ལྷ་ཚོགས་ལ་ཕུལ་བ།

ཨ་ཀྲད། (ཟི་ལིང་།)

.

ཁྱེད་ཞལ་གྱེས་པའི་སྔོན་གྱི་ནམ་མཁའ་ལ།།

སྨྲེང་བ་ཁུར་བའི་སྤྲིན་རྣམས་རིང་དུ་གྱེས།།

བརྩེ་དུང་འཆིང་བའི་སྤྱན་ཟུང་གཉིས་པོའང་།།

ལྷིང་འཇགས་ངང་དུ་དམ་ནས་དམ་པོར་བཙུམ།།

ཁྱེད་སེམས་ཉལ་བའི་མཚན་མོ་རེ་རེ་ལ།།

གཟིམ་ཤག་ནང་དུ་གཤིན་པོའི་གྲིབ་མ་འཆར།།

ངོ་གདོང་སྐམ་པོར་མིག་ཆུ་བཞུར་བར་འཇུག།

བདག་ཡིད་འཕར་ལྡིང་རིམ་ནས་ཆེ་འགྱུར་ན།།

འཆི་བ་ཞེས་པ་ཡུན་རིང་མིན་འགྲོ་བསམ།།

དེ་འཕྲལ་སྐྱོ་ཞིང་སྨིན་ཐག་ཆོད་པ་ཡི།།

རྒྱུ་བའི་ཚོགས་རྣམས་འདུས་བྱས་མིན་ནམ་ཨང་།།

འགེབས་སྲུང་བྱེད་པའི་ལྷ་ཚོགས་འཁོར་དང་ཀྱེ།།

སང་ཞོགས་ཉི་མ་མཐོང་བར་མ་རེ་ཞིག།

འཕྲོག་ནས་བསྐྱབས་པའི་ང་ཚོའི་མི་ཚེའང་།།

འཆི་ངེས་ཡིན་པས་སྟོབས་ཀྱི་གདེང་ཞིག་གིས།།

རླུང་བུ་ལྟར་དུ་གང་ནས་གང་སར་རྒྱུ།།

༢༠༡༨-༡༠-༢༢ཉིན།

.

མཚོ་བྱང་གི་མཆོད་དབྱངས།

.

བསྐལ་པ་འགྲིབ་པའི་ཉི་མ་བླ་བྲང་གི།།

དུས་མཐའི་གྲོང་གི་མཚན་མོའི་མཆོད་དབྱངས་ངོས།།

གཙང་པོས་བཅུས་པའི་བསང་ཆུ་རྫོང་ཁོངས་གང་།།

ཧྥ་རན་སི་ལྟར་ཞི་བའི་རྒྱན་གྱིས་བཙེམས།།

མིག་དང་ཡིད་ངོས་མཛེས་པས་དྲུབ་པ་ཡི།།

གནམ་ས་འདྲེས་མཚམས་སྐྱ་རེངས་བྱོ་བའི་དུས།།

སྤྱི་སྤྱོད་འགྲུལ་འཁོར་གཤོག་འགྱུར་འགྲོས་ཀྱི་ཁུད།།

ལམ་ལ་ཆས་པའི་དཔལ་མོ་ཐང་བརྒྱུད་ནས།།

སྐད་ཅིག་གཅིག་ལ་སྤྲིན་དང་རི་བོ་རྣམས།།

གཅིག་གིས་གཅིག་འདེད་རྒྱབ་ཀྱི་ཕྱོགས་ལ་བཞུར།།

རྫོགས་མཐའ་མེད་པར་རོང་འབྲོག་གཉིས་ཀ་བརྒྱུད།།

ཐུག་མེད་ལྟ་བུའི་ཟི་ལིང་གྲོང་དུ་འབྱོར།།

བོད་གྲོང་ཆེན་མོ་གནའ་མཁར་ཟི་ལིང་གི།

མུན་པ་རུབ་པའི་སྲོད་ཀྱི་ཉི་ནུབ་ངོས།།

ང་དང་ཉེ་སའི་སྒྲོལ་མ་མཚོ་སྒྲོན་སོགས།།

ཐག་ཐག་ཐག་ཞེས་འཁོར་ལྷས་དེ་གར་བབ།།

ལུས་ཀྱི་སྒེགས་ཉམས་གདུང་བའི་གྲང་བས་བཅོམ།།

ངོས་ཀྱི་རི་མོ་ཁེར་རྐྱང་ཁོ་ནས་མནན།།

མགྲོན་བྲང་ཀུན་གྱི་མཚན་སྒོ་ཡང་ཡང་རྡུང་།།

སྟབས་ཐུག་རེ་འགས་མཚན་ནམ་རིང་མོ་བསྐྱལ།།

མཚོ་བྱང་བོད་མཁར་གནའ་རབས་མཛེས་རྒྱན་ཅན།།

ལུག་ཁྱུའི་སྐར་ཚོགས་རྫོང་མཁར་ངོགས་ལ་ཞོགས།།

སྤང་ཆུའི་རིག་གནས་རྒྱལ་ཁམས་འཕོས་པ་བཞིན།།

མེ་ཏོག་མཆོད་ཅིང་ལྷ་ཚོགས་འཕྱོ་བ་ཡི།།

ང་ཡི་སེར་ཆེན་ལུང་བ་རྐང་ཚ་རྫོང་།།

བསིལ་བའི་ཚལ་དེར་ད་ཐེངས་ཡང་ཡང་འབྱོར།།

དེ་ནས་ང་ཡི་མཚོ་བྱང་དཀྱིལ་འཁོར་གྱི།།

ཉི་ཟླ་གཉིས་ཀྱི་མེ་ལོང་ཡངས་པོ་རུ།།

སྤྲིན་པ་བཟུང་བའི་དཔའ་རྟུལ་སྐྱ་བོ་ཞིག།

དབུ་ཞྭ་ནག་པོ་རལ་པ་ཅུང་སྨུག་པ།།

གཟུགས་པོ་རིང་རིང་རི་བོ་ཡོམ་ཡོམ་སྐྱོམ།།

སྐུ་སྐྱེས་དྭངས་དྭངས་ཆུ་བོ་ལྕུག་ལྕུག་འདར།།

རྒྱལ་གཅེས་སྲས་ལྟར་སྨུག་པོ་སྣུམ་ཞལ་ཅན།།

ང་ཡི་ཕྱི་ནང་ཁྱེད་ཀྱི་སྙན་ངག་གིས།།

ཡང་ཡང་སྦྲིད་ཅིང་ཡང་ཡང་བཟི་བ་ཡི།།

རྨད་བྱུང་མཚན་དཔེའི་མཆོད་པ་རབ་ཕུལ་བ།།

སེང་གེ་རྡོ་རྗེའི་མཚན་དེར་ཤིས་ཚིག་སྩོལ།།

.

རྩྭ་ཐང་དུ་ལུག་ཁྱུ་འཚོ་སྟངས།

.

ཞེས་ནི་སྐུལ་བའི་ཐ་སྙད་ཁྲི་ཕྲག་ལགས།།

མཚན་མོར་ཞོགས་པའི་ལུག་གི་རྩྭ་ཐང་ལགས།།

སྤྱང་ཀིའི་ཚོགས་རྣམས་གཏན་ནས་མེད་པ་ལགས།།

ཟླ་བའི་འོད་ཀྱིས་ལན་རེར་མཐོང་བ་ལགས།།

ཚེ་བཅུ་ཉེར་དྲུག་མུན་པས་འཐིམས་པ་ལགས།།

གྲོང་ཁྱེར་ཁྲོད་དུ་ལུག་ཁྱུ་མི་མཐོང་ལགས།།

ལུག་རྣམས་ངུ་བའི་སྐད་ཀྱང་ཐོས་མིན་ལགས།།

ལན་ཆགས་འདྲེས་པའི་ཆུ་བོ་འབབ་པ་ལགས།།

ལྕུག་ལྕུག་བཞུར་བ་ཆུ་བོའི་རང་བཞིན་ལགས།།

རྩྭ་ཐང་སྟེང་གི་མཚོའང་སྔོན་པོ་ལགས།།

མཐའ་ཡི་རྒྱ་མཚོར་འབབ་པའི་དུས་ཡིན་ལགས།།

འདང་ཞེན་མངར་སྐྱུར་འཚོ་བའི་མེ་ལོང་ལགས།།

དེ་དུས་བརླན་པའི་སེམས་པ་འཁྱག་པ་ལགས།།

ཡང་དུ་སྐུལ་བའི་སྤྲིན་དང་རླུང་བུ་ལགས།།

སྙན་ངག་མི་ཚོར་མུན་པའི་གྲོང་དུ་ལགས།།

མཚན་མོར་འཆར་བའི་ཉི་མ་སེར་བོ་ལགས།།

ནུབ་ཏུ་བཞུར་བ་དུས་ཀྱི་འཆར་སྟངས་ལགས།།

དེ་ནས་སྔར་བཞིན་མཚན་མོར་འཆར་བ་ལགས།།

ཕ་ཝང་འཕུར་བའི་གཤོག་པའི་སྒྲ་དེ་ལགས།།

སྐར་མ་ཇི་ལྟར་འོད་ཀྱིས་ཆེམས་ཆེམས་ལགས།།

སྡོང་བོའི་ལོ་མར་ཅི་ཞིག་འབབ་པ་ལགས།།

བྱེའུ་ཆུང་ཞིག་གི་སྐད་ཀྱང་ཡོང་པ་ལགས།།

དོ་ནུབ་གནམ་གང་འབུམ་གྱུར་མ་ཡིན་ལགས།།

ཅི་ཕྱིར་འདི་རུ་བྱ་ཁྱུ་མང་བ་ལགས།།

སྒེའུ་ཁུང་འགྲམ་དུ་ཀུ་ཅོ་འདོན་པ་ལགས།།

ཁྱོད་རང་དྲན་པའི་གདུང་བ་རིང་པོ་ལགས།།

ཞེ་དཀྱིལ་གང་བའི་སེམས་ཀྱི་མི་ཁྱོད་ལགས།།

ང་ཡི་མཚན་མོར་སུན་སྣང་མ་སྐྱེ་ལགས།།

.

ལྷ་སའི་ཁྲོམ་ནས་རྙེད་པའི་སྙན་ངག

.

ནམ་མཁའི་ཁ་དོག་སྔོན་པོ་ཕ་ཡུལ་ཕྱོགས་ནས་ལངས་ཤིང་།།

སྤྲིན་པའི་བང་རིམ་བརྟོལ་ནས་སྟོད་ཀྱི་ཕོ་བྲང་བསམས་ན།།

རྩམ་པ་སྒྱེ་མོ་ཕྱེད་དང་ཤ་སད་ནུབ་འགའི་ཇ་ཆང་།།

རྒྱབ་ཀྱི་ཁུག་མར་བཅུག་ཅིང་དབུས་ལམ་རིང་མོའི་སྣང་བརྙན།།

ཆུང་འདྲིས་སྙིང་གི་དྭངས་མ་ཞེ་ཡི་བར་ནས་དྲན་ན།།

ལྷ་སའི་བར་སྐོར་གླིང་གི་སྐྱོ་བ་འདོན་རོགས་ཡིན་འགྲོ།།

ལ་ལུང་བརྒལ་ནས་སྐྱོད་པའི་དགུན་ཟླ་འཁྱག་པོའི་རི་གྲོང་།།

ཁ་བ་ཡར་ཡར་འབབ་ལ་ཁ་བ་མར་མར་འབབ་དུས།།

རླུང་བུ་ཐག་ཐག་སྡང་ཞིང་སྐྲ་ལོ་མཁའ་ལ་སྤུར་ན།།

ཚོར་བའི་རྩད་དང་སྣེ་མོ་ཉིད་ཀྱི་ཕྱོགས་ལ་ཟུག་འགྲོ།།

ང་ཡི་ནམ་མཁའི་སྐར་ཆེན་རྒྱང་རིང་ཡུལ་ལ་ཡོད་འདྲ།།

སྐར་མ་ཆེ་ཆུང་མང་པོས་སྐར་མཐའ་ནུབ་ཏུ་སྲུང་འདྲ།།

ང་ཡིས་སྐར་མ་མཐོང་དུས་ཁྱོད་རང་ཡིད་ལ་དྲན་ཡོང་།།

ཁྱེད་ཀྱིས་སྐར་མར་གཟིགས་དུས་ང་རང་དྲན་གྱིན་ཨེ་ཡོད།།

དྲན་པ་ཆུ་ལས་རིང་སོང་དྲན་པ་གངས་ལས་དཀར་སོང་།།

དབུས་ཀྱི་ཉི་མ་ལྷ་ས་དབུས་ཀྱི་ཕྱོགས་ལ་བཞུགས་ཡོད།།

རྒྱང་ནས་ཞལ་གཟིགས་མཛད་ན་སྤྱན་གྱིས་ཉི་ཟླ་འབྲི་བ།།

དད་པའི་སྟོབས་ཀྱིས་བསྡམས་ཡོད་དད་པའི་ཤུཊ་ཀྱིས་བཅིངས་ཡོད།།

རི་བོ་གྲུ་འཛིན་ནང་གི་བྱམས་པ་སྙིང་ལ་རྗེ་བོ།།

ཉི་མ་ལྷ་སར་ཐོན་ན་མཇལ་ཁ་ཀུན་ལ་གནང་ཡོང་།།

ཕྱག་གཉིས་ཐལ་མོ་སྦྱར་ཏེ་གསོལ་བ་གང་ལ་བཏབ་ན།།

ཁ་བའི་མེ་ཏོག་དག་གིས་ལྷ་ཡི་ཁྲུས་ལེགས་མཛད་ཡོང་།།

བློས་ཐུབ་སེམས་ཀྱི་དཀྱིལ་འཁོར་ཚོན་དང་རི་མོས་བྲིས་ཡོད།།

ཚོར་བའི་བྱེ་མ་འཚང་ཡོད་སེམས་པའི་གཙང་པོ་འཁྲིགས་ཡོད།།

འཕྱངས་རྒྱས་ཟླ་བ་སྒྲོལ་མའི་སྐུ་ཚེའི་རང་རྣམ་དྲན་སོང་།།

དབོན་ཞང་རྡོ་རིང་རྒྱུད་ཀྱི་སྐྱིད་ཆུའི་རླབས་སྒྲ་རེ་རེས།།

དགུན་ཟླ་རིང་མོར་བགྲོད་པའི་ང་དང་ང་ཡི་བྱམས་པ།།

གློ་བུར་ཡ་ཆུང་སྟོང་ལ་ལྷན་དུ་འཚང་བར་གྱུར་ཚེ།།

རིག་འཛིན་ཚངས་དབྱངས་རྒྱ་མཚོ་སྐྱིད་ཆུར་གཤེ་གཤེ་མ་གནང་།།

ཅང་ཤེས་གྲོང་རྡང་ནང་གི་ཆུང་འདྲིས་སྙིང་ཆུང་འཁྱག་འགྲོ།

ཆུ་བོའི་སྐེ་ཚེའི་གསེང་ན་ཁྱེད་རང་གན་རྐྱལ་ལོག་ནས།།

ང་ཡི་བཙན་པོ་བོད་ཀྱི་ཕོ་བྲང་མཇལ་རྒྱུ་མ་བརྗེད།།

བར་སྐོར་གླིང་དུ་འགྲོ་དུས་གཟན་རས་དམར་པོ་མནབས་པའི།།

ཚངས་དབྱངས་རྒྱ་མཚོའི་ཞྭ་ལ་མེ་ཏོག་སེར་ཆེན་བསྒྲོན་ཡོད།།

དབུས་ཀྱི་གནས་ཡུལ་དག་གི་མཇའ་ཁ་བྱིན་རླབས་གནང་རྗེས།།

ང་ཡི་རི་བོ་གྲུ་འཛིན་སྐུ་སེམས་སྐྱོ་བ་མ་མཛད།།

ཕ་ཡུལ་སྐྱིད་ཀྱི་ས་ལ་མི་ལོག་རང་དབང་མི་འདུག། ༢༠༡༨པར་ཟི་ལིང་དུ།

.

རྒྱང་རིང་ལ་བཏང་བའི་གཞས།

.

ཁྱེད་ནི་ཁ་དོག་ཇི་བཞིན་ཁ་དོག་སྣ་ལྔ་ཇི་བཞིན།།

ལན་རེར་དཀར་པོ་ཡིན་ལ་མཚམས་རེར་དམར་པོར་གྱུར་པ།།

སེམས་ནི་མུ་ཏིག་ཇི་བཞིན་མུ་ཏིག་དཀར་པོ་ཇི་བཞིན།།

རླུང་བུ་ལྡང་ཚུལ་བལྟ་ཞིང་ཆུ་བོ་བཞུར་སྟངས་མཚོན་པ།།

ཡིད་ཀྱི་རི་མོ་བརྐོ་སའི་ཞེ་འདང་བར་ཐག་ཉེ་སའི།།

མ་འོངས་ཟི་ལིང་དྲན་པའི་སེམས་པ་དཀར་དཀར་གནང་མཁན།།

ཡུལ་གྱི་ལོག་ཏུ་མེད་རུང་རྒྱང་ནས་ཞལ་གཟིགས་མཛད་པའི།།

བརྩེ་དུང་ཤིན་ཏུ་ཡང་བ་ཉི་ཧོང་ཤར་ནུབ་རྒྱན་པ།།

མཚན་མོར་ཡིད་ལ་དྲན་པ་རྨི་ལམ་སྐར་མཐའ་ཇི་བཞིན།།

ཕན་ཚུན་ཞེན་པའི་ཆགས་པ་གྲོང་གི་ཁ་བ་དེ་བཞིན།།

ནུབ་མཐའི་དགུང་ནས་བྱོན་པའི་ཉི་མ་དེ་དག་ལྟར་དུ།།

གུས་པའི་ནང་སེམས་ཆགས་སའི་སྟེགས་ཀྱི་བུད་མེད་གཞོན་ནུ།།

ང་ནི་ཤིན་ཏུ་དུང་ཞིང་རབ་ཏུ་དགའ་བར་གྱུར་ཏེ།།

དུས་ཀྱི་ཉེ་རིང་ལྡོག་པའི་མ་འོངས་འཚོ་བའི་གྲོགས་སུ།།

གལ་ཏེ་འགྲུབ་པར་གྱུར་ཚེ་བདག་ནི་ཁྱེད་ལ་འབུལ་ལོ།།

ཁྱེད་ནི་ས་སྲོད་ཇི་བཞིན་ས་སྲོད་གཞན་དག་ཇི་བཞིན།།

དགུང་གི་ཉི་མ་ཡོལ་རྗེས་ཚུར་ཚུར་ལོག་ཏུ་ཡོང་བ།།

སེམས་ནི་ཉི་མ་ཇི་བཞིན་ཉི་མ་སེར་བོ་ཇི་བཞིན།།

ཚོན་གྱིས་རབ་ཏུ་དཀྲུགས་རྗེས་དམར་སེར་ལྷན་དུ་འདྲེས་པ།།

ཁ་སེམས་བྱམས་པ་མིན་རུང་ཉིན་མཚན་ཁྱད་མེད་དྲན་པའི།།

མི་རིགས་སློབ་ཆེན་འགྲམ་གྱི་དཀར་ཡོལ་ཆུ་ལ་བཀྲུ་མཁན།།

ཉི་ནུབ་འོད་དུ་བརྟོལ་བའི་མཚོ་ཆེན་ཁྲི་ཤོར་འགྲམ་གྱི།།

ཉིད་དང་ལྷན་དུ་འཚོ་བའི་གྲིབ་མ་ནག་པོ་དེ་ཡི།།

བདག་ཏུ་ཡོད་པ་མིན་རུང་ཐག་རིང་གང་དུ་ཡོད་ཀྱང་།།

སེམས་པའི་ཐག་པ་སྦྲེལ་བའི་བརྩེ་བའི་སྐུ་ཞབས་ཤིག་གི།།

ཅ་ནེ་ཁྲི་ཤིང་གང་གི་རྒུན་ཆང་དམར་པོ་ཇི་བཞིན།།

གསེར་གྱི་འཛུབ་དཀྲིས་ཤིག་གིས་ཆགས་སེམས་མཚོན་པ་ཇི་བཞིན།།

ང་ནི་རབ་ཏུ་མྱོས་ཏེ་སྲོད་ཀྱི་ཆུ་འགྲམ་དག་ཏུ།།

གཅིག་པུར་ཁེར་དུ་ཙོག་སྟེ་སེམས་པ་ཡང་ཡང་གསོ་ཕྱིེར།།

ཁྱེད་ཀྱི་ཕྱོགས་ལ་གཏད་ནས་ལ་གཞས་ཐན་ཐུན་བླངས་ཡོད།།

ཁྱེད་ནི་སྐྲ་ལོ་ཇི་བཞིན་སྐྲ་ལོའི་རི་མོ་ཇི་བཞིན།།

མཚན་མོའི་མུན་པ་འཁྲིགས་རྗེས་སྤྲིན་པའི་ཁ་དོག་འགྱུར་བ།།

སེམས་ནི་གཡུང་དྲུང་ཇི་བཞིན་གཡུང་དྲུང་བོན་ནག་ཇི་བཞིན།།

ལྷ་རྟ་མཁའ་ལ་བཅོལ་ཞིང་བསང་ཕུད་ཞིང་ལ་སྒྲོན་པ།།

ཡིད་ཀྱི་ཚིག་གི་བར་ལ་དྲོད་ཀྱི་སྙན་ངག་འབར་བ།།

གསེར་གྱི་མེ་ཏོག་སེར་བོའི་རི་ཆུ་གྲོང་ལ་ཕབ་མཁན།།

མཛའ་བརྩེའི་བར་ཐག་རིང་རུང་ཞི་བའི་སེམས་པ་སྦྲེལ་ནས།།

དགེ་ཚོགས་སེམས་ཉེ་རྣམས་ཀྱིས་དགྲ་རུ་སྡང་བ་མིན་ན།།

གྲོང་གི་འཚོ་བ་སྐྱ་སྐྱ་ཕྱི་ནང་མཚོན་པ་མེད་པར།།

གཞོན་པའི་སྣང་བས་རྒྱན་པའི་གུས་པ་སོ་སོའི་ལང་ཚོ།།

བུད་མེད་གཅིག་གི་ཆེད་དུ་འཆི་ན་བདེ་སྐྱིད་ལོས་ཡིན།།

༢༠༡༨/༨པར་ཟི་ལིང་དུ་བྲིས། ༢༠༡༨/༩པར་ཕ་ཡུལ་དུ་བཅོས།