ཕ་ཡུལ། ལྷུག་རྩོམ། གདོན་མིག
ཀློག་གྲངས། 3,602      སྤེལ་དུས།2023 ལོའི་ཟླ 11 ཚེས 17 ཉིན།

      ངའི་ཕྱིར་འདང་གི་མེ་ལོང་ངོས་སུ། ནམ་ཡང་གཟུགས་བརྙན་བཞིན་བསུབ་པར་དཀའ་བ་ཞིག་ཡོད་པ་ནི་རང་ཉིད་ཀྱི་བྱིས་དུས་རེད། མི་ཞིག་ལ་བྱིས་དུས་ཡིད་དུ་འོངས་པ་ཞིག་ཡོད་པར་གྱུར་ན་ནི། མི་དེར་ཚེ་འདིའི་འཁྲི་ཤིང་ལྟ་བུའི་ཕ་ཡུལ་ཡོད་པ་ཡིན། དེ་བས། ངའི་བྱིས་དུས་ནི་ངའི་ཕ་ཡུལ་ཡིན།

      ནར་སོན་པ་དང་བསྟུན་ནས་འཚོ་བར་འགྱུར་ལྡོག་བྱུང་ལ། བསམ་ཚུལ་དང་གཟུགས་གཞི་ལའང་འགྱུར་ལྡོག་སྣ་ཚོགས་ཤིག་བྱུང་དང་འབྱུང་བཞིན་ཡོད། ཡིན་ནའང་། བྱིས་དུས་ཀྱི་ཕ་ཡུལ་ནི་ཡིད་ཀྱི་འཇིག་རྟེན་དུ་ནམ་ཡང་རྟག་བརྟན་ཐེར་ཟུག་ཏུ་གནས་ཡོད་པས། ང་རང་ཕྱིར་བྱིས་དུས་ཀྱི་ཕ་ཡུལ་དུ་ལོག་ཐུབ་ན་སྙམ་ཞིང་། བྱིས་དུས་ཀྱི་དགོད་སྒྲ་བྲག་ཅར་འཁོར་བའི་རི་ཐང་དེར་ལན་གཅིག་ལོག་ཐུབ་ནའང་སྙམ་བྱུང་།

        ང་རང་གྲང་ངར་ཧ་ཅང་ཆེ་བའི་དགུན་ཁ་ཞིག་ལ། བྱང་སྐར་སྨེ་བདུན་ལ་བལྟས་ཏེ་རུ་བ་སྤོ་བའི་འབྲོག་ཁྱིམ་ཞིག་ཏུ་སྐྱེས། འབྲོག་ཁྱིམ་དེ་ནི་མཚོ་སྔོན་པོའི་ལྷོ་རྒྱུད་ཀྱི་འབྲོག་ཁྱིམ་ཞིག་ཡིན། འབྲོག་ཁྱིམ་དེ་ནས་ནར་སོན་པའི་ལོ་ཟླ་ལ་ཕྱིར་མིག་ཅིག་བལྟས་ཚེ། དེ་ནི་འཇིག་རྟེན་འདི་ནས་འཇིག་རྟེན་གཞན་ཞིག་ལ་ལྟ་བ་དང་མཚུངས། བཞུད་པའི་ལོ་ཟླ་དེ་དག་གི་ནང་དུ། ང་ཡིས་ཁ་བ་བུ་ཡུག་གིས་བཀླུབས་པའི་རི་བརྒྱ་ཀླུང་བརྒྱར་རྟག་པར་འགྲུལ་བཞུད་བྱེད་མྱོང་ལ། མེ་ཏོག་གིས་ཡོངས་སུ་ཁེབས་པའི་ན་ཐང་ནས་རྫི་གླུ་དབྱངས་སུ་འགུག་མྱོང་། ཡང་ན། དཔྱིད་གསུམ་ཁ་ཆར་ཁྲོད་དུ་སྨུག་སྤྲིན་གྱི་རྒྱ་མཚོ་བརྒལ་མྱོང་། ད་ལྟ་བསམ་ན། དེ་ནི་རྨི་ལམ་ཞིག་ལས་ཅི་ཞིག་ཨང་།

        དེ་དུས། ཕ་ཡུལ་གྱི་མི་སུ་ཞིག་ཡིན་ནའང་། རྒྱབ་རི་དང་གནས་རི། བླ་རི་ཡོད། རི་གནས་པ་ཅན་དེ་དག་གི་རྩེ་ནས་དར་ལྕོག་འཐེན་ཞིང་རླུང་རྟ་བསྐྱོད། ལྷ་བསང་གཏོང་ལ་ལྷ་རྒྱལ་འཐེན། ས་བདག་གནས་བདག་གི་ངོ་སོ་དགོང་ལ་བསྟོད། དེ་དུས། ཉག་ག་ཁིས་ཁར་བུད་ན་ཀྭི་བསོ་དིར་དིར་སྒྲོག རྟ་ཞོན། གཡག་འདེད། བྱ་ཐམས་ཅད་ལྷ་བྱ་རུ་ངོས་འཛིན། སྦྲུལ་དང་ཉ་ལ་ཀླུ་ཞེས་གནོད་མི་བྱ། དེ་དུས། མགྲོན་པོར་རྩིས་ཆེ་ལ་སོང་བ་སླར་ལོག་པའི་ཁ་གཡང་འབོད། དེ་དུས། འབྲི་ཐུལ་མ་གཅིག་གིས་བཟའ་དགུ་སོས། ཁྱི་རྒྱ་ལུ་གཅིག་གིས་དགྲ་མགོ་ཁེབས།

         དེ་མིན། བྱིས་པ་སུ་ཞིག་ཡིན་ནའང་རྩེད་རོགས་ཡིན། རྩེད་རོགས་ལྷ་ཡིན་ཟེར། མི་ཚོ་སྐོར་སྐོར་བྱས་ལྷ་ས་ལ་རྐང་ཐང་དུ་འགྲོ  དེར་དབུས་རོགས་ཞེས་ནམ་ཡང་ཕ་བཞིན་བཀུར། དེ་དུས། རྡོ་ཁང་དང་ས་ཁང་མེད། མགོ་སྦྲ་མཐིང་སྨུག་གཡུ་སྦྲ་ཡིན། སྦྲ་ནི་འབྲོག་པའི་རིག་གནས་ཀྱི་རྟེན་གཞི་ཡིན་ལ། འབྲོག་པའི་ཤེས་རབ་མཚོན་བྱེད་ལའང་སྦྲ་ལས་གཞན་འཇོག་ཏུ་མེད། སྦྲ་ནི་སྒོ་ཕྱུགས་ནོར་གནག་གི་ཁུལ་རྩིད་བཏགས་པའི་ཐགས་ཏེ་རེ་ལྡེ་ཡིས་བཟོས་པ་ཡིན། སྦྲ་ཀླད་པདྨ་འདབས་བརྒྱད་དང་སྦྲ་ཁྱིམ་བསོད་ནམས་ཀ་བཞིར་སྨྲ། གང་ལྟར། ང་ནི་སྨྲ་ནག་ཏུ་ནར་སོན་པའི་མི་རབས་ཐ་མ་ཡིན་པ་འདྲ་སྟེ། ངའི་རྗེས་ཀྱི་བྱིས་པ་ཚོས་ཁང་ལེབ་ལས་སྦྲ་ནག་མཐོང་མྱོང་མེད་པས། སྦྲ་ནག་སྐོར་གྱི་ཐ་སྙད་ཕོན་ཆེ་བ་དག་ཀྱང་མི་ཤེས། སྦྲ་ནི་ཕུབ་སླ་ལ་འཁྱེར་སླ་བས་གཡག་གཅིག་གིས་འཁུར་ནུས། ཡིན་ནའང་། སྦྲའི་སྐོར་གྱི་ཐ་སྙད་ནི་གཡག་ཁལ་གཅིག་གིས་མི་ལོང་བ་ཡོད། དཔེར་ན། ཁ་ཚུབ། ཟུང་བ། ཆ་རུ། ངོ་ཐིག  ཆོན་ཐག  ཐད་རྒྱུགས། ས་འདོགས། ཕུར་བ། ཀ་བ། གདུང་མ། ཇ་ཟུང་། གྲུ་ཐག  གཟར་ལག  སྒོ་ཆོན། ཆ་རུ་སོགས་ཡོད་ཅིང་། ཟུང་བ་ལ་ཕོ་ཟུང་མོ་ཟུང་གཉིས་ཡོད། ཆོན་ཐག་ལ་ཕུག་ཆོན་དང་སྒོ་ཆོན། གྲུ་ཆོན། དཀྱིལ་ཆོན་སོགས་ཡོད། ཀ་བ་ལ་ནང་ཀ་དང་གྲུ་ཀ ཕུག་ཆོན་ཀ་བ། སྒོ་ཆོན་ཀ་བ་སོགས་ཡོད། ཕུག་ཆོན་གྱི་ཀ་བ་སྟག་པ་བྱེད། སྒོ་ཆོན་ཀ་བ་ཤུག་པ་བྱེད་དེ། ནང་དུ་གསེར་གྱི་ཀ་བ་མ་ཆག  ཕྱི་རུ་དངུལ་གྱི་ཆོན་ཆག་མ་ཆད། གུང་ཤིང་གཡུ་ཡི་གདུང་མ་མ་ལྷུང་།མཐའ་བཞིའི་དུང་གི་ཕུར་བ་མ་འབུད་པར། ཕོ་སྦྲ་དང་མོ་སྦྲ་ཡོད་ལ། སྦྲ་ལེབ་དང་རས་ནག  རས་ཁྲ། ཁྲོབ་སྦྲ་སོགས་མང་དུ་སྣང་། དེ་དུས་ང་རང་ལོ་ཆུང་ཡང་། དབྱར་དགུན་སྟོན་དཔྱིད་མེད་པར་རྣ་ལམ་དུ་འཐོར་འོང་བ་ནི་སྦྲ་ནག་གི་ཐ་སྙད་དེ་དག་རེད། ཐ་སྙད་དེ་དག  ད་དུང། དུད་དྲི་ཁྱབ་ལེ་བར་ངའི་བརྩེ་གདུང་གི་དྲན་ཤེས་ངོས་སུ། སྐར་མ་ཨ་བརྟན་བཞིན། སྨིན་དྲུག་ཕྲ་མོ་བཞིན། བྱང་སྐར་སྨེ་བདུན་བཞིན་ཕྲ་ཟིམ་ཟིམ་བྱེད། འོད་ཆེམ་ཆེམ་བྱེད།

        ཟས་གཙོ་བོ་ཤ་མར་རྩམ་གསུམ་ཡིན། རྩམ་པ་ལག་སྐོར་གྱིས་འཐག་པ་ཡིན། ལོ་རྒྱུས་ཡིག་ཚང་དུ་གཆིག་ཀྱང་ཟེར། གཆིག་གམ་ལག་སྐོར་ནི་རྡོ་གོར་མ་ཡིས་བཟོས་པ་སྟེ། ཡ་ཁོད་དང་མ་ཁོད་གཉིས་ཡོད། ཐོག་རྡོ་དང་འོག་རྡོའང་ཟེར། གཉིས་ཀའི་ལྟེ་བར་ཁུང་བ་གཉིས་ཡོད། དེ་གཉིས་ཀ་འཕལ་འཕྲོད་བྱེད་ལྟེ་བ་དང་ལྟེ་ཁུང་ཡིན། ཡ་ཁོད་ལ་དྲལ་བུ་ཞིག་ཡོད། དེ་ཡས་ལྡུག་ས་ཡིན། འདི་འདྲའི་རྡོ་གོར་མ་ཆ་དེ། གངས་ཅན་བོད་ཀྱི་ཁ་ཟས་སྦྲང་དཀར་རྩམ་པ་འཐག་བྱེད་ཡིན་པས། ནམ་ཡང་འབྲལ་དུ་མེད་པའི་དངོས་པོ་དེ་གཅིག་པུ་ཡིན། ངའང་གཆིག་གི་རྩམ་པ་ཟོས་ནས་ནར་སོན་པ་ཡིན། གཆིག་གི་རྩམ་པའི་སྟེང་སྟོན་ཕྱུར་ཁེར་བུ་གང་བཞག སྟོན་མར་རྡོག་ཙམ་འཕངས་ཏེ་ཟོས་ན་གཞན་གྲང་མི་འཇོག  དངོས་གནས་ཞིམ་པོ་ཞེ་དྲག་ཡོད།