༄༅། །དགུན་ཟླ་མགོ་མ་ཚེས་ཡོད་རུང་ཁ་བ་ནི་ད་དུང་མ་བབ། རྒྱང་སུ་བསྐྱེད་པའི་རི་རྒྱུད་དང་བྱང་ཐང་གིས་གྲུབ་པའི་ཡུལ་ལྗོངས་ལ་ཁ་མདོག་གཉིས་མ་གཏོགས་མེད་དེ། སྐྱ་སེར་ཏུ་སོང་བའི་འཇག་མ་དང་སྐྱ་ནག་ཏུ་སྣང་བའི་བྲག་རྡོའོ། ། ཁ་མདོག་དེ་གཉིས་ཀྱི་གོང་རོལ་ནི་སྔོ་ཞིང་དྭངས་ལ་སྤྲིན་གྱིས་དབེན་པའི་ནམ་མཁའ་དེ་ཡིན། གལ་ཏེ་འབྲོག་པ་ཚོས་ལས་ཞོར་འགྲོ་ཞོར་ཞིག་ལ་ནམ་མཁའ་འདིར་ལྟ་ཁོམ་རེ་བྱུང་ན། ནམ་མཁའི་སྔོན་པོ་དེ་ཡིས་ཁོ་ཚོ་ཡང་ཧ་ལས་སུ་བཅུག་ངེས་ཏེ། ་་ གནམ་འདི་སྔོ་ཆེ་དྲག་པས་ཉི་འོད་ཀྱང་དཀྲག་མདངས་མེད་པར་བཟོས་འདུག ་་ ཅེས་ལབ་རྒྱུ་རེད། བྱང་ཐང་དེ་མུ་སུ་ཁྱུད་པའི་རི་རྒྱུད་ཀྱིས་པང་བ་ལྟར་བྱས་ཡོད་རུང་། རི་བོ་ནི་རྒྱང་ཐག་རིང་ཆེ་ལ། ནམ་མཁའ་ནི་དཔག་ཚད་མཐོ་དྲག་པ་དང་། ཟོག་ལུག་དང་ཁ་ཐོར་དུ་སོང་བའི་སྦྲ་ནག་དག་ནི་འཁྱག་ལྷང་ལྷང་གི་གནས་སུ་སོ་སོར་འཇགས་ཡོད་པས། བྱང་ཐང་དེ་ལ་དྲོད་སྣང་ཞིག་རྦད་ནས་སྐྱེ་ཐབས་མེད།
ཀྱ་ཀྱོག་མེད་པའི་སྣུམ་ལམ་ཞིག་བྱང་ཐང་གི་ཕ་རོལ་ནས་ཚུ་རོལ་བར་ཏུ་རེ་འཐག་པ་ལྟར་འཐེན་ཡོད་དེ། ཨ་བྲ་རྣམས་ནི་ལམ་འདིའི་འགྲུལ་པ་ཆེས་བྲེལ་ཚབ་ཆེ་ཤོས་དེ་ཡིན་པ་འདྲ། ཡིན་ཡང་སྐབས་སྐབས་སུ་འབྲོག་པ་གཅིག་གཉིས་རེས་འཕྲུལ་རྟ་གཞོན་ཏེ་འདི་ལས་ཕར་ཚུར་རྒྱུགས་ཀི་རེད། དེ་འདྲའི་འཕྲུལ་རྟ་ཞིག་སྒུག་པས་ཆེད་དུ། བུ་ཆུང་ལོ་ན་བཅུ་གྲངས་ཡར་མར་ལོན་པ་དེ་ལམ་འགྲམ་འདི་རུ་བསྡད་ནས་ཉིན་ཕྱེད་ཙམ་འགོར་སོང་། དང་ཐོག་ཁོས་ལག་རྡོ་འདྲ་འཕངས་ནས་དུས་ཚོད་ཟད་ཐབས་བྱས་པ་རེད། ད་ལྟ་ཐང་ཆད་ནས་ལམ་འགྲམ་གྱི་ཆུ་ཤུལ་ནང་དུ་བཙག་ཡོལ་བྱས་ཏེ་ཉལ་ཡོད། ཁོས་རུམ་ནས་ཁུ་ནག་ཞིག་བླངས་ཏེ་འཐུང་བ་དང་། རྩམ་ལྡག་ལ་འདྲ་བའི་མགོ་རུལ་ལ་རླུང་གིས་མནར་སྐབས་གོང་བ་ཡར་ལ་འཐེན་ཙམ་རེ་བྱས་ནས་བསྡད།
ཅུང་ཙམ་འགོར་རྗེས། རྒྱང་ཕྱོགས་ནས་དིར་སྒྲ་ཞིག་གྲགས་བྱུང་སྟེ། བུ་ཆུང་མྱུར་བར་ཡར་ལངས་ནས་དེ་ཕྱོགས་སུ་ཞིབ་ལྟ་བྱེད་སྐབས། འཕྲུལ་རྟ་ཞིག་ཡོང་གིན་ཡོད་པ་གསལ་བོ་མཐོང་། ཁོས་སྐེ་རགས་ལྷོད་སོང་བ་དེ་བསྐྱར་བཅིང་ཞིག་བྱས་ནས་རུམ་ནང་གི་ཅ་ལག་དག་སྲ་མོ་ཞིག་བྱས། ལག་པ་གཡས་པ་བཀྱགས་ནས་ལག་བརྡ་བྱས། འཕྲུལ་རྟ་གཞོན་མཁན་དེས་བུ་ཆུང་མཐོང་མ་ཐག་གམ་ཏུ་བཅར་ནས་བསྡད་བྱུང་། ཁོ་ནི་ཤ་ཤིན་ཏུ་རྒྱག་པའི་ན་ཡོལ་ཞིག་རེད། ཁོས་བྱ་སྤུའི་སྟོད་ཐུང་སྔོ་ནག་ཞིག་གྱོན་ཡོད་པ་དང་ཇ་མདོག་གི་ཀོ་བའི་རྐང་སྣམ་དྲོན་པོ་ཞིག་ཀྱང་གྱོན་ཡོད། མགོ་ལ་འཕྲུལ་རྨོག་གམ་ཞྭ་མོ་གང་ཡང་མེད་པས་སྐྲ་འཆིང་དེ་རླུང་གིས་སྤུར་ནས་ཚེར་མ་ལྟ་བཟོས་འདུག ཤ་རྒྱག་པས་རྐྱེན་གྱིས་ཁོ་རང་འཕྲུལ་རྟའི་ནང་ཏུ་ཟུག་པ་ལྟར་བྱས་འདུག་ལ། འཕྲུལ་རྟའི་འཕོངས་ལ་བཏགས་པའི་ཀོ་ཁུག་གཉིས་ཀ་ཅ་ལག་གིས་གང་ཡོད་པས་འཕྲུལ་རྟ་དེའང་ལེབ་ལེབ་ཞིག་ཏུ་ཆགས་འདུག
་་ ཡ། ཞི་ལུ། ཁྱོད་འདི་ཕྱོགས་སུ་འགྲོ་རྒྱུ་ཨེ་ཡིན། ་་ ན་ཡོལ་དེས་མཆུ་ཏོ་བཙུགས་ནས་མདུན་ཕྱོགས་སུ་བརྡ་བྱས།
་་ ཡིན། ང་འཇོག་རོགས་ཨེ་བྱེད། ་་ ན་ཡོལ་གྱིས་གདོང་ལ་མཛུམ་ཞིག་འཁྱུག་ཙམ་བྱས་ནས་ཡིན་པའི་བརྡ་ལ་མགོ་བོ་གཡུགས་གཡུགས་བྱས། བྱིས་པ་དེ་མྱུར་མར་འཕོངས་དུ་འགོས་པ་དང་། ལག་གི་ཁུ་ནག་དེ་དབུགས་ཐག་གཅིག་གིས་འཐུང་ནས་དེམ་སྟོང་ལམ་འགྲམ་ཏུ་འཕང་བཞག
་་ ཁྱོད་བྱིས་པ་ཁེར་འགྲོ་ཞིག་ཁྱིམ་ནས་བྲོས་པ་མིན་ན། ་་ ན་ཡོལ་དེས་དྲིས།
་་ མ་རེད། ང་མི་ཞིག་བཙལ་ཏུ་སོང་བ་ཡིན། ་་ ཁ་བརྡ་དེ་འདི་ནས་མཚམས་བཞག་པ་རེད། སྐར་མ་བཅུ་གྲངས་ཀྱི་རྗེས་སུ་ན་ཡོལ་དེས་བསླར་ཡང་བཤད་པར།
་་ ང་ལ་ཡང་བུ་ཞིག་ཡོད། འོན་ཀྱང་ཁོ་ཁེར་བུར་འགྲོ་ཐུབ་ཀི་མ་རེད། ཁོ་ད་དུང་ལོ་ཁ་གང་མེད། ་་ འཕོངས་ཀྱི་བྱིས་པ་དེས་ཡ་ཡ་ཟེར་ནས་ལན་བཏབ་པ་ན། ན་ཡོལ་གྱིས་མུ་མཐུད་དུ་རང་གི་ལོ་རྒྱུས་བཤད། ཁོ་བཙོན་ཁང་ལས་བུད་མ་ཐག་ཡིན་ཟེར། ལོ་བཅུ་གཉིས་ལ་བཙོན་དུ་བསྡད་པ་ཡིན། ན་ནིང་བཟའ་རོགས་ཞིག་བསུས་པ་དང་ད་ལོའི་དབྱར་ཁ་ལ་ཕྲུ་གུ་ཞིག་སྐྱེས་པ་ཡིན་འདུག བླ་མས་ཕྲུ་གུ་དེ་ལ་དྲག་པོ་མཚམས་གཅོད་ཅེས་པའི་མིང་ཁྱད་མཚར་ཅན་ཞིག་བཏགས་པ་རེད། བླ་མ་བཤད་ཡོང་དུས་ན་ཡོལ་དེས་དེ་རིང་རྫོང་ཐོག་གི་འགྲོ་དོན་ཡང་བཤད་རྒྱུ་དྲན་བྱུང་། དེ་རིང་ཁོ་རྫོང་ཐོག་ལ་ཁ་མངར་སོགས་སྡེར་ཁ་སྒྲིག་བྱེད་ཀྱི་ཅ་ལག་ཉོ་དུ་ཡོང་བ་ཡིན། དྲག་བྷོ་མ་སྐྱེས་པའི་སྔོན་ནས། བླ་མས་ཕྱག་མོ་གཟིགས་པས་ཁོ་ལ་ད་ལོ་བགེགས་ཆེན་པོ་ཡོད་པས་རིམ་གྲོ་མང་པོ་སྒྲུབ་དགོས་གསུང་ཡོད། འོན་ཀྱང་དྲག་བྷོ་བཙས་པ་ན་ཁོང་བཟའ་མི་གཉིས་ཀ་བྲེལ་བ་ཤིན་ཏུ་ཆེ་བས་རིམ་གྲོ་དུས་ཐོག་ཏུ་སྒྲུབ་རྒྱུ་མ་བྱུང་། ད་ལྟ་དགུན་ཚེས་ནས་འབྲོག་ལས་ནང་ཁོམ་པ་ཅུང་ཙམ་ཡོད་དུས་ཁོས་བླ་མའི་བཀའ་ནན་དེ་སྒྲུབ་རྒྱུ་བྱས།
་་ ཁྱོད་ལ་འགྲོ་དོན་གང་ཡོད། ་་ ན་ཡོལ་གྱིས་དེ་ལྟར་དྲི་ཞོར་འཕྲུལ་རྟའི་སྣུམ་སྒོ་ལྷོད་ཙམ་བྱས། འཁོར་སྙིང་གི་དིར་སྒྲ་ཡང་བསྟུན་མར་ཇེ་ཆུང་དུ་སོང་བས། ད་ལྟ་རླུང་གི་འུར་སྒྲ་དེས་རྣ་ལམ་ཡོངས་སུ་གང་བར་བྱས།
་་ ང་མི་ཞིག་བཙལ་ཏུ་ཡོང་བ་ཡིན། ་་
་་ ཨོ་རེད་རེད། ཁྱོས་དེ་ལྟར་བཤད་ཐལ། ལོན་ཨེ་ཐལ། ་་
་་ ལོན་ཐལ། ་་
་་ ཡ་ཡ། ་་
་་ ཁྱོད་བཙོན་ཁང་ནང་བཅུག་དོན་གང་ཡིན་ནམ། ་་ ན་ཡོལ་དེ་ངང་ཙམ་སྨྲ་མེད་དུ་འགྱུར། བྱིས་པ་དེས་གློ་བུར་འདི་འདྲ་ཞིག་དྲིས་པས་ཁོས་བློ་ཁ་དེ་མ་ཐག་སྐོར་མ་ཐུབ་པ་ཡིན་ནའང་ཐང་། ཡང་ན་ཁོས་ལོ་རྒྱུས་འདི་བཤད་དགོས་མིན་གྱི་ཐེ་ཚོམ་ཞིག་བྱས་ཡོད་ཚོད་རེད། གང་ལྟར་ཁོ་རང་ཕྲུ་གུ་དྲན་པའི་བདེ་སྐྱིད་ནས་ད་ལྟ་དྲི་བ་འདིས་སྐྱོ་བའི་ཡུལ་ཏུ་བརྫངས་བ་རེད། ཁོས་ངང་ཙམ་སྒུག་ནས་སྨྲས་པར།
་་ ངས་མི་ཞིག་གསད་བཞག་ནི་རེད། ་་
་་ དོན་དག་གང་གི་ཆེད་དུ་ཡིན་ནམ། ་་ བུ་ཆུང་དེས་སྐད་ཆ་མུ་མཐུན་དུ་དྲིས།
་་ ཨོ། དོན་དག་ཆུང་ཆུང་། ཆུང་ཆུང་ཞིག་གི་ཆེད་དུ་དེ་འདྲ་ལས་ཐོག་ཏུ་བབ་སོང་། ་་ ཁོས་བསླར་ཡང་ངང་ཙམ་སྒུག་ནས་བསམ་བློ་ཞིག་བྱས་ཏེ་བཤད་པར། ་་ ལོ་ཉུང་དུས། ང་རང་ཤྭ་སྟོད་ཀྱི་གླང་རི་ལ་འབུ་བརྐོ་རུ་སོང་། ཉིན་ཞིག་ལ། ཤྭ་སྨད་སྡེ་བའི་མི་ཁ་ཤས་ཞིག་ཀྱང་དེ་ན་སླེབས་ནས་འབུ་བརྐོ་བཞིན་འདུག གླང་རི་འདི་སྤྱིར་ན་ངེད་ཤྭ་སྟོད་ཀྱི་ས་རེད། འོན་ཀྱང་ང་ཚོས་དེ་ཉིན་ཤ་སྨད་པ་དེ་དག་ལ་གང་ཡང་མ་རྩོད། འོན་ཀྱང་སྟབས་མ་ལེགས་པ་ཞིག་ལ། ཁོ་ཚོ་ཤྭ་སྨད་པའི་ཁྲོད་ན་ང་དང་ན་མཉམ་ཡིན་པའི་ཕོ་སར་ཞིག་འདུག ངེད་གཉིས་ཀྱིས་འབུ་ཞིག་དུས་མཉམ་དུ་རིག་སོང་། དེ་ནས་རྩོད་པ་བྱུང་། ་་
ཁོས་བསླར་ཡང་འཕྲུལ་རྟའི་སྣུམ་སྒོ་ལྷོད་ཙམ་བྱས་ནས་ཇེ་དལ་ཏུ་བཏང་། སྔོན་སོང་གི་དོན་རྙིང་དག་ཕྱིར་དྲན་དང་བསྐྱར་བརྗོད་བྱེད་དགོས་ན་རིག་པ་ཤིན་ཏུ་སྒྲིམ་དགོས་པ་ཡིན་ཏེ། དོན་རྙིང་དེ་དག་ཉིན་རེ་བཞིན་ཁོང་གི་མིག་ལམ་ནས་བརྙན་འཕྲིན་བཀྲ་བ་ལྟར་འཆར་གིན་ཡོད་རུང་། དེ་ལབ་དགོས་སར་ཐུག་དུས་རིག་པ་ཤིན་ཏུ་སྒྲིམ་དགོས་པ་ཞིག་རེད།
་་ མི་དེས་འབུ་འདི་ཁ་མངར་ལ་བརྗེས་ནས་འུ་གཉིས་ཀྱིས་བགོ་བཞག་ཟེར། དེ་དུས་སྔོ་ཐོ་ཟེར་བའི་ཨ་ཕྱི་རྒན་མོ་ཞིག་གིས་ལ་མགོའི་འབུ་བརྐོ་ས་ནས་ཁ་མངར་དང་ཞོ་འཁྱེར་ནས་ཚོང་བྱེད་ཀྱིན་ཡོད། ་་ བྱིས་པས་མིང་དེ་གོ་མྱོང་། དེ་ནི་ཁོ་ཚོའི་སྡེ་བ་ལའང་སྐད་གྲགས་ཡོད་པའི་རྒན་མོ་ཞིག་རེད། བཤད་ཚུལ་ལྟར་ན། རྒན་མོ་དེས་སྔོན་ཆད་རྫོང་ཐོག་ནས་ཕྱུར་ཚོང་བརྒྱབ་པ་རེད། ཕྱུར་བ་ཆུ་ཤོག་ཆུང་ཆུང་གང་ལ་སྒོར་མོ་ལྔ་རེ་ལེན་པ་རེད། དེ་ནས་མོས་སྒོར་མོ་མང་པོ་བསོགས་ཐུབ་ཡོད་པས་དེ་ཡིས་རང་གི་སྐྱེ་བརྟག་ལེགས་པར་སྒྲུབ་པ་མ་ཟད། ད་དུང་ཤྭ་བོ་དགོན་ཆེན་གྱི་འདུ་ཁང་གསར་བཞེངས་བྱེད་སྐབས་གསེར་སྐུ་ཞིག་ཀྱང་འབུལ་བ་རེད། དགེ་བ་འདི་དག་འགྲུབ་རྗེས་མོ་རང་ཚེ་ལས་འཕོས་པ་དང་། ཚང་མས་མོ་ནི་བདེ་བ་ཅན་གྱི་ཞིང་ཁམས་ལ་སྐྱེ་ཤག་ཤག་ཡིན་ཅེས་ལབ་ཀི་འདུག ཁོས་ཀྱང་རྒྱུ་འབྲས་ལ་བསླུ་བ་མེད་པའི་གནས་ལུགས་དེ་འདི་ལས་གསལ་བོ་རྟོགས་ཡོད།
་་ ངས་དེ་ལྟར་བྱས་ན་མི་འགྲིག་གི་ལབ་པ་ཡིན། རི་འདི་ནི་ངེད་ཤྭ་སྨད་སྡེ་བའི་ས་ཡིན། འདིའི་ཐོག་གི་རྩྭ་ཉག་མ་ཙམ་མིན་མེད་རུང་ངེད་ཤྭ་སྨད་རུ་པའི་ཡིན། དེ་རིང་འབུ་འདི་ང་རང་གིས་འཁྱེར་རྒྱུ་ཡིན་ཅེས་ལབ་པ་ཡིན། ངེད་གཉིས་ཀྱིས་དེ་འདྲ་རྩོད་པ་བྱས་ཚེ་རོགས་པ་ཚོ་བར་བྱེད་དུ་སླེབས། ཚང་མས་འབུ་གཅིག་གི་དོན་དུ་འཛིང་རེས་དགོས་དོན་མེད་ཟེར། ་་
་་ འོན་ཀྱང་ཁྱོད་གཉིས་འཛིང་རེས་བྱས་པ་རེད་པཱ། ་་
་་ རྩོད་པ་བྱས་ནས་ཁྲག་དྲོས་ན་ཀླད་པ་དྭངས་བོར་ཆགས་ཀི་མ་རེད་ཟེར་བ་དེ་ལོས་བདེན། གློ་བུར་ཏུ། མི་དེས་འཇོར་བ་བཟུང་སྟེ་ངའི་མགོ་ལ་གཏད་ནས་གཡུགས་བྱུང་། ང་གཡོལ་ས་གང་ཡང་མེད་པས། ལག་གཡོན་པས་འཇོར་དེ་བཟུང་ཐུབ་པ་དང་། ལག་གཡས་པས་སྐེད་ན་གྲི་ཐུང་ཞིག་བཏགས་ཡོད་པ་དེ་བླངས་ནས་མི་དེའི་མཆན་ཁུག་ལ་བསྟུན་མར་གཉིས་གསུམ་བསྣུན་པ་ཡིན། ཁོས་ཁ་ནས་ ་་ངས་ཁྱོད་ཇོ་བོ་རིན་པོ། ཇོ་བོ་རིན་པོ་ ཟེར་བཞིན་ལག་པས་རྨ་ཁ་སྐྱོར་བཞིན་ས་ལ་འགྱེལ་སོང་། ཉིན་དེ་ནི་ངོ་མ་ལམ་འགྲོ་མེད་པའི་ཉི་མ་ཞིག་རེད། ཏག་ཏག་ཉི་མ་དེ་ལ་ངས་མེ་གསོ་བྱེད་ཀྱི་གླང་མ་འགའ་འཐུ་དགོས་དྲན་ནས་གྲི་ཞིག་བཏགས་པ་ཡིན། ་་
་་ ཁོ་རང་ཁ་མ་དེ་ནས་ཤི་སོང་ངམ། ་་
་་ དེ་འདྲ་བྱུང་མ་ཐག་རྒན་མོ་འགའ་ཞིག་གིས་ང་རང་དྲུད་ནས་ཕྱིར་ཁྲིད་སོང་། ད་ཁྱོད་བྲོས་ཤིག་ཟེར། སྐབས་དེར་ངའི་ཀླད་པའི་ནང་ལ་དྲན་ཆ་གང་ཡང་མི་འདུག དེ་འདྲ་ཐོས་མ་ཐག་བསམ་བློ་གང་ཡང་མ་བཏང་པར་བྲོས་སོང་། རྗེས་མ་སྐད་ཆ་དྲིས་ཡོང་དུས། མི་དེ་ཁ་མ་ཉིད་ནས་ཤི་ཐུབ་ཡོད་ས་མ་རེད། འོན་ཀྱང་རྨ་ཁ་ལ་བལྟས་ན་རྫོང་གི་སྨན་ཁང་དུ་སྐྱེལ་ཀྱང་ཕན་མེད་པ་འདྲ་ཟེར། ཕོ་སར་དེས་ཀྱང་ཁོ་རང་ཤི་རྒྱུ་ཡིན་པ་ཤེས་ཡོད་ས་རེད། ཁོས་མི་ཚོ་ལ་རང་ཉིད་ཁྱིམ་དུ་བསྐྱལ་བའི་རེ་བ་བྱས་སོང་ཟེར། མི་རྣམས་ཀྱིས་ཀྱང་ཁོ་རང་འབུ་ཞག་འདུག་སའི་རུ་ཐོག་ཏུ་བསྐྱལ་བ་རེད། ཁོ་རང་ཁྱིམ་ཏུ་ཐོན་ནས་བཟའ་རོགས་ཀྱི་ངོ་དང་འཕྲད་མ་ཐག་ཤི་སོང་བ་རེད་ཟེར། ་་
་་ ཁྱོད་གང་དུ་བྲོས་སོང་། ་་
་་ ང་ཡང་རི་འདབས་ཀྱི་གུར་ནང་ལ་སླེབས། སྒོར་ཁུག་དང་ཐབ་འགྲམ་ན་ཡོད་པའི་མགྱོགས་ཐུག་སྒམ་གང་ཡོད་པ་དེ་འཁྱེར་ནས་འཕྲུལ་རྟ་གཞོན་སྟེ་བྲོས་པ་ཡིན། དང་པོ་གང་ལ་བྲོས་དགོས་མིན་བསམ་བློ་བྱེད་རྒྱུ་མི་འདུག མིག་ལམ་ནས་མི་དེ་དང་ཁྲག་རྐྱང་རྐྱང་འཆར་ཀི རིག་པ་ཅུང་ཙམ་ཐོན་དུས། ད་ནི་བྱང་རྒྱབ་ཀྱི་དབྱར་སའི་སྟེང་ལ་བྲོས་ན་ལེགས་སྙམ། དབྱར་མཚེར་སྤོ་བའི་བར་ཏུ་བརྟེན་ཐུབ་ན། དབྱར་མཚེར་བཟློག་སྐབས་གཉེན་ཉེ་རྣམས་ཀྱང་དེ་ལ་རུ་ཕབ་ཀི་རེད་དྲན། འཕྲུལ་རྟ་གང་ཐོན་བར་ཏུ་སོང་། མཐར་བྲག་ཁུག་ཞིག་རྙེད་པས་དེ་ན་འདུག་རྒྱུ་བྱས། དུས་དེ་ལ། དབྱར་སའི་ཐོག་གི་ཁ་བ་ད་དུང་ཞུ་ཐུབ་མེད། ས་ཐོག་ནས་རིག་ཡོང་རྒྱུ་གང་ཡང་མི་འདུག དཀར་ལེབ་ལེབ་མིག་གིས་མི་གཟོད་པ་ཞིག་རེད། རི་དྭགས་ཡང་རྔོན་ཡོང་རྒྱུ་མི་འདུག་ལ་ཉི་མ་བཅུ་ཁ་ཞིག་ནས་མགྱོགས་ཐུག་ཀྱང་ཟ་ཚར། འཁྱག་ལྟོགས་ཀྱིས་དེད་ནས་ཡོང་དུས་ཉིན་གསུམ་ཙམ་ལ་ཁ་བ་རྐྱང་རྐྱང་འགམ། ཉི་མ་གསུམ་པའི་མཚན་གུང་ལ་འཇབ་ནས་ཕྱིར་རང་ཁྱིམ་དུ་ལོག་པ་ཡིན། བཟའ་ཚང་གང་པོས་ང་ཕྱིར་ཡོང་བ་མཐོང་ཚེ་སེམས་ནང་གི་རྡོ་ས་ལ་ལྷུང་བ་ལྟར་བདེ་སོང་ཟེར། དེ་ཡང་། གྱོད་འདི་ཤྭ་བོ་སྟོད་སྨད་གཉིས་ཀྱི་མིང་ཡོད་སྣ་ཡོད་ཚོས་བར་སྡུམ་བྱས་ནས་སྒྲིག་པ་ཡིན་འདུག ཕར་གསད་བཞག་པའི་དུད་ཚང་དེའི་ཤུལ་ན་རྒན་མོ་མ་བུ་གཉིས་མ་གཏོགས་སུ་ཡང་མེད་ཟེར། ཤ་ལེན་རྩོད་མཁན་ཞིག་ཀྱང་ཡོད་ས་མ་རེད། དེ་བས་ཁོ་ཚོས་མི་སྟོང་བོས་པ་ལྟར་སྤྲད་བཞག་ན་རྒྱ་ལག་ནས་མི་ཤི་རྒྱུའི་ཐབས་བྱེད་རྒྱུ་འདུག་ཟེར། རྒྱ་འདི་ཚང་གི་ཁྲིམས་ལ་མི་གསད་རྒྱུ་དེ་ལའང་སྡུག་ཐུག་སྡུག་མ་ཐུག་ཟེར་རྒྱུ་ཡོད་ཀི་འདུག སྡུག་ཐུག་ནས་གཞན་པ་གསད་བཞག་ན་ཉེས་པ་ཆེན་པོར་བགྲངས་ཀི་མི་འདུག སྲོག་ཁྲིམས་ཡང་བཅད་ཀི་མ་རེད། ་་
བྱིས་པས་ ་་ ཡ། ་་ རིང་པོ་ཞིག་འཐེན་ཞིང་ ་་ དེ་ནས ་་ ཞེས་དྲིས།
་་ ད་བྲོས་མ་དགོས་ན་ང་ལ་དགའ་རྒྱུ་ལས་སྡུག་རྒྱུ་ཅི་ཡོད། ཕུ་བོས་ཀྱང་ཉེ་རང་རྣམས་ཀྱིས་གྱོད་ཐག་འདིར་རྒྱབ་སྐྱོར་བྱེད་རྒྱུ་ཡིན་ཟེར། བླ་མ་ལ་མོ་བཏབ་ནའང་དེ་འདྲ་བྱས་ན་བཟང་གི་གསུངས་ཡོད་འདུག མི་སྟོང་ལ་སྒོར་མོ་ཁྲི་གསུམ་དང་ཟོག་སུམ་བཅུ། ཇ་སྒམ་བརྒྱ་དང་དར་གཅིག་སོགས་འཇལ་དགོས་འདུག གྱོད་བཤད་རོགས་ལ་འབྲི་གཅིག་རྟ་གཅིག་སྤྲད་དགོས། སྒོར་མོ་ང་རང་གིས་སྒྲིག་རྒྱུ་བྱས། རྟ་ཟོག་ཉེ་རང་གིས་བསྡུ་རྒྱུ་བྱས། དེ་ནས་སང་ཉིན་ཟེར་དུས། ཀོང་རྔ་ཅུའུ(公安局)་ལ་མགོ་བཏགས་ཏུ་སོང་བ་ཡིན། ཁོ་ཚོས་ང་ལ་མི་ལོ་ཉི་ཤུའི་ཁྲིམས་ཐག་བཅད་པ་རེད། ་་
་་ ཁྱོས་གསད་བཏང་བའི་མི་དེའི་མིང་ལ་ཅི་ཟེར་ཀི ་་
་་ ཨོཾ་མ་ནི་པད་མེ་ཧཱུཾ༔ མི་དེ་ལ་བསོད་བཀྲ་ཟེར་ཀི ནག་ཆུང་བསོད་བཀྲ་ཟེར་ཀི ་་
བུ་ཆུང་དེས་དེ་མུས་སུ་གང་ཡང་མ་དྲིས། ཁོས་གྲང་རླུང་གིས་ཁོབ་པོ་བཟོས་པའི་ལག་གཡས་པ་ན་ཡོལ་གྱི་སྟོད་ཐུང་ལས་ལྷོད་དེ་རུམ་ཏུ་བསྐུམ།
་་ འཁྱག་གི་ཡིན་ནཱ། ཁྱོས་ལག་པ་རུམ་ལ་བཞག་ནས་དྲོ་དྲོ་བྱོས་དང་འཕྲུལ་རྟ་ལ་སེམས་ནད་མི་དགོས། ་་
་་ ཁྱོད་ཚ་ཤུལ་འཇིགས་མེད་རེད་པཱ ་་
་་ ཁྱོས་ང་གོ་ཨེ་མྱོང་། ་་
་་ ངའི་ཕ་རྒན་ནག་ཆུང་བསོད་བཀྲ་རེད། ་་
ན་ཡོལ་དེས་ཡང་བསྐྱར་སྣུམ་སྒོ་ལྷོད་པ་དང་། ཁོ་རང་ལན་འདི་ཡིས་ཅི་བྱ་བཏོལ་མེད་དུ་བཏང་ནས་འཕྲུལ་རྟ་སྡོད་གྲབ་བྱེད་བཞིན་པ་འདྲ། འོན་ཀྱང་གློ་བུར་ཏུ་ཁོས་སྣུམ་སྒོ་དམ་ནས་འཕྲུལ་རྟ་འཕུར་བ་ལྟར་མངགས།
་་ ཁྱོས་དེ་རིང་ང་སྒུག་ནས་བསྡད་པ་ཨེ་ཡིན། ་་ ད་ལྟ་གདོང་ལེན་དགོས་པའི་རླུང་ཡང་ཤིན་ཏུ་ཆེ་བས་ན་ཡོལ་གྱིས་སྐད་ཐོན་པོས་དེ་ལྟར་བོས།
་་ ཁྱོད་དེ་རིང་རྫོང་ལ་སོང་བ་ངས་གོ་ཐལ། ་་
་་ ཁྱོད་ཤ་ལན་ལེན་ཏུ་ཡོང་བ་རེད་པཱ། ་་
་་ རེད། ་་ བུ་ཆུང་གིས་ཐེ་ཚོམ་མེད་བཞིན་ཏུ་སྨྲས་པ་དང་མུ་མཐུན་དུ། ་་ ང་ཆུང་མི་ངོས་ཟིན་པ་ནས་བཟུང་ཕ་ཟེར་བ་ཞིག་མི་འདུག མ་ཟེར་བ་ཞིག་ཡོད་ཀྱང་སྡུག་གི་མཆི་མ་ཆད་མ་མྱོང་། ཁྱོད་བཙོན་ལ་སོང་ནས་སྲོག་མགོ་ཐོན་ཡོད་ས་རེད། ངེད་མ་བུ་གཉིས་ཀྱི་བརྟེན་ས་བོར་ནས་སྡུག་མགོ་མ་ཐོན། བཙོན་ལ་ལོ་ཉི་ཤུ་བསྡད་བཞག་ན་རྒྱ་ལག་ནས་ཐར་ཡོད་ན་ཐང་། འོན་ཀྱང་ངའི་སེམས་ཁ་གང་མི་སྲིད། ངེད་མ་བུ་གཉིས་ཀྱི་སྡུག་གི་ལོ་མ་གསོགས་གསོགས་པོའང་དེ་ཡིས་ཚབ་བྱེད་མི་ཐུབ། ངས་ཉི་མ་དེ་རིང་ལོ་བཅུ་གཉིས་ལ་སྒུག་པ་ཡིན། ་་
་་ ཁྱོས་དེ་རིང་ང་གསད་བཏང་རུང་ཕན་ཐོགས་ཅི་ཡོད་རེད། ་་
་་ ཕན་མེད་ཀྱང་སེམས་ཁ་གང་ནི་ཡིན། ་་
ན་ཡོལ་དེས་དེ་ནས་ཅི་ཡང་མ་བཤད། ཁོས་མིག་ལམ་ནས་བླ་མ་རིན་པོ་ཆེ་དང་དྲག་བྷོ་གཉིད་དུ་ཁུག་པའི་རྣམ་པ་ཡང་ཡང་འཆར། ཁོས་བླ་མ་དཀོན་མཆོག་གསུམ་ལ་གསོལ་བ་བཏབ་བཞིན་འཕྲུལ་རྟའི་སྣུམ་སྒོ་ལྷོད་ཙམ་ཡང་མ་བྱས་པར་ཇེ་མགྱོགས་ནས་ཇེ་མགྱོགས་སུ་བཏང་། ཁོ་རང་གིས་ད་ལྟ་རང་ཉིད་སྲོག་མགོ་ཐོན་པའི་ཆེད་དུ་གསོལ་བ་འདེབས་ཀྱིན་མེད། ཁོས་དྲག་བྷོའི་ལས་ཐོག་ཏུ་སྲོག་ལན་སྲོག་འཇལ་གྱི་འཁོར་ལོ་འདི་ནམ་ཡང་མི་འཁོར་བའི་གསོལ་བ་བཏབ་པ་ཡིན། ཁོས་འཕྲུལ་རྟའི་རྭ་ཅོ་སྲ་སྲ་ཞིག་བྱས་པ་ན། བུ་ཆུང་དེས་རིམ་ནས་གྲི་ཤབས་ཞིང་ཁོའི་མཆན་འོག་ཏུ་བསྣུན། འཕྲུལ་རྟ་དེ་ཕར་གུག་ཚུར་གུག་བྱེད་བཞིན་ཁུག་གཅིག་སོང་བ་དང་མཐའ་མ་སྣུམ་ལམ་གྱི་དཀྱུལ་གཡས་གཡོན་མེད་ས་དེར་འགྱེལ་སོང་། འགྱེལ་ནས་ཡང་ཁུག་གཅིག་ལ་ཤུད། ཁོང་གཉིས་པོ་འཕྲུལ་རྟ་ལས་ལྷུང་ཏེ་ས་ལ་འགྱེལ་བ་ན། ན་ཡོལ་དེ་སྐོར་བ་གཉིས་གསུམ་ཞིག་སྒྲིལ་བ་དང་མཐའ་མ་ཁ་ངོ་ས་ལ་གཏད་ནས་འགུལ་རྒྱུ་མེད་པ་གྱུར། བུ་ཆུང་དེས་ཤུགས་ཡོད་ཚད་བཏོན་ནས་ཡར་ལངས་ཐུབ་པ་ཙམ་བྱུང་བ་དང་། ལག་གི་གྲི་ནི་ད་དུང་བཟུང་ཡོད། ཁོ་ན་ཡོལ་གྱི་འགྲམ་ལ་ཐོན་ནས་དེའི་ལུས་པོའི་ཁ་ཡར་ལ་བསྐོར། མི་དེའི་ངོ་གཡོན་པ་ཚང་མ་བརྡར་ནས་རུས་པའང་མཐོང་ཐུབ་པ་ཆགས་འདུག་ལ། ཁ་དང་སྣ་དང་རྨ་ཁ་ནས་ཁྲག་དམར་འཛར་འཛར་དུ་བཞུར་གྱིན་འདུག ཁྲག་དྲོན་པོ་ལ་རླངས་པའང་ཐུ་ལུ་ལུ་བྱེད་བཞིན་འདུག བུ་ཆུང་དེས་རང་གི་ཕ་གསད་ཀྱི་ལག་དམར་དེ་ཤི་ཡོད་པ་མཐོང་ཞིང་། སྲོག་ལན་བླངས་ཡོད་པ་ཐག་ཆོད་པས། དབུགས་རིང་ཞིག་རྔུབ་པ་དང་ཕྱིར་འདོན་པའི་ཁ་རླངས་ཡང་ཐུ་ལུ་ལུར་འབྱིན་སོང་། ཁོས་ལག་གི་གྲི་དེ་ལྷོད་ནས་ཐང་ལ་མངགས་པ་དང་། རྣ་གཡོན་པ་ནས་འཛག་བཞིན་པའི་ཁྲག་དེ་ཨེ་ཆོད་ལྟས། གོམས་པ་ལྕི་མོ་ཞིག་གི་སྟབས་ནས་ཁོ་རང་དལ་མོ་བྱས་ཏེ་ཆུ་ཤུལ་དུ་བབ་པ་དང་། ཆུ་ཤུལ་གྱི་ཉིན་ལ་བརྟེན་ནས་འཕྲེད་ཉལ་བྱས་ཞིང་ནམ་མཁའ་ལ་བལྟས་པ་ན། ད་ལྟའི་ནམ་མཁའ་འདི་ནི་མཐའ་ཡས་པའི་སྔོན་པོ་ཞིག་མ་ཡིན་ཏེ། ཉི་མ་ཡང་བཀྲག་མདངས་ཡལ་བ་ཞིག་མ་རེད། རྒྱང་རིང་རྒྱང་རིང་གི་རི་སྒང་ནས་སྤྲིན་ནག་ལང་ལིང་དུ་འཕྱོ་ཞིང་འཁྲིགས་ཀྱིན་ཡོད་པས། ཁོས་ངག་ནས་ ་་ ད་ཁ་བ་འབབ་ས་རེད། ་་ ཅེས་དབང་མེད་དུ་ཤོར་བ་དང་དེ་མུས་སུ་མིག་གཉིས་དལ་གྱིས་བཙུམ་མོ། ། ། །
པར་དབང་ཁོངས་གཏོགས་ས་ནི་རྩོམ་པ་པོ་དྲ་བ།བརྒྱུད་སྤེལ་བྱེད་དུས་ངེས་པར་དུ་དྲ་ཐག་སོར་བཞག་བྱ་དགོས།
རྩོམ་ཡིག་གི་སྦྲེལ་ཐགhttp://www.tbwriters.com/?p=2433
དཔྱད་མཆན་སྤེལ།