སྐྱོ་ངལ་མིག་ཆུ་བྲུག་པའི་གདུང་དབྱངས།
དང་པོ།
རེད།ཕལ་ཆེར་ཉིས་སྟོང་ཉེར་གཅིག་ལོའི་བོད་ཟླ་དང་པོའི་ཚེས་ཉི་ཤུ་ཡས་མས་ཤིག་ཡིན་པ་འདྲ།གསལ་ཐག་ཆོད་པོ་ཞིག་བཤད་རྒྱུ་མིན།ཉིན་དེ་ནི་འཛུམ་མདངས་མིག་ཆུ་ཡིས་བརླན་པའི་གྲང་ཤུར་ཤུར་གྱི་ཉིན་མོ་ཞིག་ཡིན་ཞིང་།ན་ཟུག་རུས་རྐང་ལ་ཟུག་པའི་གཉོམ་དུང་དུང་གི་མཚན་ལམ་རིང་མོ་ཞིག་ཀྱང་ཡིན།
གཉིས་པ།
ཉིན་དེའི་ཞོགས་པར་ངེད་ཁྱིམ་མི་ཚང་མས་མིག་ཕུར་ཕུར་བྱེད་ཀྱིན་ནངས་ལག་བཀྲུ་བའི་སྐབས་ཤིག་ཡིན།གློ་བུར་ངའི་ཕུ་བོའི་སྐད་འཕྲིན་སྟེང་སྐད་ཅིག་འབྱོར་སོང་།སྐད་དེར་ཉན་མ་ཐག་ཨ་ཅེ་རྒན་མས་ངུ་མ་ལྷབ་ཀྱི་སྐད་ཆ་ཐན་ཐུན་ཞིག་ཙག་སྒྲ་དང་བཅས་ཏེ་བཤད་བྱུང་།ངས་ཕུ་བོར་ཅི་བྱུང་ངམ་ཞེས་བྲེལ་སྟབས་ཀྱིས་དྲིས་པ་ན་ཕུ་བོས་སྐྲག་སྣང་དང་བཅས་ཏེ་〃ཨ་པ་（ཡུལ་སྐད）་ ཡིག་སྐད་དུ(ཕུ་བོXXX ）་ མདང་ནུབ་ཁྱིམ་མཚེས་ཚང་ལ་འགྱིག་འཇོག་ཏུ་སོང་ས་ནས་དེ་རིང་སྔ་དྲོར་ད་དུང་རང་ཁྱིམ་ལ་མ་འབྱོར་ཟེར་ཞེས་བཤད་ཀྱིན་དངངས་སྐྲག་དང་བཅས་ཏེ་སྒོ་ཕྱིར་བརྒྱུགས་ནས་བུད་སོང་།དེ་ནས་ཨ་ཕ་ཡང་བྲེལ་འཚབ་ཀྱིས་ཕུ་བོའི་སྒོར་བརྒྱུགས་ནས་སོང་།ངའི་ཨ་མ་སྤྱིར་ནས་སེམས་སྙི་མོ་བལ་ལས་འཇམ་པ་ཞིག་ཡིན་ཕྱིར་སྐད་ཆ་དེ་ཐོས་མ་ཐག་ཨ་་་ ་་་བྱ་འདི།མདང་ནུབ་སོང་ས་ནས་ད་དུང་ཡུལ་ལ་འབྱོར་མེད་དུས་དངོས་གནས་དོན་རྐྱེན་ཞིག་བྱུང་བ་ཨེ་ཡིན་ནམ་ཞེས་ཟེར་གྱིན་འཚབ་འཚུབ་ཀྱི་ཚུགས་ཀ་གཞི་ནས་མངོན།ངས་ཨ་མ་ལ་ཁ་རོག་སྡོད།དོན་དག་ཅི་ཡང་བྱུང་ཡོད་མི་སྲིད།〃ཨ་པ་（ཨ་ཁུའམ་ཕུ་བོ）་སྤྱིར་རྩེད་མོ་ལ་དགའ་བས་མདང་ནུབ་ཁྱིམ་མཚེས་ཚང་ནས་ཞག་བསྡད་གནང་བ་ཡིན་ཤག་ཤག་རེད་ཅེས་ངུ་ཨ་མའི་སེམས་ཁམས་ལྷོད་ལ་ཕབ།
གསུམ་པ།
དེ་ནས་ཨ་མས་ང་ལ་བཤད་རྒྱུར་འུ་ཚོ་ཡང་འགྲོ་ཟེར།ད་དུང་ཨ་མས་འདི་ལྟར་ལབ།ང་ཚོའི་ས་འདི་རི་གཟར་ལ་གཟར་ཡིན་ཁར་བརྡ་རྟགས་ཀྱང་མེད་པས་ད་ནི་ཞེ་ལྷོད་པོར་སྡོད་ག་ལ་ཐུབ་ཟེར་གྱིན་ཡར་ལངས། དེ་ནས་ངས་ཀྱང་ཨ་མ་དང་སྲི་མོ་གཉིས་ཁྲིད་དེ་〃ཨ་པ་（ཨ་ཁུའམ་ཕུ་བོ）་ཚང་གི་ཁྱིམ་ཚང་གི་ཞོལ་གྱི་དེའུ་འབུར་ཞིག་ཏུ་བུད་ནས་བལྟས་པ་ཡིན།སྐད་ཅིག་མ་དེ་ལ་ངའི་རྣ་ལམ་དུ་དེ་མུར་ཨ་ཅེ་རྒན་མོའི་ངུ་སྐད་བྲག་ཅ་རུ་མཆེད་དེ་གྲགས་བྱུང་།ངས་དེ་མུར་རང་སེམས་སུ་དད་པ་རྩེ་གཅིག་གིས་〃ཨ་པ་（ཨ་ཁུའམ་ཕུ་བོ）་ ལ་སྐྱོན་མེད་པར་སྨོན་ཞེས་ལྷ་བླ་མ་ཡི་དམ་དཀོན་མཆོག་ལ་གསོལ་བ་ཞིག་བཏབ་རྗེས། ཨ་མ་དང་སྲི་མོ་གཉིས་ལ་སྐྱོན་མི་འདུག སྐྱོན་མི་འདུག ཕྱིར་འགྲོ་ཞེས་སྐད་དམའ་མོས་ལན་གསུམ་བཤད་པ་ཡིན།ངའི་ཨ་མའི་སྙིང་ཁམས་དེ་འདྲའི་བདེ་ཐང་མིན་པས་ངའི་རྣ་ལམ་དུ་ཨ་ཅེ་རྒན་མོའི་སྙིང་ལ་གཟན་ཞིང་འཇིགས་སུ་རུང་བའི་ངུ་ངག་འཁོར་བ་དེ་ངས་ཨ་མ་དང་སྲི་མོར་བཤད་མ་ཕོད།ཕར་བལྟས་ན་ཨ་མ་དང་སྲི་མོས་ཀྱང་ཨ་ཅེ་རྒན་མོའི་ངུ་སྐད་དེ་ཅུང་ཐོས་བྱུང་བ་དང་འདྲ།དེ་བས་ངས་མྱུར་བར་ཨ་མ་དང་སྲི་མོ་ལ་འགྲོ་ཡུལ་ལ་འགྲོ།སྐྱོན་མེད་ཁུ་ཞེས་བཤད་པ་ན་ཨ་མ་ངུས་བྱུང་། ངས་ཀྱང་རང་དབང་མེད་པར་མིག་ཆུ་རྡོག་པོ་འགའ་གདོང་ནས་འཐོར་སོང་།
བཞི་བ།
དེ་ནས་ངས་ཨམ་གཙིགས་བསྡམས་ཤིང་ཨ་མ་དང་སྲི་མོ་གཉིས་ཡུལ་ལ་ཁྲིད་པ་ཡིན།ཅུང་མ་འགོར་བར་ང་ཚོའི་སྡེ་བའི་སྐད་འཕྲིན་སྡེ་ཚོམ་ལས་ཤི་སྐད་ཅིག་ཉི་མ་དམར་པོ་དང་འགྲོགས་ནས་གྲགས་བྱུང་།〃ཨ་པ་（ཨ་ཁུའམ་ཕུ་བོ）་མདང་ནུབ་བྲག་གཟར་ནས་ལྷུང་སྟེ་མ་ཚེ་ལས་འདས་སོང་།ཚང་མ་རོགས་རམ་བྱེད་དུ་ཤོག་ཅེས་སྐད་བརྒྱབ་བྱུང་།བླ་མ་མཁྱེན།འཇིག་རྟེན་ཡ།དཀར་ནག་རེས་མོས་ཀྱི་འཇིག་རྟེན་ཡ།གྲང་ཞིང་འཁྱགས་འདར་རྒྱག་པའི་འཇིག་རྟེན་ཡ།ངའི་ཨ་ཅེ་རྒན་མོ་འདིའི་ཅི་བྱ།སྐྱ་ཐིང་ངེར་ལུས་པའི་ཁྱིམ་གཞིས་འདིའི་ཅི་བྱ།ལོ་ན་བཅུ་གསུམ་ལ་མ་སོན་པའི་བྱིས་པ་འདི་གཉིས་ཀྱིས་ཅི་བྱ།རང་བདག་རང་གིས་མི་ཐུབ་པའི་མནའ་མ་འདིའི་ཅི་བྱ།དཀའ་ངལ་དང་སྡུག་ཡུས་ལས་ཐར་མ་ཐག་པའི་ཁོའི་ཕ་ཡར་འདིའི་ཅི་བྱ་ཨང་ཞེས་ངུ་ཤམ་རྒྱག་གིན་ང་དུས་ཡུན་རིང་ཤོས་ལ་ཧོན་འཐོར་ཞིང་ཧང་ཟིང་བར་ལུས།དེ་ལྟར་དགོང་ག་ཆུ་ཚོད་བདུན་བརྒྱད་ཡས་མས་སུ་ཡོད་ཚད་མཇུག་བསྡུས་ཚར།མཇུག་བསྡུས་ཚར་ཟེར་ནའང་ཆེན་པོ་ཅང་མེད་དེ་〃ཨ་པ་（ཨ་ཁུའམ་ཕུ་བོའི）་བེམ་པོ་བྱ་སྐུར་བྱས་རྗེས་ཤི་བོའི་ངོས་ཐད་ནས་ཡོད་ཚད་མཇུག་བསྡུས་པ་དང་འདྲ།ཡིན་ན་ཡང་གསོན་པོ་ཤི་བོ་ལས་སྡུག་ཅིང་གསོན་པོའི་ཤི་བོ་ལས་ལྷག་པའི་སྡུག་བསྔལ་མྱོང་དགོས་པ་ནི་འཇིག་རྟེན་གྱི་འགྲོ་ལུགས་ཤིག་ཡིན་མོད།སྡུག་བསྔལ་དེ་ནི་ཕལ་ཆེར་དུས་ཡུན་རིང་པོ་ཞིག་སོང་རྗེས་རིམ་གྱིས་ཉམས་འགྲོ་བར་ངེས་ལ།ཤམ་ཤམ་འབབ་པའི་གདོང་གི་མཆི་མ་དེའང་ཡུན་གྱིས་སྐམ་སྲིད་པས་དེ་ནི་དེ་འདྲའི་རྟོགས་དཀའ་བའི་ཆོས་ཉིད་ཅིག་མིན་པ་འདྲ།ཡིན་ཡང་ན་ཚོད་མ་ལན་པར།ན་ཚ་མ་ལན་པར།བཙན་ཤིའི་དབང་དུ་གྱུར་པ་ནི་ཇི་འདྲའི་འཇིགས་སྣང་ཆེ་ཞིང་བརྗེད་པར་དཀའ་བའི་དོན་དག་ཅིག་རེད།ཇི་འདྲའི་ཕངས་སེམས་སྐྱེ་ཞིང་བློ་ཡིད་ལ་ཤོང་དཀའ་བའི་དོན་རྐྱེན་ཞིག་རེད་ཨང་།
ལྔ་བ།
རེད་ཡ།འཇིག་རྟེན་པ་ལགས།དེ་རིང་གི་འཛུམ་མདངས་ལ་གཅེས་སྤྲས་མཛོད་ཅིག དེ་རིང་གི་ལྷན་འཛོམས་ལ་སྤྲོ་སྣང་སྦྱིན་ཅིག རྒྱུ་མཚན་དེ་རིང་གི་འཛུམ་མདངས་ནི་སང་ཉིན་གྱི་གྱེས་བྲིད་ཡིན་སྲིད་ཅིང་།དེ་རིང་གི་ལྷན་འཛོམས་ཡང་སང་ཉིན་གྱི་མིག་ཆུ་ཡིན་སྲིད་པས་རྟོགས་པ་མཐོ་རུ་ཐོགས་ཤིག མི་རྟག་འཇིག་རྟེན་གྱི་སྙིང་པོར་སོམས་ཤིག དེ་རིང་སང་ཉིན་ལ་འཆད་དུ་མ་འཇུག སང་ཉིན་ནི་ནག་ཡོར་ཡོར་ཞིག་སྟེ་མི་རྟག་པའི་མཚན་ཙམ་ཡིན་པས་ཤེས་པར་གྱིས་ཨང་།།
རྒྱང་རིང་མིག་གི་འཚོས་པའི་ལམ་འགྲོ་བ།
དང་པོ།
ཉི་རྩེ་ཡི་རི་ཀླུང་གི་མུན་པ་ཐོལ་གྱིས་གསོས་པ་དང་ལྷན་དུ་ཁྱོད་ཀྱང་ཨ་མའི་མངལ་ནས་རྒྱལ་ཁམས་ཀྱི་ལྗོངས་རྣམ་ལ་ཕེབས་བྱུང་།ཁྱོད་ཀྱིས་དང་པོར་མཐོང་བའི་ཁམས་ཆེན་པོ་དེ་ཕལ་ཆེར་འུ་ཚང་གི་ཁང་བའི་དྲ་ཡོལ་ནས་འཕྲོས་པའི་ཉི་འོད་འོག་གི་རི་བོ་ཆུང་ཆུང་དེ་ཡིན་སྲིད་ལ།ད་དུང་རི་འདབས་ན་བེའུ་འཚོ་བའི་བྱིས་པ་པྲ་ཆལ་དེ་ཚོ་ཡིན་ཀྱང་སྲིད།དུས་དེ་ནི་ཁྱོད་རྒྱལ་ཁམས་ལ་ཕེབས་པའི་ཆེས་སྐྱིད་སྣང་ཆེ་བའི་མཛེས་ལྗོངས་ཀྱི་ཉིན་དང་པོ་དེ་ཡིན།།
གཉིས་པ།
ལོ་ཟླ་ཡི་འགྲོས་དང་བསྟུན་ནས་ཁྱོད་ཀྱང་ནར་སོན་ཏེ་ལྗོངས་རྣམ་གཞན་པ་ཞིག་ལ་ཆས་པར་བརྩམས།དུས་རབས་ཀྱི་འཕེལ་ཕྱོགས་ཤིག་གིས་ན་ཆུང་གི་དུས་ནས་ཤེས་རིག་གི་ས་བོན་རྒྱུས་ཆེ་བའི་རང་ཉིད་ཀྱི་དྲན་པར་འདེབས་པ་ནི་ལྡོག་དུ་མེད་པའི་གོ་སྐབས་བཟང་བོ་ཞིག་ཏུ་གྱུར་ཡོད།དེ་བས་སློབ་མ་ཞེས་པའི་མིང་ཚིག་སྣུམ་པོ་དེའང་རིམ་བཞིན་ཁྱོད་དང་འབྱར།ཁྱོད་ཀྱང་མིང་ཚིག་དེར་ཞེ་སེམས་གཏིང་ནས་ཆགས་ཏེ་ཨ་ཕའི་སྒོར་ཁུག་དང་ཨ་མའི་རྩམ་ཁུག་ལས་ཡིད་ཚིམས་པའི་བྲོ་ཁ་ཁྱེར་ཏེ་སློབ་ཆུང་ཞེས་པར་མི་ཚེ་ཡི་གོམ་ཁ་དང་པོ་བསྒྱུར།ཁྱོད་ཀྱིས་དང་པོར་ཤེས་རིག་གི་ལྡིང་ཁང་ནས་དབྱངས་གསལ་སོ་བཞི་བྱིས་ཆུང་ཇོ་ཀའི་གྲེ་འགྱུར་དང་བསྡོངས་ནས་དབྱངས་སུ་གྱེར།ད་དུང་སྣ་མི་གཅིག་པའི་བསླབ་བྱ་གཞན་དག་ཀྱང་རང་ནུས་ཅི་ལྕོགས་ཀྱིས་སྤྱངས་ཤིང་།དགེ་རྒན་གྱི་བརྩེ་བའི་དྲོད་ཁོལ་ཐོག་མ་འཛུམ་མདངས་དང་རྩེད་རའི་ཁྲོད་ནས་མྱངས།དབྱངས་གསལ་དང་དགུ་མཐའི་གོ་རིམ་བར་ནས་དགེ་རྒན་གྱི་བརྩེ་སེམས་ལས་མཆེད་པའི་བཀའ་དྲིན་མཐོང་མྱོང་མེད་ལ།ཕ་མ་ཡི་རྔུལ་ཆུ་ལས་བྱུང་བའི་གཅེས་སེམས་དེ་ཡང་རིག་ཐུབ་མེད།མི་ཚེ་རླུང་གིས་ཁུར་བ་ནང་བཞིན་སློབ་ཆུང་གི་འཚོ་བ་ནས་སློབ་འབྲིང་གི་འཚོ་བར་སྔ་ལྟས་བྱེད་དབང་ཙམ་ཡང་མ་བྱུང་བར་སྐད་ཅིག་ཡུན་ཙམ་ལ་ཤེས་རིག་གི་ལྡིང་ཁང་གཞན་ཞིག་ལ་སྟ་གོན་དང་བཅས་ཏེ་གོམ་པ་ལྷོད་ཀྱིས་སྤོས།སྐབས་དེ་དུས་དགེ་རྒན་གྱིས་ཁྱོད་དང་ང་ཡི་རྣ་ལམ་ལ་བརྩི་བཀུར་དང་ཕུགས་བསམ་ཞེས་པའི་ཐ་སྙད་གསར་པ་ཞིག་བཞག།འུ་ཚོས་ཀྱང་རང་ཉིད་ལ་ཕུགས་བསམ་མང་པོ་ཞིག་བཞག་ནས་མ་འོངས་པར་སྨོན་ལམ་བརྒྱབ་མྱོང་།དམའ་འབྲིང་གི་མི་ལོ་གསུམ་ཁད་ཀྱིས་འདས་ནས་མཐོ་འབྲིང་གི་ཐེམ་སྐས་བཙན་པོ་དེར་ལག་ཟུང་འཇུ་དུས།སྔོན་ཆད་རང་ཉིད་ལ་བཞག་པའི་ཕུགས་བསམ་ཇེ་ཉུང་དུ་སོང་འདུག་པ་རྟོགས།
གསུམ་པ།
མཐོ་འབྲིང་ལ་འཛོམས་པའི་ཉིན་དང་པོར་འུ་ཚོ་རང་རང་གི་སེམས་སུ་ང་ནར་སོན་འདུག།ངས་རང་མགོ་ཐོན་སོང་སྙམ་པའི་བག་ཆགས་ཟབ་མོ་ཞིག་ངང་ངམ་ཤུགས་ཀྱིས་སྐྱེས་བྱུང་།མཐོ་འབྲིང་གི་དགེ་རྒན་རྣམས་ཀྱིས་ཀྱང་ད་ནི་ཁྱོད་ཚོ་ནར་སོན་འདུག།སློབ་ཆུང་དང་སློབ་འབྲིང་གི་སྐབས་དང་མི་འདྲ་བར་ཁྱོད་ཚོ་དེ་རིང་ནས་བཟུང་སློབ་གསོ་དང་བརྩི་བཀུར་ཟུང་ལྡན་གྱི་སློབ་བུ་ཡ་རབས་ཤིག་བྱེད་དགོས་ལ།མ་འོངས་པར་སློབ་ཆེན་གྱི་ཐེམ་སྐས་ལས་གྲོལ་རྗེས་སྤྱི་ཚོགས་ཀྱི་སྤྱི་མི་རྣམ་དག་ཟོལ་མེད་ཅིག་བྱེད་དགོས་ཚུལ་སོགས་ཁ་ལྕེ་ཝུ་བ་དང་ཀླད་པ་ད་ར་བྱས་ནས་ཡང་དང་ཡང་དུ་ལབ།ཙག་ཙིག་དང་དགའ་སྐྱོ་ཡི་མི་ཚེའི་ངུ་དགོད་ཀྱི་སློབ་ཁྲིད་རེ་རེའི་བརྒྱུད་རིམ་ཁྲོད་ནས་མི་ལོ་བཅུ་གཉིས་ལ་དེ་ལྟར་དངངས་འཚུབ་ཀྱི་ངང་ནས་དབུ་ཁྱུད་བྲིས།མི་ལོ་བཅུ་གཉིས་དེ་རང་བཞིན་གྱི་ལོ་ཚིག་ཅིག་མིན་ཏེ།མི་ལོ་དེ་དག་ལ་དྲིན་ཆེན་ཕ་མར་འཛུམ་མདངས་བསྩལ་མྱོང་ལ་འཁང་ར་ཡང་འཇོག་མྱོང་།དགེ་རྒན་དམ་པ་ཚོར་ཡིད་ཆེས་སྟེར་མྱོང་ལ་ལས་བདའ་ཡང་བསྐྱུར་མྱོང་།དེ་ལྟར་སློབ་མའི་འཚོ་བ་བདེན་བདེན་ཅོག་ཅོག་གི་ཟིན་ཐོར་བཀོད།ད་ནི་ང་ཚོ་སློབ་ཆེན་ལ་དབུ་བཙུགས་ཟིན།སློབ་ཆེན་གྱི་སློབ་རའི་མཁའ་དབུགས་རང་དབང་གིས་བཅངས་ཡོད་ནའང་།ང་ཚོས་རང་དབང་དེའི་ཁྲོད་ན་རང་ཉིད་འབོར་ཀྱིན་པ་སུ་ཡིས་གསལ་འདེབས་བྱེད།ང་ཚོས་རང་དབང་དེའི་ཁྲོད་ནས་སློབ་གྲོགས་ཕན་ཚུན་གྱི་བརྩེ་བ་བོར་ཟིན་པ་སུ་ཡིས་བཤད།སློབ་གྲོགས་ཚོ།སྤྱི་ཚོགས་ཀྱི་ཟང་ཟིང་འུ་ཚོ་དང་ཐག་ཉེ་རུ་ཕྱིན་སོང་།སྤྱི་ཚོགས་ཀྱི་གདོང་འབག་སྲ་མོ་དེ་འུ་ཚོ་དང་འབྱར་ལ་ཉེ།མདུན་ལ་ལྟོས་དང་སློབ་གྲོགས་ཚོ།འཆར་ཡན་གྱི་སྒོ་མོ་རིང་དུ་ཕྱེས་དང་།
བཞི་བ།
ད་ནི་སྙིང་ལ་ཉེ་བའི་དྲིན་ཆེན་དེ་ཚོ་སེམས་པའི་བང་རིམ་ལ་ཆོངས་དང་།རྒྱལ་ཕམ་གྱི་ཟམ་ཆེན་ལ་རྐང་པ་མཉམ་དུ་སྤོ།ད་ནི་མིག་ཟུང་ཅེར་བའི་གཉེན་ཉེ་ཚོ་སྣང་བའི་གཤོག་སྟེང་དུ་ཞོག་དང་།འགྲན་རྒྱུག་གི་གོམ་པ་ལྷན་དུ་རྐྱོང་།སློབ་གྲོགས་ཚོ།ང་ཚོ་ནམ་ཡང་རང་ཉིད་ངོ་མ་མི་འབོར་བའི་རང་ཉིད་བྱེད་གཙང་མ་དེ་བྱེད་ལགས།ང་ཚོ་ནམ་ཡང་ཕུགས་བསམ་དང་དགའ་ཕྱོགས་ལ་ཞེན་པའི་རང་ཉིད་ངོ་མ་དེ་བྱེད་ལགས།།
བུ་ཚེ་རིང་གི་མི་ཚེའི་འགྲུལ་བཞུད།
གཅིག
སྤྱིར་བཏང་མི་བུ་སོ་སོར་ཨ་མའི་མངལ་ནས་ལྟེ་ཁྲག་ས་ལ་འཕོས་པ་ནས་མི་ལོ་ཉི་ཤུར་འགྲུལ་བཞུད་ཀྱི་ལམ་བུ་རེ་ཡོད་པ་བདེན་མོད། ཕྲན་གྱི་གྲོགས་པོ་ཚེ་རིང་ཕོ་ལོ་ཉི་ཤུར་སོན་པའི་ཀྱག་ཀྱོག་གི་ལོ་ཟླ་ནི་ནང་བའི་འཇིག་རྟེན་གཞན་ཞིག་གམ་བློ་ངོ་རུ་ཚད་ཤིང་མི་རྙེད་པའི་སྟོང་སྣང་གི་ཁམས་གཞན་ཞིག་ཡིན་པར་སྣང་འོང་། ཡིན་ན་ཡང་ཁོ་རང་འཇིག་རྟེན་འདིའི་འགྲོ་བ་གཞན་ཞིག་གམ་དུས་རབས་ཤིག་གི་འགྲོ་སྟངས་ལ་གོམ་ཁ་མ་ཞོག་པའི་གསར་བུ་འཆལ་པོ་ཞིག་རྩ་བ་ནས་མིན་ཏེ།ཁོ་ཡང་ཕྲན་དང་ན་ཚོད་འདྲ་ཞིང་དབང་བོ་ཡན་ལག་ཚང་བའི་གསར་བུ་བདེ་མོ་ཞིག་ཡིན།
གཉིས།
ཡིན་ནའང་།མི་བུ་རེ་རེའི་ལས་དབང་གི་བགོ་སྐལ་མི་འདྲ་ཞིང་།དཀའ་སྡུག་དང་རྔུལ་ཆུའི་མང་ཉུང་མི་གཅིག་པས།ཕྲན་གྱི་གྲོགས་པོ་ཚེ་རིང་ཡང་དེ་བཞིན་དེ་གཉིས་སུ་མ་མཆིས།བྱིས་དུས་ཀྱི་འཚོ་བར་སྨུག་ནག་གི་གྲིབ་མས་བཙེམས་པའི་ཕྲན་གྱི་གྲོགས་པོ་ཚེ་རིང་ལ་མཚོན་ན།གོང་ནས་ཕ་ཡི་བྱམས་སྐྱོང་འཐོབ་མ་མྱོང་ཞིང་འོག་ནས་གཉེན་གྱི་གོང་བཀུར་ཐོབ་མྱོང་མེད་པའི་བུ་ཆུང་ད་ཕྲུག་ཅིག་ཡིན།ཁོ་རང་ཕོ་ལོ་བརྒྱད་ཀྱི་སྟེང་ཁོ་རང་ཉིད་ཀྱི་མ་རྒན་ལ་དཀའ་སྡུག་གི་ཁྲོད་དུ་ལུས་ཀྱི་རང་མདངས་ཉམས་པས།ཟླ་ངོ་དུ་མར་སྨན་ཁང་དུ་ནད་གསོ་མི་བྱེད་ཐབས་མེད་དུ་གྱུར།གནས་ཚུལ་དེ་འདྲ་བའི་བཙན་འཛུལ་གྱི་སྡུག་ཡུས་ནས་འགོ་བཟུང་སྟེ་ཁོ་རང་ཉིད་ཀྱི་འཚོ་བ་ལོ་ཟླ་ནག་པོ་ཞིག་གི་ཐུ་འོག་དུ་འཐིམས།སྐབས་དེ་དུས་ཕྲན་གྱི་གྲོགས་པོ་ཚེ་རིང་མི་ལོ་བརྒྱད་ཡིན་ཞིང་།ཁོ་རང་ཉིད་ལ་ད་དུང་ཤ་ཁྲག་གི་རྒྱུ་བ་གཅིག་པའི་སྲིང་མོ་ཆུང་ཆུང་ཞིག་ཀྱང་ཡོད་པར་བཤད།སྐབས་དེར་ཁོ་རང་ཉིད་ཀྱི་ཤ་གཅིག་རུས་གཅིག་གི་སྲིང་མོ་ཆུང་ཆུང་དེ་ལོ་གཉིས་ཙམ་ཡིན་འདུག སྤྱིར་བཏང་དུས་རབས་ཉེར་གཅིག་པའི་བྱིས་པ་ཆུང་ཆུང་ཞིག་གིས།སྐད་ཆ་ཡང་གསལ་བོ་མི་ཁྲོལ་པའི་སྲིང་མོ་ཆུང་ཆུང་ཞིག་སྐྱོང་ཞོར་ཁྱིམ་གཞི་ཞིག་གི་མགོ་རྐང་འཛིན་རྒྱུ་རྟོགས་པའི་སྣང་ངོར་ཤོངས་མི་ཐུབ་པའི་དྲན་པ་རིང་མོ་ཞིག་ཏུ་བསམ་ཆོག་ཆོག་ཡིན་མོད།འོན་ཀྱང་ཕྲན་གྱི་གྲོགས་པོས་ས་ཆེན་གྱི་བྲང་གཞུང་ཐོལ་གྱིས་བཀྱགས་ཏེ་ལོ་ཟླ་ནག་པོའི་མདུན་རྒྱབ་ལ་ཕྱིར་སྐོར་དང་ཡང་སྐོར་ཐེངས་མང་བརྒྱབ་མྱོང་ལ།ཐག་ཉེ་རིང་ཀུན་ལ་སྣང་བའི་ངུ་སྐད་ཡང་བཏང་མྱོང་།ད་དུང་ཁོ་རང་ཉིད་ཀྱི་ཨ་མར་ནད་ཀྱིས་གཟིར་བའི་དྲན་གདུང་རིང་མོ་དེའི་ཁྲོད་དུ་སེམས་སུ་འཁྱག་སིབ་སིབ་ཀྱི་རླུང་བུ་ལྡང་གིན་ནངས་སྔ་ལངས་དང་དགོང་འཕྱི་ཉལ་བྱས་ཏེ་མ་ཡི་ལས་དོན་འབའ་ཞིག་གསལ་གསལ་དག་དག་གིས་བསྒྲུབས།
གསུམ།
ཉེ་སྔོན་གྱི་སྤྱི་ཚོགས་ཁྲ་ཁྲ་རིག་རིག་ཡིན་པས།ཁོ་རང་སྐབས་དེར་ལས་ངན་པར་འབད་པའི་མི་བུ་རེ་འགའི་བརྙས་བཅོས་ལའང་ཚུལ་མྱོང་ཟེར།ཡང་ལན་རེར་ཁོའི་ཨ་མའི་དྲོད་འཇམ་གྱི་ཞལ་མདངས་ཡལ་བར་དངངས་ཤིང་།སྐབས་རེར་ཁྱིམ་གྱི་འཚོ་རྟེན་ལ་འདྲེ་ཡི་ལག་པ་བསྲིངས་བར་ཡང་དོགས་མྱོང་ཟེར།དོགས་པ་དང་དངངས་འཚུབ་གྱི་དཀྱོགས་མཚམས་རེ་རེའི་མཚན་གཞུང་དུ་ཁོ་རང་ཉིད་གཡོ་ཧམ་གྱི་ཁྲམ་རྐུན་ལ་འཕྲད་མྱོང་ཞིང་།བརྙས་བཅོས་ཀྱི་རྡུང་རེས་མྱངས་ནས་ཐང་ལ་འགྱེལ་བའི་སྐབས་ཀྱང་མི་ཉུང་ཟེར།ཡིན་ནའང་ཁོས་དོན་དངོས་ཀྱི་འཚོ་བ་གདོང་གིས་བསུས་ཤིང་།སྲིང་མོ་རྒྱབ་ཏུ་ཁུར་ནས་ཞོགས་པའི་ཉི་ཤར་གྱི་ཅོང་ཆེན་དང་འགྲོགས་ནས་ས་ཤུན་གྱི་གློ་སྙིང་ལ་འཇུས་ཤིང་།གྲོ་མ་དང་དབྱར་རྩྭ་ཡི་རིན་གོང་བསོགས་ཏེ་ཨ་མའི་སྨན་རིན་སྤྲད་པ་དང་།འབྲི་མོ་དང་ལྕི་བའི་འཚོ་བར་ཞུགས་ནས་གཞིས་ཁྱིམ་ཆུང་ཆུང་ཞིག་གི་ངོ་གདོང་རིང་ནས་ཡན་དུ་མ་བཅུག བྱིས་པ་ལོ་བརྒྱད་ཟེར་ན་ནི་སྤྱིར་རང་ཉིད་ལ་རང་བདག་མི་ཐུབ་པའི་གནས་བབ་ཅིག་དང་།གཅིན་སྐྱག་ལག་བསྣོག་བྱེད་པའི་བསམ་མེད་ཀྱི་ལོ་ཚོད་ཞིག་ཏུ་འདུག་ཅིང་།ཕྲན་གྱི་གྲོགས་པོ་ཚེ་རིང་ནི་དེ་ལྟ་ལས་ཡེ་ནས་ལྡོག་ཅིང་།བསམ་ཤེས་ནས་རང་ཉིད་ལ་རང་ཉིད་ཀྱི་སྐུལ་ལྕག་གཏོང་བའི་ལང་ཚོ་ཡི་ནམ་མཁར་རེ་བའི་ལག་པ་བསྲིངས་པའི་གྲས་སུ་ཡིན་འདུག།
བཞི།
དེ་ལྟར་ཟླ་ངོ་གསུམ་བཞི་ཙམ་ཁད་ཀྱིས་འདས་ནས།ཨ་མའི་ནད་གཞི་ཡང་ཅུང་ཇེ་བཟང་དུ་སོང་ནས་སྨན་ཁང་ནས་སྒོ་ཕྱིར་འབུད་ཆོག་པའི་དཔང་ཡིག་སྤྲད།ཡང་གཅིག་བཤད་ན་དེ་ནི་དཀོན་མཆོག་གི་མཐུ་བཟང་བོས་མ་དྲིན་མོ་ཆེའི་ཞལ་འཛུམ་གྱི་དྲོད་ཁོལ་མཐའ་དག་ཁོང་མིང་སྲིང་གཉིས་ལ་ཡང་བསྐྱར་གནང་བའི་སྐལ་བ་བཟང་བོ་ཞིག་སྤྲད་པ་ནི་ཅི་ལ་མིན།དེ་ལྟར་ཨ་མ་དྲིན་མོ་ཆེ་སྨན་ཁང་ནས་ཕྱིར་རང་ཡུལ་དུ་ལོག་པ་དང་།བུ་ཆུང་གིས་ཁྱིམ་གཞི་ཆུང་ཆུང་དེ་སྣུམ་ཤིག་ཤིག་དང་དྲོད་འཇམ་འཇམ་ངང་བསྐྱངས་ཡོད་པ་མཐོང་ནས།ཡིད་སེམས་དགའ་བས་བཟི།ལུས་པོ་དྲོད་ཀྱིས་ཁེངས།དེ་ནས་རིམ་བཞིན་འཛུམ་ཆུང་གི་སྐྱེལ་མ་ལྟེམས་པའི་མ་དྲིན་མོ་ཆེས་ཁོ་མིང་སྲིང་གཉིས་ཀ་འཇིག་རྟེན་གྱི་གཤོག་པ་འཚོལ་སའི་ཤེས་རིག་གི་གཤིན་ས་སྣུམ་པོར་འཚོ་བ་ཡི་གོམ་ཁ་བསྒྱུར་དུ་བཅུག།
ལྔ།
ཤེས་བྱ་ཅི་འདོད་མ་ལུས་སྩོལ།།
བདག་གི་བློ་ནི་གསལ་གྱུར་ཅིག།•ཅེས་པའི་ཁ་གཡང་དྲོལ་མོ་ཞིག་དང་བསྡོངས་ནས་མིང་སྲིང་གཉིས་ཀྱིས་སློབ་རའི་སྐས་ཐེམ་གྱི་གཏམ་རྒྱུད་རེ་རེར་རང་ཉིད་ཀྱི་མི་ཚེ་ཕུལ་བར་བརྩམས།འོན་ཀྱང་ཕྲན་གྱི་གྲོགས་པོ་ཁོ་རང་ཤེས་བྱའི་འོ་མཚོ་གཞིམ་པའི་ལམ་ཀ་རེ་རེའམ།གསལ་བོ་བཤད་ན་སློབ་ཆུང་ནས་སློབ་འབྲིང་གི་བར་དུ་གཞན་གྱི་ནག་ཉེས་དང་སྐྱོན་འཛུག་གི་རྡེའུ་ནག་མང་དུ་འཕོགས།ད་དུང་སྐྱོ་སྣང་དང་སྡུག་ཡུས་རུམ་གང་ཁྱེར་ཏེ་མཐོ་འབྲིང་གི་སྒོ་ཐེམ་ལ་ལྷོད་མེད་ཀྱི་ཕུགས་བསམ་བྲིས་ཤིང་།རང་ཉིད་ལ་རང་རློམ་དང་གཞན་གྱི་ཉེས་འདོགས་ལ་རྒོལ་ལན་ཡོད་པའི་ཕྲན་གྱི་གྲོགས་པོས།དཀའ་ཁག་དང་ཉེས་འདོགས་ལ་མགོ་བོ་མ་བསྒུར་བས།རིམ་བཞིན་ས་དེ་ཀའི་མི་རིགས་མཐོ་འབྲིང་གི་སྒོ་ཐེམ་བསྙེགས་པ་ནས་བཟུང་།ཁོ་རང་ཉིད་ཀྱི་མགོ་རུ་བསྐོན་པའི་ཞྭ་ནག་དེའི་སྤུ་མདོག་ངང་གིས་འགྱུར་ཏེ་ལྷགས།རྒྱུ་མཚན་ཁོས་རང་ཉིད་ཀྱི་རང་ཉིད་ལ་གཟིམས་མེད་ཀྱི་ཤེས་བྱའི་སྒྲོན་མེ་འོད་ཆེན་ཏེ་སྦར་བས་ཡིན་འདུག་ཨང་།
དྲུག
དུས་ཀྱི་འགྱུར་བག་དང་བསྡོངས་ནས་མཁའ་དབྱིངས་སུ་སྤྲིན་པའི་རྣ་རྒྱན་བཏགས་ཤིང་།ས་གཞི་རུ་རྟ་ཕོའི་འཚེར་སྐད་འཐོར།ད་ལྟ་ནི་སྡུག་ཡུས་དང་དངན་པའི་མཚོ་མོར་རྐྱལ་མྱོང་བའི་ཕྲན་གྱི་གྲོགས་པོ་ཚེ་རིང་།སླར་ཡང་འཇིག་རྟེན་གསར་པ་འདིའི་པང་ཁ་ནས་འགྲེངས་ཏེ་འདས་ཟིན་པའི་ཁྱིམ་མི་གསུམ་གྱི་དཀའ་སྡུག་གི་ལོ་ཟླར་ཕུགས་བསམ་གསེར་དཀར་གྱི་ལྷན་པ་རྒྱག་པར་བརྩམས།ན་ཟུག་དང་སྨྲེ་ངག་གི་གདུང་དབྱངས་རེ་རེར་ལྷག་བསམ་མ་ཡིག་གི་གད་བདར་བྱེད་པར་ཆས།
བདུན།
རེད་དེ།རང་ཉིད་རང་གི་ལན་ཆགས་སུ་གྱུར་བའི་དུས་གསར་གྱི་གཞོན་པ་ཚོ།དཀའ་སྡུག་གི་མི་ཚེ་ནི་མི་བུ་ཞིག་གི་ལོ་རྒྱུས་ཀྱི་བདེན་པ་རྐྱང་རྐྱང་ཡིན་ལ།ནག་ཉེས་ཀྱི་ན་ཟུག་ལྕི་མོ་དེ་ནི་མི་བུ་ཞིག་གི་འཚར་ལོངས་ཀྱི་མྱོང་བ་ཐེངས་ཤིག་ཏུ་མངོན་པས།ཕྲན་གྱིས་ཀྱང་ལོ་ཟླའི་བྲང་གཞུང་ལ་སྙིང་ཕུར་གདབ་སྟེ་ཟིན་ཐོ་ལྟ་བུའི་སེམས་གཏམ་དམར་རྗེན་འདི་ཕྱིར་མི་ཡུལ་ལ་ཟས་རིན་ཙམ་ཏུ་ཕུལ་འདོད་སོང་།དེ་ལྟ་ན།གྲོགས་ཚེ་རིང་དང་ན་ཚོད་མཉམ་པའི་ང་ཚོས་ཀྱང་རང་རང་སོ་སོའི་འདས་མ་ད་གསུམ་གྱི་ལོ་ཟླའི་ངོ་གདོང་མཐའ་དག་གཅིག་ཏུ་བསྡུས་ཤིང་བསྡུམ་ནས་རང་ཉིད་ངོ་མ་ཞིག་བཞེངས་བསྐྲུན་བྱེད་པར་སྙིང་དཀར་ནག་གི་མཚམས་སུ་རེ་བ་དང་སྐུལ་འདེད་རེ་བྱེད་འདོད་སྐྱེས་སོང་།།
བརྒྱད།
སྤྱིར་གྲོགས་པོ་ནི་རང་ཉིད་ཀྱི་འཁང་ར་དང་སྨྲེ་ངག་འདོན་ས་མིན་ལ། དགའ་སྐྱོ་ཡི་ལས་དབང་གླེང་ས་ཡིན་པས། གྲོགས་ལགས་ཀྱིས་ཀྱང་རང་ཉིད་ཀྱི་མི་ཚེའི་གཏམ་རྒྱུད་མཐའ་གཅིག་ཏུ་ང་ལ་ལབ་བྱུང་བས། ཕྲན་གྱིས་ཀྱང་སེམས་གཏམ་འདི་རྣ་རྒྱབ་ཀྱི་རླུང་ལྟར་མ་དོར་བར། གྲོགས་ཁོང་གི་ལོ་ཟླ་ནག་པོའི་ཞེན་ཆགས་འདི་ཐ་སྙད་ཀྱི་སྙི་ས་ནས་འཐེན་ཏེ་གདུང་བ་འདི་ཉམས་སུ་མྱངས་ཚར་དེ་སྨྱུག་ཁ་རུ་བརྡལ་བ་ལགས། གྲོགས་པོ་ལགས། དེ་རིང་ནས་ལས་དབང་གི་མཐུ་བཙན་པོ་དང་འཚོ་བ་ཡི་གཤིས་སྐྱོ་བོ་འདི་ཁྱོད་ཀྱི་ཕྲག་སྟེང་ནས་ལྷོད་ཀྱིས་བཞུད་པས། ངས་ཁྱོད་རང་ཚོན་མདོག་སྟོང་གི་བྱུག་པའི་གསེར་གྱི་ལམ་ཆེན་ལ་བསྙེག་པར་ཟིན་ཐོ་འདི་དང་བཅས་ཏེ་གསོལ་བ་དང་སྨོན་ལམ་ཞུ་འདོད། ཕྱིར་དྲན་གྱི་ལས་དབང་བཙན་པོ་དེ་དེ་རིང་སྡུག་ཡུས་འབུམ་གྱིས་གཙེས་པའི་དུར་ཁྲོད་དུ་འཆི་བར་སྨོན།
དགུ།
གྲོགས་པོ་ལགས། ཕྲན་གྱི་གྲོགས་པོ་ཚེ་རིང་ལགས། དེ་རིང་ནས་དཀའ་སྡུག་གི་ན་བུན་ཁད་ཀྱིས་དཀྲོགས་དང་། འུ་གཉིས་མཉམ་དུ་སང་ཉིན་གྱི་ནམ་མཁར་མཛེས་སྡུག་གི་དབུ་ཁྱུད་འབྲི། འུ་གཉིས་ལྷན་དུ་ཁ་སང་གི་ནག་ཉེས་ལ་ཤེས་བྱ་ཡི་དག་ཐེར་བྱེད། ཕྲན་གྱི་གྲོགས་པོ་ལགས། འདས་ཟིན་པ་ནི་ཁ་སང་ཡིན་ལ་བཞུད་དགོས་པ་ནི་སང་ཉིན་ཡིན། གྲོགས་པོ་ལགས། སང་ཉིན་མང་པོ་ཞིག་སྔར་བཞིན་ང་ཚོའི་མདུན་ན་འགྱིང་ཡོད་ངེས་པས། ང་ཚོ་སྔར་ནས་གསོན་དགོས་ལ། གསོན་པ་ལའང་དོན་སྙིང་ཡོད་དགོས། དོན་སྙིང་དེ་རྒྱུ་མཚན་སྟོང་གི་ཕར་ནང་ན་ཡོད་རུང་། གསོན་པ་ནི་ཁྱོད་ཀྱི་ཆེད་ཡིན་ལ། ང་ཡི་ཕྱིར་ཡིན་ཞིང་། རང་ཉིད་ཀྱི་དྲིན་ཆེན་དེའི་སླད་དུའང་སྲིད། དེ་བས་འུ་གཉིས་འཇིག་རྟེན་གྱི་གཤོག་པ་རྐྱོང་དུ་འགྲོ། བདེན་རྫུན་གྱི་སྟབས་ག་འཚོལ་དུ་ཆས། ཕྲན་ཆུང་ཡི་རིང་བའི་མནའ་གྲོགས། ཕྲན་གྱི་བློར་འབབ་པའི་ཚེ་གྲོགས་ལགས།།
དཀར་ནག་རྐྱ་འཐབ་པའི་མི་ཚེ་འདི་ཤིན་ཏུ་རིང་ཨང་།
མི་ཚེ་གཅིག་ནི་ཉི་མ་ལ་མགོ་ནས་ཤར་ཏེ་ལ་འདབས་སུ་རྒྱག་པའི་སྐད་ཅིག་མ་ལྟ་བུ་ཞིག་ཡིན་ཟེར་མོད།འཁོར་བའི་ཕྱི་ནང་དང་འཚོ་བའི་མངར་སྐྱུར་ལ་འདང་ཞིག་བརྒྱབ་ན་མི་ཚེ་ནི་མཛེས་པའི་འཇའ་འོད་མདུན་ངོས་ནས་ཤར་ཞིང་སྡུག་པའི་ན་མུན་རྒྱབ་ཕྱོགས་གོན་པའི་སྣེ་གཉིས་དཀར་ནག་ལས་གྲུབ་པའི་ལམ་ཕྲན་ཀྱག་ཀྱོག་ཅིག་རེད།
མི་འགའ་ཞིག་གིས་ཞེན་ཆགས་དང་རྟག་འཛིན་ནང་སེམས་ཀྱི་ངོས་སུ་ཟིན་ཐོ་རུ་བྲིས་ཏེ་གོམ་གསུམ་སྔོན་དང་དབུགས་རིང་རྗེས་སུ་འཇོག་པ་ནི་མི་ཚེར་ཁ་ལོ་སྒྱུར་སྟངས་ཤིག་ཏུ་ངོས་འཛིན་མོད།ལས་དབང་གི་ཐིག་རྟགས་སྟེང་དུ་རང་ཉིད་ལ་དབང་བའི་སྟོང་ཆ་ག་ཙམ་ཡོད་པ་ནི་ཁྱོན་ནས་ཤེས་ཀྱི་མེད་ལ།གདུང་སེམས་དང་འཛུམ་མདངས་གཞི་གཅིག་ཏུ་བསྲེས་ཏེ་དཀར་ནག་རྐྱ་འཐབ་པའི་མི་ཚེ་རིང་མོ་ཞིག་སྒྲིག་གིན་ཡོད།
སྤྱིར་དུས་ཀྱི་སྔ་ཕྱི་ཙམ་དང་སེམས་ཀྱི་འདུ་འགོད་ཙམ་གྱིས་མི་ཚེར་ཚད་ཤིང་རིང་དུ་འཇོག་པ་ནི་སྟོང་བསམ་རིང་ལུགས་པ་ཞིག་གི་བྱེད་སྟངས་ཡིན་པས་དྲན་ཕྱོགས་དེ་ལྟ་བུ་ནི་རིང་དུ་དོར་ཏེ་མི་ཚེ་ནི་སང་ཉིན་གྱི་ཐོ་རེངས་དང་གནང་ཉིན་གྱི་མཚན་སྨག་ལ་དཔེ་བལྟས་པས་ཆོག་ལ།སྙིང་གི་འཕར་འཇགས་དང་འཚོ་བའི་བཏང་སྙོམས་ལ་འཕྲོད་པའི་གདམས་ངག་ཅིག་ཏུ་གོ་བ་བླངས་ཀྱང་མི་ཆོག་པ་མེད་དོ་སྙམ།
གལ་སྲིད་འཇིག་རྟེན་སྟེང་མི་ཚེར་ཡང་དག་གི་མཆན་རྒྱག་མཁན་ཞིག་ཡིན་ན་ནི་རྣམ་ཤེས་ཕྲ་མོའི་འཕོ་ཉུལ་ལས་སང་ཉིན་ཤི་ཡང་མི་ཚེ་འདི་ཤིན་ཏུ་རོལ་སྙིང་སྤྲོ་བ་ཞིག་ཏུ་གོ་བ་ལེན་ཐུབ་ཀྱི་ཡོད།དེ་ལྟར་བྱེད་ཐུབ་ན་མི་ཚེའི་དཀར་ནག་གཉིས་ཁ་སྐོང་ཐུབ་ཀྱི་ཡོད་ལ།ཡིད་ཆེས་དང་དྲན་གསོ་གསོན་པོ་ཞིག་ཀྱང་མི་ཡུལ་གྱི་མངའ་ཐང་ལ་སྤྲོད་ཐུབ་ཀྱི་ཡོད་དོ།
ཞིབ་ཏུ་བསྡུས་ཤིང་ལེགས་པར་བཤད་ན།འཇིག་རྟེན་འདིར་རྣམ་ཤེས་གཡར་མ་ཞིག་ལ་མི་ཚེ་ཞེས་བཏགས་ཤིང་།འཚོ་བའི་ཉིན་སྲིབ་གཉིས་ལ་སྐྱིད་སྡུག་ཅེས་ཐོགས་ཡོད།དེ་བས་སྒྱུ་མའི་ཆོས་ཉིད་ཉེ་བར་བཟུང་སྟེ་ཞིབ་རྩིས་ཤིག་བརྒྱབ་ན།དཀར་ནག་རྐྱ་འཐབ་པའི་མི་ཚེ་འདི་ནི་ཤིན་ཏུ་རིང་སྣང་ཞིག་ཀྱང་སྟེར་རོ།།
ཟ་རྒྱུ་འཐུང་རྒྱུ་ཡོད་ན་བཟང་། བཤད་རྒྱུ་རྩོད་རྒྱུ་མེད་ན་བཟང་།
མི་ཡུལ་ནི་སྤྱིར་བཏང་ནས་ཟང་ཟིང་གི་འཐབ་ར་ཆུང་ཆུང་ཞིག་ཡིན་པ་བདེན་མོད། ཡིན་ཡང་མཐའ་དག་མི་སེམས་ཀྱི་ཉམ་རྒུད་ཀྱིས་བསྐྲུན་པ་ཤ་སྟག་ཡིན་པས།མི་ཆེན་དཔོན་ཆེན་ཡིན་ན་འདྲ། ཁ་ཆུང་དབང་ཆུང་ཡིན་ནའང་ཆོག མཐའ་ན་ནུས་མེད་སྤྲང་པོ་སོགས་སུ་ཞིག་ཡིན་ཡང་འཇིག་རྟེན་མི་ཡུལ་གྱི་མཐུན་ལམ་ལ་འབད་པ་བྱེད་རྒྱུ་ནི་ཤིན་ཏུ་གལ་ཆེའོ་སྙམ།
དེ་ལས་ཀྱང་གཙོ་ཆེ་བ་ནི་སེམས་ཁམས་དང་ལྟོ་རྒྱབ་ལ་འབྲེལ་བ་དམ་ཟབ་ཡོད་དེ། སེམས་ཁམས་དང་ལྟོ་བ་རྒྱས་ན་ད་གཟོད་རང་ཉིད་ཀྱི་འཇོན་ཐང་མངོན་པ་འགྲིག་འདུག་ཅེས་བཤད་ཀྱང་མི་ཆོག་པ་མེད། མ་གཏོགས་སྤྱི་ཚོགས་ཀྱི་ཁ་ཕྱོགས་ལ་བསྟུན་དྲག་ན་མིའི་གཤིས་སྤྱོད་ལ་འགྱུར་བ་འགྲོ་སླ་ཞིང་། དཔལ་འབྱོར་གྱི་རིག་ལམ་འཁྲུལ་བ་ཡིན་ན་ལྷག་པར་རང་གིས་རང་ལ་གནོད་པ་ཚབ་ཆེན་སྐྱེད་སྲིད་པས། མི་ཚེའི་མཐར་ཐུག་གི་བདེ་བ་ཡང་དག་ངོས་ཟིན་པ་བྱུང་ན་ད་གཟོད་ཆོག་ཤེས་བྱེད་པར་གོམས་ན་འགྲིག་གོ།
སྤྱིར་བཏང་མི་ཡུལ་དུ་སྐྱེས་པའི་རྐང་གཉིས་འགྲོ་བ་ཞིག་ཡིན་ན་མ་མཐའ་ཡང་མི་རྟག་པ་དང་རྟག་པའི་རང་བཞིན་ལ་རང་ནུས་ཀྱིས་དཔྱད་ན་ཤིན་ཏུ་འཐུས།དེ་ལྟར་མ་བྱས་པར་ཁེ་ཕན་གྱི་དོན་དུ་རྒྱུ་འབྲས་དང་དྲང་བའི་ལྟ་བ་བོར་བ་ཡིན་ན།སྤྱི་ཚོགས་ཀྱི་གད་སྙིགས་དང་རུས་རྒྱུད་ཀྱི་ཞབས་འདྲེན་དུ་གྱུར་འགྲོ་བས་བསམ་ཤེས་རང་གིས་བྱས་ཏེ་གོམ་མཚམས་རན་པར་བཞག་ན་འོས་སོ།མི་ཡུལ་ནི་ཆགས་སྡང་གིས་གྲུབ་ཅིང་འཁོར་བ་ནི་མངར་སྐྱུར་ལས་བྱུང་བ་ཤ་སྟག་ཡིན་པས།རང་གི་ནང་སེམས་ཀྱི་དན་རྟགས་ལ་ཁྲེལ་ཡོད་བྱས་ཏེ་མི་ཚེའི་སྤྲོ་དགའ་སྡུག་གསུམ་ཁུ་སིམ་གྱིས་རོལ་ན་སྤྱི་ལ་འཕྲོད་ཅིང་རང་ལ་འཚམ་པའི་འཚོ་སྟངས་ལེགས་ཤོས་ནི་དེ་ལས་མ་འདས་སོ།
མགོ་འཕང་གནམ་ལ་བཏེགས་ཏེ་འཇིག་རྟེན་གྱི་ཕྱི་ནང་ཉུལ་འདོད་པ་ནི་འཁྲུལ་སྣང་ཤ་སྟག་ཅིག་སྟེ།རང་གིས་རང་ལ་གསོན་ཐོག་ནས་དམྱལ་བའི་འཕྲང་ལམ་གཞན་ཞིག་བཙལ་བ་དང་ཁྱད་པར་ཆེན་པོ་མེད།རྒྱུ་མཚན་འཇིག་རྟེན་སྟེང་གི་འགྲོ་བ་མཐའ་དག་ནི་མཛུབ་མོ་ལྔ་དང་འདྲ་སྟེ།རིང་ཐུང་ནི་སོ་སོའོ།ཁྱོད་མཐོ་ས་དང་ང་དམའ་ས།ཡང་ན་གཞན་གང་དེ་བཙན་པོ་དང་ཁྱོད་དང་ང་ནི་གཉོམ་པོར་སྡོད་དགོས་སའང་ཡོད་སྲིད།དེ་ཡང་འགྲན་རྩོད་ཀྱི་གྲུབ་འབྲས་ཤིག་ཡིན་ཡང་ཐང་མོད།དོན་དམ་དུ་དེ་ནི་ལས་འབྲས་ཤིག་དང་ཆོས་ཉིད་ཅིག་ལས་ང་རྒྱལ་གྱི་ངར་སྐད་སྒྲོག་དགོས་དོན་གང་ཡང་མེད་དོ།གནའ་བོའི་བཤད་སྲོལ་ཞིག་ལ།༼ གཉོམ་ཆུང་འདུག་ཤེས་ན།བཙན་པོའི་སྒུལ་མི་ནུས།༽ ཞེས་པ་ནང་བཞིན་རེད།ཡང་གཅིག་བཤད་ན་གཉོམ་པོར་འདུག་དགོས་ས་ནས་བཙན་སྐད་འདོན་པ་ནི་གླེན་ཞད་རྐྱང་རྐྱང་ཞིག་ཀྱང་ཅི་ལ་མིན་ཨང་།དེ་བས་དོན་ཅི་དང་གང་ཡིན་ཡང་གཙོ་བོ་མནོ་བསམ་ཞིབ་མོ་བཏང་ནས་ན་དེ་ནི་མི་ཡུལ་གྱི་འགྲོ་སྟངས་རྣམ་དག་ཅིག་ཡིན་ལ།སྤྱི་ཚོགས་ཀྱི་ཡང་དག་པའི་ཁ་ཕྱོགས་གལ་ཆེན་ཞིག་ཏུའང་ཆགས་ཀྱི་ཡོད།
ལོ་གཞོན་པའི་དུས་སུ་ཁ་ཕོ་ཆེ་བ་ནི་ཁྱད་ཆོས་ཤིག་ཡིན་མོད།རྒས་དུས་སུའང་ད་དུང་ནམ་མཁའ་བདག་ཏུ་བྱེད་འདོད་ཀྱི་ང་རྒྱལ་ཡོད་པ་ནི་ཇི་ལྟར་བལྟས་ཀྱང་མིག་ལ་མི་རན་པའི་བྱ་སྤྱོད་ཅིག་ཡིན་འདུག ཁྲ་ཁྲ་རིག་རིག་གི་འཇིག་རྟེན་འདིར་མི་སུ་ཞིག་ཡིན་ཡང་རང་ཉིད་རྒྱལ་བར་མི་འདོད་པ་ཞིག་ཡོད་མི་སྲིད་མོད།ཞིབ་ཏུ་བསམ་སྟེ་ཁེངས་སྐྱོང་བྱེད་པར་ལོབས་པ་ཡིན།ཧ་ཅང་བདེན་པར་བརྩིའོ།མ་ཟད་རྩོད་པ་དང་འགྲན་སེམས་ཡང་དག་པར་བྱེད་པ་ལས་ཨུ་ཚུགས་ཀྱིས་རང་མགོ་རྡོ་ལ་བརྒྱབ་ན་སྙིང་རྗེ་སྐྱེ་མཁན་གང་ཡང་མི་འདུག་ལ།ལྷག་པར་ངན་ཁག་འགེལ་མཁན་ནམ་ལེ་བདའ་བྱེད་མཁན་གཅིག་ཐོག་གཉིས་བཞག་བྱས་ཏེ་འབྱུང་སྲིད།ཡང་བཤད་སྲོལ་ཞིག་ལ།༼ བསམ་བློ་སྔོན་ལ་བཏང་ན་མཁས་པ་ཡིན།འགྱོད་པ་རྗེས་ནས་སྐྱེས་ན་གླེན་པ་ཡིན།༽ ་ཞེས་པ་དངོས་གནས་བདེན་ཏེ།རྒྱུ་ནོར་ག་གེ་མོ་ཞིག་གམ་གནས་སྐབས་ཀྱི་ངོ་སོ་ཙམ་འཐོབ་ཕྱིར་རང་ཉིད་ལ་འོས་མེད་དང་།རྒྱལ་ཁབ་དང་སྤྱི་ཚོགས།རང་གི་རི་སྡེ་ཉེ་འབྲེལ་ལ་འོས་མེད་གཏོལ་མེད་བྱེད་པ་ནི་ཆེས་རིན་ཐང་མེད་པའི་མཐར་སྡུག་གི་བྱ་སྤྱོད་སྤེལ་སྟངས་ཤིག་ལས་གང་ཡང་མ་ཡིན་ནོ།
དེང་གི་ཆར་འབྱོར་བ་རྐྱང་རྐྱང་ལ་དམིགས་ཏེ་ཕུ་ནུའི་བར་དང་།ཁྱིམ་མཚེས་བར།རི་སྡེའི་བར་དུ་རྩོད་གླེང་དང་ཕྲག་དོག་བྱུང་དང་འབྱུང་གིན་པ་ནི་མངོན་གསལ་རེད།སྤྱིར་བཏང་ནས་དཔལ་འབྱོར་ལ་མི་དམིགས་ཟེར་ན་དཀའ་མོར་ཆགས་ཀྱི་འདུག རྒྱུ་མཚན་རང་ཉིད་ལ་འོས་ཤིང་འཚམ་པའི་མ་རྩ་ཞིག་མེད་ན་འཚོ་བར་བྲོ་བ་རྣལ་མ་ཞིག་ཡོང་མི་སྲིད་པ་གཞིར་བཞག་རེད།ཡིན་ཡང་འབྱོར་བ་རྐྱང་རྐྱང་ལས་བརྩེ་བ་དང་ཡིད་ཆེས་བོར་ཏེ་མཐའ་（བྲག་གམ་གཡང་གཟར）་ཆུ་མེད་པར་ལྕེབས་ན་ནི་དེ་ཡང་འཚོ་བའི་རིན་ཐང་བོར་བའི་རྟགས་ཤིག་ཨེ་ཡིན་སྙམ།ཡང་གཅིག་བཤད་ན་གཞན་སྒེར་སུ་ཡིན་ཡང་ཞེ་ལྷོད་ལྷོད་ངང་སྡོད་དུས་སྔོན་བྱོན་ཕ་མེས་ཡང་མེས་ཀྱི་རིང་ལ་བསམ་བློ་ཞིག་བཏང་ན་གསལ་ཁ་ཕྲན་བུ་རེ་ལོས་ཡོད་སྙམ།
མཐར་ཚིགས་སུ་བཅད་པའི་ཤོ་ལོ་ཀ་ཞིག་གིས་མཇུག་གྲུབ་པར་བྱེད་དགོས་སོང་།རྒྱུ་མི་རྟག་རྩྭ་མགོའི་ཟིལ་བ་ཡིན།།ཚེ་མི་རྟག་ལ་ཁའི་ཉི་མ་ཡིན།།ནང་སེམས་ཀྱི་ཞི་བདེ་རྙེད་སོང་ན།།ལུས་ཚ་གྲང་མྱང་ཡང་བདེ་སྣང་ཆེ།།
མེ་ཏོག་རྐང་གཅིག་དང་དྲན་པ་རྡོག་གཅིག
ཁེར་ཧྲེང་ངེར་ལུས་པའི་དྲན་པ་ནི་རབ་རིབ་མག་མོག་ཅིག་སྟེ།ས་སྲོད་རེ་རེར་ཅིས་ཀྱང་ངུ་སྙིང་བྲོ་བའི་གཏམ་རྒྱུད་མང་པོ་ཞིག་ཚེར་གསེབ་ཏུ་ལྷུང་བའི་ལུག་བལ་ཇི་བཞིན་བདག་གི་དྲན་པའི་སྙི་ས་རུ་འབྱར་ཏེ་ཡོང་།
ངས་ནམ་རྒྱུན་ནང་སེམས་སུ་བཞེངས་པའི་མེ་ཏོག་གློ་དམར་དེར་འགྲམ་པ་གླན་ནས།སྐྱིད་མ་སྡུག་གི་འཚོ་བའི་ཉིན་སྲིབ་ཀུན་དུ་རང་དབང་དང་འདྲ་མཉམ་ཞེས་པའི་གསལ་ལྗེན་ལྗེན་གྱི་བགྲོད་ལམ་ཞིག་མེད་ཚོད་ལབ་པ་ཡིན།ཡིན་ཡང་འདས་དོན་ལ་ཕྱིར་ལྡོག་ཕྲན་ཙམ་ཡང་མེད་པའི་མེ་ཏོག་གློ་དམར་དེར་མཚོན་ན་རང་དབང་དང་འདྲ་མཉམ་ནི་རུས་སྦལ་གྱི་སྤུ་བཞིན་དུ་སྣང་བས།སྐབས་རེར་ངས་རང་ཉིད་ལ་ཆེས་དམིགས་བསལ་གྱི་འདྲི་གཞི་མང་པོ་ཞིག་འཕངས་པ་ཡིན།རྒྱུ་མཚན་ང་ནི་དྲན་པ་གཞན་དབང་དུ་གྱུར་བའི་གཞོན་ནུ་ནུས་མེད་ཅིག་བྱེད་མ་འདོད་པས་ཡིན་ལ།རང་ཚུགས་རང་གིས་ཐུབ་ཅིང་ཕྱིར་རྒོལ་གྱི་ཐབས་ལམ་ཁོང་དུ་ཆུད་པའི་གཞོན་ནུ་རྣམ་དཔྱོད་ཅན་ཞིག་བྱེད་བསམ་པས་ཡིན།
སྤྱིར་མེ་ཏོག་རྐང་གཅིག་ལ་བརྟེན་ནས་བདེན་ལུགས་ཀྱི་གྲི་ཁ་རྣོན་པོ་ཞིག་བཏོད་རྒྱུ་ནི་སུས་ཀྱང་མི་ནུས་པའི་རྨི་ལམ་མཚར་པོ་ཞིག་ཡིན་ཡང་། དེ་ནི་ངའི་རྨི་ལམ་ཉིད་འཕོས་ཏེ་བྱུང་བའི་ལག་ལེན་གྱི་ཆ་ཤས་ཤིག་ཡིན་ཞེས་བཤད་ནའང་མི་ཆོག་པ་མེད་དོ་སྙམ། ངས་རྒྱུན་པར་མེ་ཏོག་གློ་དམར་དེར་བཅོས་མིན་གྱི་ནང་སེམས་གླན་ཐེངས་རེར་སྒྱུ་འཕྲུལ་མ་ཡིན་པའི་རུས་གསེང་གི་འདུན་པ་དྲག་པོ་ཞིག་རྩལ་གྱིས་བཏོན་པ་ཡིན་ལ། རྒྱང་རིང་མ་ཡིན་པའི་རྒྱང་རིང་དེ་ལ་བདེན་ལུགས་ཀྱི་མིག་འབྲས་བར་མེད་དུ་གཏོར་བ་ཡིན།དེ་ནི་ནང་སེམས་ཉིད་གཏོང་ཕོད་ལ་བརྗེས་པའི་མངོན་མི་ཐུབ་པའི་རྨི་ལམ་ཞིག་ཡིན་ཡང་ཐང་མོད། གང་ལྟར་ངའི་དྲན་པ་རྡོག་པོ་འདི་ནི་མཐུར་ལས་ཤོར་པའི་ཅང་ཤེས་ལྟར་འཛིན་འདོད་ཀྱང་ཟིན་ཐབས་ནི་ཁྱོན་ནས་མེད་དོ།།
མེ་ཏོག་གློ་དམར། ང་ནི་ཐང་སྟོང་དུ་ལུས་པའི་དྲན་པ་རྡོག་པོ་དེའི་རྣམ་ཤེས་ཡིན་ལོས་ཆེ་ཞིང་།ངས་རྟག་པར་ཁེར་ཚུགས་དང་དྲང་བདེན་གླེང་སྟབས།ངའི་བྲང་གཞུང་ཧྲིལ་པོར་རྣམ་ཤེས་གསར་པའི་དཀྲོལ་སྒྲོག་གི་ལེའུ་འབའ་ཞིག་འཕར་རྒྱུག་བྱེད་བཞིན་འདུག་ལ།ངའི་ཕུགས་འདུན་དེ་ཡང་ཅིས་ཀྱང་སྟོན་ནམ་རིང་མོ་ཞིག་གི་མཚར་སྒྲུང་དུ་འགྱུར་ཉེན་ཆེ།
དེའི་ཕྱིར་ན། རྨི་ལམ་ལ་དམིགས་འབེན་བཙུགས་པའི་ང་རང་མེ་ཏོག་གློ་དམར་དེའི་དྲི་བསུང་ལ་རོལ་ནས་རྒྱང་ནས་རྒྱང་དུ་འགྲོ་ཕོད་ཅིང་། ངའི་གོམ་ཆུང་རེ་རེར་ཡང་སུས་ཀྱང་གླེང་རུང་བའི་བརྗོད་གཞི་མང་པོ་ཞིག་ཡོད་པ་ང་ལ་ཡིད་ཆེས་ཡོད།།
པར་དབང་ཁོངས་གཏོགས་ས་ནི་རྩོམ་པ་པོ་དྲ་བ།བརྒྱུད་སྤེལ་བྱེད་དུས་ངེས་པར་དུ་དྲ་ཐག་སོར་བཞག་བྱ་དགོས།
རྩོམ་ཡིག་གི་སྦྲེལ་ཐགhttp://www.tbwriters.com/?p=4352
དཔྱད་མཆན་སྤེལ།