བའི་རླུང་རྟ་ཡར་ལ་མཆོད་ཡོད།
ཀི་རྒྱལ་ལོ་རྒྱལ་ལོ་ལྷ་རྒྱལ་ལོ།
དགྲ་ལྷ་ཝེར་མ་བཅུ་གསུམ་རྒྱལ།
ཀི་གསོལ་ལོ་གསོལ་ལོ་ལྷ་གསོལ་ལོ།
ཕོ་ལྷ་བསྭོ། དགྲ་ལྷ་བསྭོ།
བུ་དཔའ་བོའི་དཔུང་གི་སྐྱོར་ཡ་བྱོས།
ལས་རླུང་རྟ་དར་བའི་སྡོང་གྲོགས་མཛོད།
《ཕོ་རང་ཚོད་ཟིན་དགོས།》
གཞས་ཚིག བཀྲ་ཤིས་སེང་གེ
དབྱངས་རྟ། བེ་རི་རང་གྲོལ།
གཞས་པ། ཤེས་རབ་ཉི་མ།
༡
སྐྱིད་སླེབ་ན་མགོ་འཕང་མ་མཐོ།།
སྡུག་ཐོན་ན་མིག་ཆུ་མ་གཏོང་།།
ལས་སྐྱིད་སྡུག་ཅི་ཞིག་བྱུང་རུང་།།
སྐྱེས་ཕོ་རབ་ཁོག་རྒྱ་ཡངས་དགོས།།
སྐྱིད་ན་མགོ་འཕང་མཐོ་བ།
སྡུག་ན་མིག་ཆུ་མང་བ།
མི་ཅོལ་ཆུང་ཞིག་གི་གཤིས་ཀ་རེད།
ཕོ་རང་ཚོད་ཟིན་དགོས་ཤ་ཉེ་ཚོ།
༢
ཡར་དར་དུས་རང་སྣང་མ་མཐོ།།
མར་རྒུད་དུས་བློ་སྟོབས་མ་ཞུམ།།
ལས་རླུང་རྟ་དར་རུང་རྒུད་རུང་།།
སྟག་ཤ་རའི་ཚུགས་ཀ་ཡོད་དགོས།།
དར་དུས་རང་སྣང་མཐོ་བ།
རྒུད་དུས་བློ་སྟོབས་ཞན་པ།
མི་ཐ་ཤལ་ཞིག་གི་རང་སྲོལ་རེད།
ཕོ་རང་ཚོད་ཟིན་དགོས་ཤ་ཉེ་ཚོ།
༣
སྐྱེས་ཕོ་རབ་སྐྱིད་ཤོང་སྡུག་ཤོང་།།
བློ་ཁོག་རྒྱ་མཁའ་ལས་ཡངས་བ།།
རྒྱུ་དབང་ཆ་ཐོབ་རུང་ཤོར་རུང་།།
སེམས་དགའ་སྡུག་རི་ལས་བརྟན་དགོས།།
འཕྲད་ན་ངོ་ཤེས་མྱུར་བ།
འགྲོགས་ན་ཨ་གསར་ཆེ་བ།
མི་མ་རབས་ཤིག་གི་གཤིས་ལུགས་རེད།
ཕོ་རང་ཚོད་ཟིན་དགོས་ཤ་ཉེ་ཚོ།
《ལོ་སར་སྨོན་གླུ།》
གཞས་ཚིག བཀྲ་ཤིས་སེང་གེ
དབྱངས་རྟ། གཅོད་པ།
ལེན་མཁན། འབྲུག་མོ་མཚོ།
༡
བཀྲ་ཤིས་གནམ་ལོ་གསར་ཚེས་ལ།
དོན་འགྲུབ་གཡང་གི་འབོད་པ་སྒྲོག
ཆོལ་གསུམ་བོད་ལ་ཕུལ་བའི་ཁ་གཡང་འདིས།
གཞིས་བྱེས་མཉམ་འཛོམ་ཡོང་བའི་སྨོན་ལམ་འདེབས།
དྲུག་འགྱུར་སྙན་མོའི་གླུ་ཆུང་ང་ཡིས་ལེན།
སྟངས་སྟབས་བདེ་མོའི་བྲོ་གར་ཁྱོད་ཀྱིས་འཁྲབ།
འུ་ཚོ་ཁ་བ་ཅན་ལ་འཛོམ་པའི་དུས།
གླུ་དང་གར་གྱི་མཆོད་པ་ང་ཡིས་འབུལ།
གླུ་དང་གར་གྱི་མཆོད་པ་ང་ཡིས་འབུལ།
༢
ཉིན་བཟང་སྐར་བཟང་དུས་བཟང་ལ།
རྟེན་འབྲེལ་གླུ་ཡི་མཆོད་པ་འབུལ།
རིགས་མཐུན་གྲོགས་ལ་ཕུལ་བའི་གླུ་ཆུང་འདིས།
གྲོགས་ཀྱི་ཕྱི་ཐག་བརྟན་པའི་སྨོན་ལམ་འདེབས།
དྲུག་འགྱུར་སྙན་མོའི་གླུ་ཆུང་ང་ཡིས་ལེན།
སྟངས་སྟབས་བདེ་མོའི་བྲོ་གར་ཁྱོད་ཀྱིས་འཁྲབ།
འུ་ཚོ་ཕ་ཡུལ་གཅིག་ལ་འཛོམ་པའི་དུས།
གླུ་དང་གར་གྱི་མཆོད་པ་ང་ཡིས་འབུལ།
གླུ་དང་གར་གྱི་མཆོད་པ་ང་ཡིས་འབུལ།
༣
དགའ་བའི་དགོད་སྒྲ་ལྷངས་སེ་ལྷང་།
དུང་བའི་འཛུམ་མདངས་ཤིགས་སེ་ཤིག
དགའ་འཛུམ་དགོད་སྒྲས་ཁེངས་པའི་ལོ་གསར་ལ།
ཁྱིམ་ཚང་འཆམ་མཐུན་ཡོང་བའི་སྨོན་ལམ་འདེབས།
དྲུག་འགྱུར་སྙན་མོའི་གླུ་ཆུང་ང་ཡིས་ལེན།
སྟངས་སྟབས་བདེ་མོའི་བྲོ་གར་ཁྱོད་ཀྱིས་འཁྲབ།
འུ་ཚོ་ཁྱིམ་ཚང་གཅིག་ལ་འཛོམ་པའི་དུས།
གླུ་དང་གར་གྱི་མཆོད་པ་ང་ཡིས་འབུལ།
གླུ་དང་གར་གྱི་མཆོད་པ་ང་ཡིས་འབུལ།
པར་དབང་ཁོངས་གཏོགས་ས་ནི་རྩོམ་པ་པོ་དྲ་བ།བརྒྱུད་སྤེལ་བྱེད་དུས་ངེས་པར་དུ་དྲ་ཐག་སོར་བཞག་བྱ་དགོས།
རྩོམ་ཡིག་གི་སྦྲེལ་ཐགhttps://www.tbwriters.com/?p=4342
དཔྱད་མཆན་སྤེལ།