དེ་ཡང་རང་ལོ་སུམ་ཅུ་སོ་གཉིས་པ་ཧོར་ཟླ་བཅུ་གཅིག་པའི་ཚེས་བཅོ་བརྒྱད་ཀྱི་ནུབ་རྨི་ལམ་ན་ནམ་མཁའ་དྲི་མ་དང་བྲལ་བའི་དབུས་སུ་རིན་པོ་ཆེ་མཉན་པ་གྲུབ་ཐོབ་དེ་དར་དཀར་པོའི་དོ་ལིའི་ཁར་རྣལ་འབྱོར་མ་མང་པོས་སྤྱན་དྲངས་ཏེ་འོད་ཟེར་དང་གཟི་བརྗིད་མཚུངས་པ་མེད་པ་ཞིག་གིས་ཤེས་པ་བརྒྱལ་ཐབས་སུ་སོང་བ་དང་རེ་ཞིག་ནས་གཉིད་སད་པས་ནམ་མཁར་ཟླ་བའི་འོད་གསལ་བས་རི་བོའི་གྲིབ་མ་ནག་ཡོར་དུ་བྱས་པ་དང་སྙིགས་དུས་ཀྱི་སྡུག་བསྔལ་གྱི་སེམས་ཅན་མང་དུ་བསམས་ནས་གསོལ་བ་བཏབ་པ།
༈ རྗེ་གཅིག་ལ་ངོ་མཚར་རྨད་བྱུང་བ། །
དུས་དེང་སང་ཙམ་དུ་དྲན་པའི་ཚེ། །
རྗེ་སྲིད་པར་དཀའ་བའི་དཀོན་མཆོག་མཆོག །
སྔར་མཐོང་ངོ་འབྲེལ་བ་དོན་དང་ལྡན། །
ངེད་མགོན་མེད་རྣམས་ཉོན་མོངས་གདོན་གྱིས་སྨྱོ། །
སྨྱོ་ཆེས་པས་རང་སྲོག་རང་གིས་གཅོད། །
བཅད་ཟིན་ནས་ངན་སོང་གསུམ་དུ་ལྷུང་། །
ལྷུང་ཟིན་ནས་ཐར་དུས་མེད་ལུགས་སོགས། །
ད་བསམ་བློ་བཟོད་བླགས་མེད་པ་སྐྱེས། །
དེ་སྐྱེས་པས་ཅི་བྱེད་གཏོལ་དང་བྲལ། །
ཡུས་ཆེས་པས་ལུང་པ་སྟོང་པ་ནི། །
མཚན་མ་ཆོད་སྨྲེ་སྔགས་ཅི་ཡང་བཏོན། །
དུས་ནམ་འཆི་ཆ་མེད་སེམས་ལ་ཤར༑ །
སྐྲག་ཆེས་པས་ཚེ་མཇུག་ཡུད་ཙམ་འདི། །
དོན་མེད་དུ་གཏོང་རེའི་ཁོ་ཐག་བཅད། །
བདག་དམ་ཆོས་རྣལ་མ་མ་བྱུང་ཡང་། །
ཆོས་མིན་གྱི་བྱ་བ་བྱེད་རེ་ཤི། །
ད་མི་ལུས་ཡུད་ཙམ་ཡོད་དུས་འདིར། །
འདོད་ཡོན་སྤུ་གྲིའི་སྦྲང་རྩི་ལ། །
འཁྲུལ་སྣང་ལྕེ་ལྡག་ག་ལ་ཕོད། །
སྐྱེ་འཆི་མཐའ་མེད་སྙིང་རླུང་ལྡང་། །
གནས་འཁོར་བ་འདི་ལས་འབྲོས་སྙིང་འདོད། །
འཁོར་བ་ཤ་བཙོན་དུ་ཤེས་ཙ་ན། །
ད་ཚེ་འདིའི་བྱ་བ་ག་ལ་བྱེད། །
ལས་སྡིག་པས་བསྒྲུབས་པའི་འབྲས་བུ་དང་། །
དེ་རང་དབང་ཐོབ་པའི་བདག་རྐྱེན་དང་། །
གྲུབ་ནས་སྡུག་བསྔལ་མཐའ་མེད་གསུམ༑ །
དུས་གཅིག་ཏུ་འཛོམ་པ་མཐོང་བའི་དུས། །
བྱས་པ་དོན་མེད་ལ་ཡི་མུག་སྐྱེས། །
ཕ་མི་བཟོད་ཐུགས་རྗེ་ཅན་རྣམས་འབོད། །
བསོད་ཟད་རྣམས་སྐྱབས་ཡུལ་གྱི་དཀོན་ལུགས་དང་། །
མཆོད་གནས་རྣམས་སྡུག་བསྔལ་གྱི་མྱོང་ཚབས་དང་། །
གཉིས་ཀ་ཡང་ཆགས་སྡང་གི་བསམ་ལུགས་གསུམ། །
དུས་གཅིག་ལ་ཆུ་ལ་ལྕེབས་པའི་དུས༑ །
བདུད་རྒྱལ་ལོའི་ཡིད་ཆད་གཏིང་ནས་སྐྱེས། །
རང་ལ་ནུས་པ་ཅི་ཡང་མེད། །
ཅི་དྲག་འདི་དྲག་སེམས་ལ་གྱ། །
རྒྱལ་ཁམས་ཀྱི་མི་ལ་བདེ་བ་མེད། །
ཕྱུགས་འབུ་སྲིན་ཡན་ཆད་རང་ཤི་བྲལ། །
མཐོང་ཐོས་དམྱལ་ཐག་གི་གཅོད་ལུགས་དང་། །
ཡོད་དགུ་གཏན་བརླག་གི་གོད་ལུགས་དང་། །
ངལ་བ་འབྲས་མེད་ཀྱི་སྤྱོད་པ་སོགས༑ །
དུས་ད་ལྟ་སྙིང་རླུང་མཐའ་མེད་ལངས། །
ད་དམ་པའི་ལྷ་ཆོས་མ་བྱུང་ཡང་། །
སྲོག་བསྡོས་ཀྱིས་ཚེ་འདི་སྒྲུབ་རེ་ཤི །
ཞེས་གསོལ་ཏོ། །
བཀའ་བརྒྱུད་མགུར་མཚོའི་གོ་དོན་ཁོག་དབུབས་སྤྱི་ཆིངས་རྣམ་པར་བཤད་པ་སྐལ་བཟང་ཡིད་ཀྱི་ངལ་གསོ་ཞེས་བྱ་བ་བཞུགས་སོ།
ཀརྨ་ལེགས་བཤད་གླིང་བཤད་གྲྭ།
པར་དབང་ཁོངས་གཏོགས་ས་ནི་རྩོམ་པ་པོ་དྲ་བ།བརྒྱུད་སྤེལ་བྱེད་དུས་ངེས་པར་དུ་དྲ་ཐག་སོར་བཞག་བྱ་དགོས།
རྩོམ་ཡིག་གི་སྦྲེལ་ཐགhttp://www.tbwriters.com/?p=4478
དཔྱད་མཆན་སྤེལ།