(དེ་ནས་ཡང་ཐ་སྐར་གྱི་ཉ་བའི་ཟླ་བ་ཡར་གྱི་ངོ་རང་ལོ་སོ་བཞི་པ་ལ། མཆིལ་ཕུ་ཞེས་པའི་རི་སུལ་དབེན་པ་ཞིག་ཏུ་བྱང་ཆུབ་ཀྱི་སེམས་སྒོམ་པ་ལ་ནན་ཏན་དུ་བྱེད་པའི་སྐབས་ཞིག་ན། རྨི་ལམ་གྱི་སྣང་བ་ལ་རི་བོ་རབ་ཏུ་རྒྱས་པ་ལྷུན་སྟུགས་པ་ཞིག་གི་ངོས་ན། མེ་ཏོག་རབ་ཏུ་བཀྲ་བའི་ཚལ་ཞིག་ཏུ་ཡིད་དུ་འོང་བའི་གཞོན་ནུ་མ་བརྗོད་དུ་མི་བྲ་བ་དུ་མའི་དབུས་ན། རྣལ་འབྱོར་གྱི་དབང་ཕྱུག་རྗེ་བཙུན་གླིང་རྗེ་རས་པ་དེ་ཉིད་འོད་ཟེར་ཉི་མ་འབུམ་ཕྲག་ཟིལ་གྱིས་གནོན་པའི་སྐུ་ཅན་ཞིག་ཡིད་ཡུད་དུ་གསལ་བའི་མོད་ལ་མོས་གུས་ཀྱི་བློ་ཤུགས་དུས་མཐའི་མེ་ལྟར་འབར་བས། གཉིད་སད་ནས་དེའི་རྗེས་སུ་གསོལ་བ་བཏབ་པ་ནི།)

 

༈ ཡང་ཡེ། བསམ་ཤིང་གཞིག་ན་མི་ལུས་རིན་ཆེན་ཐོབ། །

བརྟགས་ཤིང་དཔྱད་ན་འཁྲུལ་མེད་རྗེ་བཙུན་མཇལ། །

འབད་པས་བསྒྲུབས་ཏེ་བྱ་བ་ངན་པ་སྤངས། །

ནུས་ན་དམ་པའི་ཆོས་ལས་གཉེར་བྱ་མེད། །

སྐབས་དེར་ཡང་སྐྱབས་གནས་ཀྱི་སྐུ་དྲིན་བྱུང་། །

སྐབས་དེར་ཡང་སྐྱབས་མཆོག་གི་ཀརྨ་པ། །

རྗེ་དུས་གསུམ་མཁྱེན་པ་ལ་གསོལ་བ་འདེབས༑ །

ཐུགས་མི་རྟོག་ཡེ་ཤེས་ཀྱིས་བྱིན་གྱིས་རློབས། །

མདའ་སྙེ་མོ་ལུང་པ་མ་གི་ན། །

མི་སྐྱ་སེར་མེད་པ་ཐམས་ཅད་ཀུན། །

ཞིང་ཐ་བའི་འདུལ་སྦྱོང་བྱེད་པ་དང་། །

ས་ཁང་མཁར་རྩིག་པའི་བྲེལ་བས་མནར། །

ཕུ་ཇོ་མོ་གངས་ཀྱི་མདུན་རོལ་ན། །

འབྲོག་སྦྲ་ཁྱིམ་འཛིན་པའི་སྐྱ་སེར་ཀུན། །

ལས་བེའུ་ལུག་འཚོ་སྐྱོང་བྲེལ་ཞིང་ཕོངས༑ །

གཏན་མི་ཚེ་མ་ཕྱིད་དོགས་ཀྱིས་སྡུག །

བར་འདི་ན་སེར་མོས་ཁ་བསྒྱུར་བའི། །

གོས་གྲུ་བཞི་གྱོན་པའི་སྐྲ་བྲེགས་པ། །

ཟས་འཚོ་བ་གར་ཕྱིད་ལྟ་བ་ཡི། །

ཕུགས་གཏན་འདུན་ཡིད་ལ་མི་འཆར་བའི། །

བསམ་མེད་ཀྱི་ལུང་པ་སྟོང་པར་འཁྱམས། །

རྐྱེན་དེ་འདྲས་བཟོད་མེད་ཀྱི་སྙིང་རྗེ་སྐྱེས། །

སྙིང་རྗེ་དྲག་པོ་ཞིག་སྐྱེས་ཙ་ན༑ །

སྐྱབས་མེད་མགོན་མེད་ཀྱི་གཉེར་མེད་དུ་དམྱལ་བ་འདིས། །

ཡིད་བསམ་དུ་མི་བཟོད་གདུང་བ་སྐྱེས། །

རྗེ་ཐུགས་རྗེ་ཆེན་པོ་མངའ་བ་ཡི། །

ཡབ་དཀོན་མཆོག་གསུམ་པོ་དུས་དེར་དྲན། །

དེ་དྲན་པས་ན་མེད་དུ་གསོལ་བ་བཏབ། །

བཏབ་ཆེས་ན་སྣང་ཤས་སུ་འགྲོ་དོགས་པས། །

མི་མེད་ཀྱི་ལུང་སྟོང་སྙིང་ལ་འདོད། །

འཁོར་ཁྲི་ཕྲག་འདུས་པའི་རྗེས་འཇུག་ཀུན། །

སྡེ་སོ་སོར་ཕྱོགས་འཛིན་གཞུང་འཛུགས་ནས། །

སྡིག་མི་དགེ་བཅུའི་གཏན་རྒྱུན་སྤེལ། །

དེ་དར་བས་མ་རྒན་གྱི་བདེ་སྐྱིད་འཇོམས། །

དེ་མ་བཟོད་འཁོར་གཡོག་གི་འཁྲི་བ་ཆོད། །

འཁོར་གཡོག་སློབ་མེད་པའི་དུས་ཚོད་ན། །

རང་གཅིག་པུའི་ལུས་ངག་ཡིད་གསུམ་དེ། །

མཁའ་དགུང་སྔོན་ཡངས་པའི་དཀྱིལ་ཞིག་ན། །

མཁའ་ལྡིང་གི་རྒྱལ་པོ་བདེ་བ་བཞིན། །

སྐྱིད་ཆེས་ཀྱི་དགའ་བ་སྙིང་ནས་ཚོར༑ །

ནོར་ཟང་ཟིང་གི་འདུ་ལོང་རྒྱས་པ་ལ། །

ཆོག་ཤེས་མེད་ཀྱི་རྐུ་འཕྲོག་རྩོད་པ་དེ། །

གནས་ངན་སོང་གསུམ་པོ་མ་གཏོགས་པ། །

ཡུལ་འགྲོ་ས་གཞན་ན་མེད་མཐོང་ནས། །

མེད་ཐབས་མེད་ཀྱི་མཁོ་དགུའི་ནོར། །

མི་ང་ཡི་ཡིན་ཞེས་མ་བཟུང་བས། །

ཡིད་བཞིན་གྱི་ནོར་བུ་རིན་ཆེན་དེ། །

རི་བོ་ཡི་རྒྱལ་པོ་མཆོག་རབ་ཙམ། །

མདུན་འདི་ན་ཕྱུར་བུར་བཀང་ན་ཡང་། །

དེ་གཅེས་འཛིན་མེད་པའི་གནས་སྐབས་ན། །

འདོད་ཆེས་པའི་སེར་སྣ་ག་ལ་འོང་། །

གང་ཡིན་པ་གཅིག་ཏུ་བསྐྱུར་ནས་བཏང་། །

མི་གཏད་མེད་རང་ལ་མི་ལྟ་བར། །

གཞན་ཚར་ཆོས་རྗེས་ལ་རྒྱུག་པ་དེ། །

བྲག་གཡང་ས་ཆེན་པོའི་མཐའ་ལོགས་སུ། །

ཕྱེ་ལེབ་འཕུར་བའི་རྗེས་སོ་ན། །

བྱིས་པ་བསམ་མེད་རྒྱུག་པ་བཞིན། །

རང་སྲོག་འཆོར་བ་མ་གཏོགས་པ། །

བདེ་སྐྱིད་ཕུན་ཚོགས་མི་འོང་བས། །

གཟུགས་བྱད་ཅུང་ཟད་ལེགས་པ་ལ། །

དབང་པོ་ཐམས་ཅད་འཆོར་བ་དང་། །

ཚིག་སྒྲོས་པ་སྙན་དང་མི་སྙན་པར༑ །

བློ་ཆགས་སྡང་དྲག་པོ་སྐྱེ་ལུགས་སོགས། །

མནོག་ཆུང་ཞིང་ཡ་ངའི་གནས་རྣམས་ལ། །

ལོངས་སྤྱོད་རྒྱུ་ཞིག་རྙེད་ན་རང་སྲོག་ཀྱང་། །

ཇི་མི་སྙམ་བཟོད་ཀྱི་སྨྱོན་པ་ལ། །

འདི་ཅི་བྱུང་སྙམ་སྟེ་ཡིད་དངངས་པས། །

འཕྲལ་ཉམས་མི་དགའ་ཞིང་ནམ་ཕུགས་སུ། །

གཏན་སྡུག་བསྔལ་ཐར་མེད་མྱོང་དགོས་པས། །

ཞེ་ཐག་པ་ནས་མ་བཟོད་ངེས་འབྱུང་སྐྱེས། །

དེ་སྐྱེས་པས་ཅོལ་ཆུང་གི་སྤྱོད་པ་ལ། །

ལུས་ངག་ཡིད་གསུམ་མ་བཀོལ་བས། །

སྒོ་གསུམ་ལས་རུང་དགེ་རྩ་འཕེལ། །

དེ་འཕེལ་བས་དཀོན་མཆོག་གི་བཀའ་དྲིན་ཐོབ། །

ད་ཚེ་མཇུག་ཅུང་ཟད་གང་ཡོད་དེ། །

དོན་མེད་སྙོམས་ལས་སུ་མ་བཏང་བར། །

རང་མགོ་རང་འདོན་གྱི་དུས་ལ་བབ། །

ཆེ་ཆེ་སྙན་སྙན་གྱི་གོ་འཕང་དེ། །

ལོ་བརྒྱ་ཕྲག་ཙམ་ཡང་མི་འཁྱོངས་པས། །

མིང་སྐམ་མི་མཐོང་ཡུད་ཙམ་ལ། །

བློ་དགོས་མེད་ཀྱི་ངེས་ཤེས་གཏིང་ནས་སྐྱེས། །

གནས་འཁོར་བ་འདི་ལ་སྲིད་རྩེ་ནས། །

མར་དམྱལ་བ་མནར་མེད་ཡན་ཆད་ལ༑ །

དམན་པ་སྡུག་བསྔལ་སྤྱོད་པ་ལས། །

མཆོག་ཏུ་གྱུར་པ་མ་མཐོང་བས། །

རང་གཞན་མཐོ་འབྲིང་ཐ་མ་ཀུན༑ །

དམན་པའི་གནས་སུ་སྙིང་རེ་རྗེ། །

སྦ་གསང་སྤྱོད་ལམ་བཅོས་མ་ཡིས། །

བྱ་བཞག་གལ་ཆེན་སྒྲུབ་རློམ་པས། །

མི་ཚེ་དལ་བར་མ་བསྡད་ནས། །

འབུངས་གསུམ་བཏོན་པའི་བྱ་བ་ཡང་། །

བསམ་མེད་བྱིས་པའི་རྩེད་མོ་བཞིན། །

འབྲས་བུ་ཡོད་སྙམ་ག་ལ་བགྱིད། །

དམུ་རྒོད་བསྡུ་བའི་དར་རྒྱས་ལ། །

རང་གཞན་གཉིས་ཀའི་གཏན་འདུན་ཀུན། །

གཏན་ནས་རླག་བྱེད་ཡིན་པ་ལ། །

ཕེར་ཡོད་ཅན་དུ་ག་ལ་འཁྲུལ། །

གཞན་ལ་བདེ་སྐྱིད་རེ་བ་ཡི། །

ཞུ་སྒོ་ངོ་འཛིན་ལ་སོགས་པ། །

སེམས་ལ་གདུང་བ་འབར་བའི་རྒྱུ། །

གོ་ས་ཆེན་པོ་འགྲིམ་པ་དེ༑ །

རྣམ་གཡེང་ཆེ་ལ་ཕན་ཡོན་མེད། །

གཅིག་ཏུ་དབེན་པར་གནས་པ་ན། །

སྡིག་པ་ངང་གིས་འགགས་པའི་ཕྱིར༑ །

སྨྲ་བརྗོད་གྲོགས་འདྲའི་མཛའ་བཤེས་ཀུན། །

ཉེ་བར་སྨོས་ནས་ཆགས་པ་ཡི། །

གདུང་སེམས་སྲེད་པ་རིང་ནས་སྤངས། །

མི་ཚེ་ཡིད་བདེའི་ངང་དུ་འཁྱོལ། །

ཟས་བསོད་སྙོམས་ཁ་ལན་མི་དགོས་ཤིང་། །

མི་གཞན་གྱིས་རང་ལ་དམ་པའི་ཆོས། །

འདི་རྣམ་དག་སྤྱོད་པ་ཡིན་ཞེས་ནས། །

ཡུལ་མི་མཐོང་མེད་པའི་ས་ཕྱོགས་སུ༑ །

རྡོ་རྗེན་གྱི་སྟེང་གི་བྱ་བྱིའུ་བཞིན། །

འཁོར་གཏན་འཁྲིས་བྱ་ས་མེད་པ་ཡི། །

བྱ་བ་ཞིག་སྙིང་ནས་གཏང་བར་རིག །

དེ་ཐོང་ན་བཀའ་བརྒྱུད་ཀྱི་བྱིན་རླབས་ཞུགས། །

གསོལ་བ་ན་མེད་དུ་བཏབ་པ་ཡིས། །

དངོས་གྲུབ་ཀྱང་དེ་ལས་གཞན་དུ་མེད། །

བདག་མོས་གུས་ཀྱི་བློ་ཤུགས་གང་མཆིས་པ། །

སྟོབས་གཅིག་ཏུ་བསྒྲིལ་པས་ཁམས་གསུམ་གྱི། །

འཁོར་བའི་ལུས་དང་ལོངས་སྤྱོད་དང་། །

འཁོར་སྙན་གྲགས་བཅས་པ་བཞི་པོ་ལ། །

བརྟེན་པའི་སྣང་ཤས་ཐ་ཤལ་དེ། །

བདག་གཞན་གྱི་རྒྱུད་ལ་འགོག་པར་མཛོད། །

 

ཅེས་གསོལ་བ་བཏབ་པའོ།།


བཀའ་བརྒྱུད་མགུར་མཚོའི་གོ་དོན་ཁོག་དབུབས་སྤྱི་ཆིངས་རྣམ་པར་བཤད་པ་སྐལ་བཟང་ཡིད་ཀྱི་ངལ་གསོ་ཞེས་བྱ་བ་བཞུགས་སོ།
ཀརྨ་ལེགས་བཤད་གླིང་བཤད་གྲྭ།

པར་དབང་ཁོངས་གཏོགས་ས་ནི་རྩོམ་པ་པོ་དྲ་བ།བརྒྱུད་སྤེལ་བྱེད་དུས་ངེས་པར་དུ་དྲ་ཐག་སོར་བཞག་བྱ་དགོས།

རྩོམ་ཡིག་གི་སྦྲེལ་ཐགhttp://www.tbwriters.com/?p=4489