ཁ་པར་གླེང་བ།

སྒ་རྒན་ཀུན་བཟང་རིག་འཛིན༎

ལས་ཀར་འཐུས་ཤོར་མི་ཡོང་སྟབས་བདེ་ཡོང་ཕྱིར།།
བདེན་རྫུན་གོ་འཛོལ་མི་ཡོང་གསལ་པོར་འབྱེད་ཕྱིར༎
ཁ་པར་ཁ་པར་ཟེར་བ་ཤིན་ཏུ་བཟང་ཡང་།།
འབྲས་བུ་ལྡོག་ནས་ཐོན་ན་དེ་འདྲའི་སྐྱོ་ཨང་༎

ཤར་ནུབ་ཕྱིན་ཅི་ལོག་པའི་རྫུན་གཏམ་སྨྲས་པའི༎
བྱས་རྗེས་མང་དུ་ཡོད་པ་ཁ་པར་འདི་རེད༎
ཡོད་མེད་གསལ་ཆ་མེད་པར་སྨྱོ་ལབ་བྱེད་པའི༎
རྫུན་དང་དཀྲོག་གཏམ་གླེང་ས་ཁ་པར་འདི་ཡིན༎

བཟང་ན་འཛམ་གླིང་མཐོང་སའི་སྐར་ཁུང་འདི་ཡིན༎
ཉེས་ན་མུན་པར་གཡུག་མཁན་བྱེད་པོ་འདི་ཡིན༎
བཟང་ན་ཤེས་རིག་ནོར་བུའི་བང་མཛོད་འདི་ཡིན༎
ཉེས་ན་ཤེས་བྱའི་བཀག་རྡོ་ཁ་པར་འདི་ཡིན༎

བཟང་ན་ཐར་ལམ་ཐོབ་པའི་ལམ་ཡིག་འདིར་ཡོད༎
ཉེས་ན་སྡོམ་པ་འཕྲོག་མཁན་ཁ་པར་འདི་རེད༎
བཟང་ན་དམ་པའི་བཀའ་སློབ་དག་མ་འདིར་ཡོད༎
ཉེས་ན་ངན་པའི་ལམ་ལ་འཁྲིད་མཁན་འདི་ཡིན༎

བཟང་ན་གཉེན་ཉེའི་འབྲེལ་ལམ་མ་ཆད་འདིས་ཡོང་༎
ཉེས་ན་བཟའ་ཚང་གསོན་བྲལ་ཁ་པར་འདིས་གཏོང་༎
བཟང་ན་ལོ་ཆུང་སྙིང་གཏམ་གླེང་ས་འདི་ཡིན༎
ཉེས་ན་མགོ་ལ་འཐོམ་ཞྭ་ཁ་པར་འདིས་གཡོག།

བཟང་ན་བརྒྱ་གོ་གཅིག་ཆོད་ཁ་པར་འདི་རེད༎
ཉེས་ན་རྙོག་གྲའི་སྒམ་ཆུང་ཁ་པར་འདིས་ཕྱེ༎
བཟང་ན་སྒོར་མོར་གྲོན་ཆུང་ཁ་པར་འདིས་ཐུབ༎
ཉེས་ན་སྒོར་མོའི་ཟ་འདྲེ་ཁ་པར་འདི་རེད༎

མདོར་ན་ཁ་པར་འདི་ནི་ཀུན་ལ་མཁོ་ལ༎
སྤྱོད་ན་ལེགས་ཉེས་དྲང་ལྡོག་གཉིས་སུ་མཆིས་ཀྱང་༎
རྩེད་སྟངས་ཚད་དང་རན་པ་ཤེས་རྒྱུ་མེད་པས༎
བདག་སོགས་ཁ་པར་དེ་ཡི་བྲན་དུ་འགྱུར་ཟིན༎

ཞོགས་པར་མ་ལང་གོང་ནས་ཁ་པར་འདིར་འཁྱུད༎
ཉིན་མོར་ལས་བྲེལ་ཁྲོད་ན་ཁ་པར་འདིར་འཁྲིལ༎
མཚན་མོར་མལ་སའི་ནང་དུ་ཁ་པར་འདིར་འཐམ༎
དུས་དྲུག་སེམས་ཀྱི་ཆགས་ས་ཁ་པར་འདི་རེད༎

ད་ནི་དེ་ལྟར་མ་གནང་སྙིང་གི་སྤུན་ཟླ༎
ཚུལ་མཐུན་ཚད་དང་ལྡན་པར་ཁ་པར་སྤྱོད་ཤོག།
ལེགས་ཆ་ཆད་ལུས་མེད་པར་ལེགས་པར་སྤྱོད་ཤོག།
ཞན་ཆ་དུག་ཆེན་བཞིན་དུ་རིང་དུ་སྤོངས་ཤོག།

ལག་པ་ང་དང་མཉམ་དུ་ཡར་ལ་རྐྱོངས་ཤོག།
ཁ་པར་རྩེད་ཆས་ཤིག་ཏུ་བརྩི་རྒྱུ་མེད་ཅིང་༎
རྒྱུན་དུ་རྩེད་མོ་འདི་ལ་མ་གཡེང་བྱ་དགོས༎
རྫུན་དང་དཀྲོག་གཏམ་མ་གླེང་དམ་བཅའ་འཇོག་ཤོག།

༢༠༡༥-༡-༢༡ཉིན་དོ་རྫོང་གཤམ་དུ།

པར་དབང་ཁོངས་གཏོགས་ས་ནི་རྩོམ་པ་པོ་དྲ་བ།བརྒྱུད་སྤེལ་བྱེད་དུས་ངེས་པར་དུ་དྲ་ཐག་སོར་བཞག་བྱ་དགོས།

རྩོམ་ཡིག་གི་སྦྲེལ་ཐགhttp://www.tbwriters.com/?p=2760