(དེ་ཡང་རང་སོ་གསུམ་གྱི་ཧོར་ཟླ་གསུམ་པའི་ཚེས་བཅོ་ལྔའི་རྨི་ལམ་ན། རི་བོའི་ངོགས་རྒྱས་པ་ལྟར་མི་བཟོད་པ་ཞིག་ན་འཇའ་སྤྲིན་གྱི་ཕུང་པོ་གཞལ་དུ་མེད་པ་ལང་ལིང་གི་བར་མཚམས་ན། མེ་ཏོག་ཁ་དོག་སྣ་ཚོགས་པ་ཆེ་ཆུང་ཡང་ཤིང་རྟའི་འཕང་ལོ་ཙམ་གྱི་ནང་དུ། རེས་སྐུ་སྐེད་ཡན་ཙམ། རེས་སྐུ་སྨད་ཙམ། རེས་ཞལ་གྱི་དཀྱིལ་འཁོར་ཙམ་ར་རིར་གྱུར་པའི་རྣལ་འབྱོར་གྱི་དབང་ཕྱུག་མི་ལ་རས་པ་དེ་གྱ་གྱུ་པོར་སྣང་ཞིང་ལྷག་པར་དབུ་སྐྲ་ཕོད་ཀ་ལིང་ངེ་བ་དེ་གཞན་ལས་ཀྱང་ཆེས་གནག་པའི་འོད་ཟེར་གྱི་རང་བཞིན་གྱིས་རང་གི་ཤེས་ཉམས་ལ་བལྟ་མི་བཟོད་པ་ཙམ་གྱི་འཕྲོས་ལ་མོས་གུས་ཀྱི་ཤེས་པ་བཙན་ཐབས་སུ་འགགས། དེ་ནས་གཉིད་སད་པ་དང་། སླར་མོས་གུས་ཀྱི་ཤུགས་སྤྲུགས་ནས་གསོལ་བ་བཏབ་པ་ནི།)

 

༈ རྗེ་གནས་རྣམ་དག་འོག་མིན་གྱི་ཞིང་ཁམས་ན། །
སངས་རྒྱས་དྲུག་པ་ཆོས་སྐུ་རྡོ་རྗེ་འཆང་། །
ཁོང་ས་བཅུའི་དབང་ཕྱུག་རྣམས་ལ་སྣང་། །
ངེད་དད་མེད་བླུན་པོ་རོ་ལངས་ངོར། །
རྗེ་རྣལ་འབྱོར་རས་པ་ཆེན་པོར་སྣང་། །
རྗེ་མི་བཟོད་ཐུགས་རྗེས་ད་ཟུངས་ཤིག །
ཞེ་ཐག་པ་ནས་མོས་གུས་མ་ཆུད་པས། །
རྗེ་བཙུན་རྣམས་གྱ་གྱུར་འཇའ་བཞིན་ཡལ། །
གསུང་མི་བཟོད་སྒྲ་དབྱངས་ལྡན་ན་ཡང་། །
དེ་ཆ་ཤས་ཕྲ་མོ་ཅུང་ཟད་ལས། །
རྒྱུད་བཟོད་མེད་དུ་འཁོལ་བའི་ཟབ་གསལ་བ། །
ཡིད་རང་དབང་མེད་པར་འཕྲོག་བྱེད་པའི། །
ངོ་མཚར་གྱི་ངེས་པ་མ་སྐྱེས་པས། །
བདག་མོས་གུས་ཁ་ཙམ་སོང་བ་ལ༑ །
དུས་གསུམ་གྱི་སངས་རྒྱས་རྩལ་བསྐྱེད་ནས། །
ཕ་འགྲོ་མགོན་གྱི་སྤྲུལ་སྐུ་རས་པ་ཁྱོད། །
རྣམ་ཐར་གྱི་མཛད་པ་ངོ་མཚར་ལ། །
ཡིད་ཆེས་ཀྱི་དད་པ་ཅུང་ཟད་སྐྱེས། །
དེ་རྟེན་འབྲེལ་རྣམ་པར་དག་པའི་མཐུས། །
གཉིད་འཁྲུལ་པས་བསླད་པའི་སྣང་བ་ལ། །
བསམ་བརྗོད་ལས་འདས་པའི་དགའ་སྤྲོའི་ངོར། །
ཡེ་མཐོང་མ་མྱོང་བའི་རྗེ་བཙུན་ཞིག །
བརྡ་སྤྲོད་མཁན་མེད་པར་ངང་གིས་ཤེས། །
དུས་དེ་རྗེ་བཙུན་ལ་ཡི་ག་ཤོར། །
བསམ་རྒྱུ་ལ་དཀོན་མཆོག་ཁྱེད་རང་ཤེས། །
བདག་མི་སྲུན་གྱི་འདུལ་ཚུལ་ཁྱེད་རང་མཁས། །
འདུན་མ་བློ་ཉེས་པོ་ཆོས་བཞིན་ལམ་སྣ་དྲོངས། །
བདག་འཇིག་རྟེན་ཕལ་པའི་བྱ་བ་སོགས། །
ཚེ་སྟོང་ཟད་དུ་འགྲོ་བའི་སྤྱོད་པ་ལ། །
ལག་ལེན་དུ་བྱེད་པ་ག་ལ་ཞིག །
རྨི་ལམ་དུ་འདོད་པའང་མི་འབྱུང་བའི། །
བཀའ་དྲིན་ཞིག་རྗེ་བཙུན་ཁྱེད་ལ་རགས། །
རང་མ་ཚོར་ཆོས་བརྒྱད་གེགས་ཚོགས་ཀྱིས། །
བདག་སྙིང་འདི་རྗེན་ཟན་མི་བྱེད་ཅིང་། །
གཉིས་ཕུང་གི་སྡིག་ལ་མ་འབགས་པར། །
སྤྲང་སྙོམས་ཆུང་གི་ངང་ལ་འཆི་ཐུབ་ཅིག །
ཕ་རྗེ་བཙུན་རས་པས་བྱིན་གྱིས་རློབས། །
ཞེས་གསོལ་བ་བཏབ་པའོ། །

བཀའ་བརྒྱུད་མགུར་མཚོའི་གོ་དོན་ཁོག་དབུབས་སྤྱི་ཆིངས་རྣམ་པར་བཤད་པ་སྐལ་བཟང་ཡིད་ཀྱི་ངལ་གསོ་ཞེས་བྱ་བ་བཞུགས་སོ།
ཀརྨ་ལེགས་བཤད་གླིང་བཤད་གྲྭ།

པར་དབང་ཁོངས་གཏོགས་ས་ནི་རྩོམ་པ་པོ་དྲ་བ།བརྒྱུད་སྤེལ་བྱེད་དུས་ངེས་པར་དུ་དྲ་ཐག་སོར་བཞག་བྱ་དགོས།

རྩོམ་ཡིག་གི་སྦྲེལ་ཐགhttp://www.tbwriters.com/?p=4481